អ្នកភូមិប្រហែល ១០០នាក់ នៅក្រុងកំពង់ឆ្នាំង ខេត្តកំពង់ឆ្នាំង ដែលកំពុងរងផលប៉ះដោយគម្រោងអភិវឌ្ឍន៍មួយនៅថ្ងៃនេះ បាននាំគ្នាតវ៉ាប្រឆាំងគ្រឿងចក្ររបស់អាជ្ញាធរមិនឱ្យឈូសឆាយប៉ះពាល់លើដីស្រែចំការរបស់ពួកគាត់។
អភិបាលក្រុងកំពង់ឆ្នាំង លោក យិន សាវ៉េន ឱ្យដឹងថា រដ្ឋបាលខេត្តកំពុងអនុវត្តគម្រោងបង្កើតទីទួលសុវត្ថិភាពមួយកន្លែងមានទំហំជាង ៣ហិកតា ស្ថិតក្នុងភូមិសំរោង និងភូមិផ្សារឆ្នាំង ឃុំផ្សារឆ្នាំង សម្រាប់ជួយសង្គ្រោះដល់ប្រជាពលរដ្ឋនៅរដូវទឹកឡើង។ បើតាមពលរដ្ឋរស់នៅក្រុងកំពង់ឆ្នាំង ការអនុវត្តគម្រោងនេះហើយដែលធ្វើឱ្យប៉ះពាល់ដល់ដីស្រែរបស់ពួកគាត់។
ពលរដ្ឋម្នាក់ លោក ស៊ឹម រដ្ឋា ប្រាប់វីអូឌីតាមទូរសព្ទថា ក្រោមគម្រោងបង្កើតទីទួលសុវត្ថិភាពរបស់រដ្ឋបាលខេត្តកំពង់ឆ្នាំងនេះ បានធ្វើឱ្យប៉ះពាល់ដល់ដីស្រែចំការពលរដ្ឋជាង ១០០គ្រួសារ និងទំហំដីជាង ៤០ហិកតា ស្ថិតក្នុងភូមិចំនួន៤ មានភូមិសំរោង ភូមិត្រពាំងបី ភូមិកណ្តាល និងភូមិផ្សារឆ្នាំង។ លោកបន្តឱ្យដឹងថា នៅព្រឹកថ្ងៃទី១៥ ខែមិថុនានេះ អ្នកភូមិប្រមាណជាង ១០០នាក់ បានប្រមូលផ្តុំតវ៉ានៅលើដីដែលកំពុងមានទំនាស់ ទាមទារឱ្យអាជ្ញាធរផ្តល់សំណងជូនពួកគាត់។
លោកបន្ថែមថា ពលរដ្ឋបានអាស្រ័យផលលើដីនោះតាំងពីឆ្នាំ១៩៧៩ ហើយមានការដឹងលឺពីអាជ្ញាធរមូលដ្ឋានតគ្នារហូតមក។ លោក ស៊ឹម រដ្ឋា អះអាងថា អាជ្ញាធរខេត្តនេះមិនបានផ្សព្វផ្សាយ និងជូនដំណឹងដល់ពលរដ្ឋឱ្យដឹងច្បាស់លាស់ពីគម្រោងអភិវឌ្ឍន៍ទីទួលសុវត្ថិភាពនោះទេ។
លោកបញ្ជាក់ថា៖ «ដីហ្នឹងមិនមែនពលរដ្ឋទើបកាន់កាប់ពីរបីឆ្នាំណា? ដីហ្នឹងពលរដ្ឋកាន់កាប់មកពីរបីជំនាន់ហើយហ្នឹង ហើយអាស្រ័យផលមករហូត។ ហើយប្រជាជនភូមិខ្ញុំសង្ឃឹមតែលើដីប៉ុណ្ណឹង។ ខ្ញុំចង់បញ្ជាក់ថា មធ្យោបាយដែលគេបំផ្លាញនៅភូមិខ្ញុំ មិនមែនតែប៉ុណ្ណឹងទេ គឺបីទៅបួនឆ្នាំហើយ។ ពីមុន ហៅប្រជាជនផ្តិតមេដៃធ្វើទំនប់ ធ្វើទ្វារទឹកស្រួលបិទបើក ព្រោះខ្លាចភ្លៀងមកទឹកជំនន់។ ហេតុតែប្រជាជនល្ងង់ជឿលើថ្នាក់លើ ក៏ផ្តិតមេដៃឱ្យធ្វើ ដល់ពេលធ្វើ បង្ហូរពង្រីងទឹកអស់ មិនឱ្យប្រជាជនធ្វើស្រែចម្ការកើតទេ។ អីចឹងហើយវិធីសាស្ត្រអ្នកប្លន់ដីប្រជាជន គឺអីចឹង»។
អ្នកភូមិម្នាក់ទៀត អ្នកស្រី ប៉ា អេង អាយុ ៧១ឆ្នាំ និយាយទាំងកំហឹងថា គ្រួសារអ្នកស្រីមានដីបណ្តោយទំហំ ២៨៧ម៉ែត្រ និងទទឹង ១៨ម៉ែត្រប៉ុណ្ណោះ សម្រាប់ធ្វើដីស្រែប្រាំង និងដាំបន្លែចិញ្ចឹមគ្រួសារ។ អ្នកស្រីថា គ្រួសារអ្នកស្រីមានមុខរបរជាអ្នកនេសាទ និងធ្វើស្រែចម្ការលើដីបន្តិចបន្តួចនេះ ហើយថាប្រសិនបើរដ្ឋរឹបអូសយកអស់ទៀត គ្រួសារអ្នកស្រីមិនដឹងជាពឹងអ្វីនោះទេ។
