អង្គការសមាគម និងសហជីព អំពាវនាវឱ្យអាជ្ញាធរពាក់ព័ន្ធរបស់រដ្ឋាភិបាល បញ្ឈប់ជាបន្ទាន់នូវការប្រើប្រាស់ប្រព័ន្ធច្បាប់ទៅយាយីអ្នកនយោបាយប្រឆាំង ដោយបង្ហាញកង្វល់ថា ចំណាត់ការនេះកំពុងជំរុញកម្ពុជាឱ្យរងសម្ពាធកើនឡើងទាំងក្នុង និងក្រៅប្រទេស ហើយឈានដល់ធ្លាក់ក្នុងវិបត្តិ«ធ្ងន់ធ្ងរ»។
សេចក្តីថ្លែងការណ៍រួម ចុះផ្សាយនៅថ្ងៃព្រហស្បតិ៍ម្សិលមិញ អង្គការសមាគម និងសហជីពចំនួន ៣០ស្ថាប័ន និយាយថា ខ្លួនមានការព្រួយបារម្ភយ៉ាងខ្លាំង ជុំវិញការចាប់ខ្លួនសកម្មជននយោបាយអតីតសមាជិកគណបក្សសង្គ្រោះជាតិ។
អ្នកឃ្លាំមើលទាំងនោះ អះអាងថា ថ្មីៗនេះ អ្នកនយោបាយប្រឆាំងដែលត្រូវបាប់ខ្លួន ត្រូវបានចោទប្រកាន់ពីបទ រួមគំនិតក្បត់ ញុះញង់ឱ្យប្រព្រឹត្តបទឧក្រិដ្ឋ បទញុះញង់មិនឱ្យយោធាស្តាប់បង្គាប់។
ក្រុមអ្នកតាមដានទាំងនោះ ចាត់ទុកការចោទនេះថា អាជ្ញាធររដ្ឋបានរំលោភយ៉ាងធ្ងន់ធ្ងរទៅលើសេរីភាពបញ្ចេញមតិ និងសិទ្ធិចូលរួមក្នុងជីវភាពនយោបាយរបស់ប្រជាពលរដ្ឋដែលទទួលស្គាល់ដោយរដ្ឋធម្មនុញ្ញ សេចក្តីប្រកាសជាសកលស្តីពីសិទ្ធិមនុស្ស និងកតិកាសញ្ញាអន្តរជាតិ។
បណ្តុំអង្គការទាំងនោះ និយាយថា ក្នុងកាលៈទេសៈដែលកម្ពុជាកំពុងរងផលប៉ះពាល់យ៉ាងខ្លាំងដល់ចរន្តសេដ្ឋកិច្ច ទីផ្សារការងារ និងការភ័យខ្លាចរបស់ប្រជាពលរដ្ឋ ដោយសារកូវីដ១៩ អាជ្ញាធរមានសមត្ថកិច្ច តុលាការ និងស្ថាប័នពាក់ព័ន្ធ គួរបញ្ឈប់ការយាយីទៅលើអតីតសមាជិកគណបក្សប្រឆាំង ដែលពួកគេគ្រាន់តែសម្តែងមតិដោយសន្តិវិធី។
សេចក្តីថ្លែងការណ៍រួមបញ្ជាក់ថា៖ «ជាការពិតណាស់ ការបន្តចាប់ និងឃុំខ្លួនសកម្មជនទាំងនោះ មិនមែនជាជម្រើសដ៏ល្អក្នុងការដោះស្រាយបញ្ហានោះទេ ផ្ទុយទៅវិញ រឹតតែធ្វើឱ្យប្រទេសជាតិជួបនូវវិបត្តិកាន់តែធ្ងន់ធ្ងរបន្ថែមទៀត ព្រមទាំងធ្វើឱ្យសង្គមទាំងមូលបែកបាក់កាន់តែខ្លាំងឡើងៗទៅវិញ»។
តាមសេចក្តីថ្លែងការណ៍រួម អង្គការដែលបានគាំទ្រលិខិតនេះ មានអង្គការលីកាដូ សមាគមការពារសិទ្ធិមនុស្សអាដហុក មជ្ឈមណ្ឌលសិទ្ធិមនុស្សកម្ពុជា និងអង្គការតម្លាភាពកម្ពុជា ជាដើម។
បន្ថែមលើសេចក្តីថ្លែងការណ៍ នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី និយាយថា បើសិនជារបត់នយោបាយនៅតែបន្តយាយីក្រុមនយោបាយប្រឆាំងនោះ គឺការរំលាយគណបក្សប្រឆាំងដែលមានអ្នកគាំទ្រប្រហាក់ប្រហែលគ្នានឹងបក្សកាន់អំណាច បញ្ហាកូវីដ១៩ បញ្ហាគ្មានការងារធ្វើលើពលរដ្ឋរាប់ម៉ឺននាក់ វិធានការដកEBA និងការស្នើដាក់កម្ពុជាជាប្រទេសលាងលុយកខ្វក់ ជាដើម នោះវិបត្តិសង្គមអាចនឹងកើតឡើងកាន់តែធ្ងន់ធ្ងរ។
លោកថា៖ «ហើយបើយើងនៅតែបន្តមានបញ្ហានៃការដាក់សម្ពាធពីអន្តរជាតិផ្សេងទៀតក្តី នេះមិនមែនជាពេលវេលាល្អសម្រាប់ប្រទេសកម្ពុជាទេ ព្រោះវិស័យសេដ្ឋកិច្ចជាវិស័យអាទិភាព ព្រោះវាជាឆ្នាំងបាយរបស់ប្រជាពលរដ្ឋ»។
បើតាមមេធាវីការពារក្ដីឱ្យអតីតមេបក្សប្រឆាំង គឺលោក សំ សុគង់ សកម្មជនអតីតបក្សប្រឆាំង ដែលកំពុងឃុំខ្លួនមាន ១៩នាក់ ក្នុងនោះឆ្នាំ២០២០នេះ មានការចាប់ខ្លួនចំនួន ១៤នាក់ និងចាប់ខ្លួនអំឡុងឆ្នាំ២០១៩ ចំនួន ៥នាក់ ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានច្រានចោលការលើកឡើងរបស់ក្រុមអង្គការសង្គមស៊ីវិលនេះ ដោយអះអាងថា ជាវិធានការច្បាប់ និងពង្រឹងនីតិរដ្ឋ។
លោកថា៖ «សេចក្តីថ្លែងការណ៍នេះ គួរតែធ្វើការណែនាំដល់សកម្មជននយោបាយ [ប្រឆាំង] ឱ្យមានការទទួលខុសត្រូវ គោរពឱ្យបានខ្ជាប់ខ្ជួននូវច្បាប់ដែលមានជាធរមាននៅកម្ពុជា។ បោះបង់អាទម្លាប់ចាស់ចោលទៅ ដើម្បីតែប្រយោជន៍នយោបាយ ទង្វើបង្កអសន្តិសុខអីក៏ហ៊ានធ្វើដែរ។ អាហ្នឹងត្រូវទទួលខុសត្រូវតាមផ្លូវច្បាប់ហើយ»។
លោកនាយករដ្ឋមន្ត្រី ហ៊ុន សែន ថ្លែងពីខេត្តព្រះសីហនុ កាលពី១ ខែមិថុនា ថាវិធានការចាប់ខ្លួនខ្សែបណ្តាញក្រុមប្រឆាំងនៅតែបន្តធ្វើ នូវអ្វីដែលលោកហៅថា ដើម្បីទប់ស្កាត់ចលនាប៉ុនប៉ងផ្តួលរំលំរដ្ឋាភិបាល។
លោក ហ៊ុន សែន ថ្លែងថា៖ «សូមកុំឆ្លៀតឱកាសកូវីដ១៩ ដើម្បីផ្តួលរំលំរាជរដ្ឋាភិបាលឱ្យសោះ បង្កចលាចលឱ្យសោះ។ អ្នកចង់សាក កម្លាំងរបស់អ្នកកាន់តែថយចុះ តាមរយៈផ្តាច់ក្បាលបំបែកដងខ្លួនតែម្តង។ និយាយប្រាប់លោកឯងឱ្យត្រង់ឱ្យច្បាស់។»
អ្នកវិភាគនយោបាយ លោក ឯម សុវណ្ណរ៉ា និយាយថា សម្ពាធពីប្លុកលោកសេរីដែលនាំមុខគេដោយសហរដ្ឋអាមេរិក និងសហភាពអឺរ៉ុប នឹងនៅតែបន្តជំរុញមេដឹកនាំកម្ពុជាឱ្យវិលទៅស្តារប្រជាធិបតេយ្យឡើងវិញ តាមរយៈវិធានការដាក់សម្ពាធផ្នែកសេដ្ឋកិច្ច។
តាមសេចក្តីថ្លែងការណ៍រួមដដែល ក្រុមអង្គការសង្គមស៊ីវិល អំពាវនាវទៅមេដឹកនាំនយោបាយគ្រប់និន្នាការ ឱ្យត្រឡប់ទៅកាន់តុចរចា ដើម្បីរកដំណោះស្រាយនយោបាយរួម ឈរលើគោលការណ៍ប្រជាធិបតេយ្យ គោរពរដ្ឋធម្មនុញ្ញ តម្កល់ប្រយោជន៍ប្រជាពលរដ្ឋ និងសង្គមជាតិជាធំ៕