អ្នកស្រី ប៉ា អេង បន្តថា ក្រោមគម្រោងអភិវឌ្ឍន៍ធ្វើទីទួលសុវត្ថិភាពនេះ គឺអាជ្ញាធរបានដាក់គ្រឿងចក្រឈូសឆាយផ្លូវ និងប្រឡាយព្រែក មិនឱ្យប្រជាពលរដ្ឋធ្វើដំណើរចេញចូលស្រែចំការ និងភូមិថែមទៀតផង។
អ្នកស្រីបន្ថែមថា៖ «អត់មានមុខរបរអីទេ ពួកខ្ញុំរកស៊ីតែចម្ការស្រែហ្នឹង ហើយចុះបើមកយកអស់អីចឹង ពួកខ្ញុំបានអី? បើគេរឹបអូសអស់អីចឹង ពួកខ្ញុំសង្ឃឹមអី? អីចឹងបានជាពួកខ្ញុំសុំឱ្យប្រមុខរដ្ឋាភិបាលជួយដល់កូនចៅផង»។
អ្នកស្រី ប៉ា អេង បន្តថា អ្វីដែលគាត់ចង់បាននោះគឺ សុំរក្សាដីរបស់គាត់នៅដដែល ឬដោះស្រាយសំណងគោលនយោបាយសមស្របណាមួយសម្រាប់ពួកគាត់។
មេឃុំផ្សារឆ្នាំង អ្នកស្រី ជីម គីមអេង មានប្រសាសន៍ថា គម្រោងអភិវឌ្ឍន៍ទីទួលសុវត្ថិភាពរបស់រដ្ឋបាលខេត្តកំពង់ឆ្នាំង ប៉ះពាល់ពលរដ្ឋ ១០៣គ្រួសារ និងដីប្រហែល ៤១ហិកតា ស្ថិតក្នុងភូមិចំនួន ២ប៉ុណ្ណោះ គឺភូមិសំរោង និងភូមិផ្សារឆ្នាំង។
មេឃុំរូបនេះ អះអាងថា ប្រជាពលរដ្ឋមួយចំនួនបានកាន់កាប់ និងអាស្រ័យផលលើដីមានជម្លោះនោះតាំងពីឆ្នាំ១៩៨០។ អ្នកស្រីបន្តថា កន្លងមក អ្នកស្រីធ្លាប់ស្នើទៅថ្នាក់ខេត្តឱ្យផ្តល់សំណងខ្លះជូនពលរដ្ឋដែលរងផលប៉ះពាល់ដែរ ប៉ុន្តែ ថ្នាក់ខេត្តមិនឯកភាព។
អភិបាលក្រុងកំពង់ឆ្នាំង លោក យិន សាវ៉េន មានប្រសាសន៍ថា គម្រោងអភិវឌ្ឍន៍ទីទួលសុវត្ថិភាពនេះ មានទំហំដីជាង ៣ហិកតា ប៉ុន្តែ ការស្តារ ឬកាយអាចម៍ដីពីតំបន់ជិតនោះ ដើម្បីយកមកដាក់ ដែលដីនោះអាចមានទំហំច្រើនជាងនេះ។
អភិបាលក្រុងរូបនេះ បញ្ជាក់ថា គម្រោងធ្វើទីទួលសុវត្ថិភាពនេះ គឺអាជ្ញាធរខេត្តពុំមានគោលនយោបាយដោះស្រាយសំណងជូនពលរដ្ឋនោះទេ ដោយថា ពលរដ្ឋទាំងនោះបានចូលទៅកាន់កាប់លើដីបឹងរបស់រដ្ឋ។
លោកបន្ថែមថា៖ «ការបង្កើតទីទួលសុវត្ថិភាពនេះ យើងមានការឯកភាពពីក្រសួងធនធានទឹក។ ក្រសួងធនធានទឹក គេបានចុះមកពិនិត្យមើលគ្រប់កន្លែងណាត្រូវស្តារ កន្លែងណាត្រូវអត់ស្តារព្រោះបឹងនេះយូរៗទៅ វាបាត់បឹងអស់ហើយ ដោយសារប្រជាជនគាត់អាស្រ័យផល។ អាស្រ័យផលលើបឹងសាធារណៈរបស់រដ្ឋ។ អីចឹង យើងអត់មានទៅធ្វើអីប៉ះពាល់ដល់គាត់ទេ។ ដីដែលយើងធ្វើតែ ៣ហិកតា ២អាទេ ប៉ុន្តែ យើងអាចយកដីពីជាប់មាត់បឹង»។
មន្ត្រីសមាគមអាដហុកប្រចាំខេត្តកំពង់ឆ្នាំង លោក សំ ចាន់គារ មានប្រសាសន៍ថា ពាក់ព័ន្ធវិវាទដីធ្លីនេះ គឺសមាគមរបស់លោកមិនទទួលស្រាវជ្រាវដឹងច្បាស់លាស់នៅឡើយទេ ប៉ុន្តែ យ៉ាងណាលោកថា ភាគីជម្លោះទាំងពីរគួរតែសម្របសម្រួលគ្នាដោះស្រាយតាមនីតិវិធី ដែលអាចទទួលយកបានទាំងអស់គ្នា ដើម្បីចៀសវាងការកើតមានបញ្ហាផ្សេងៗ៕
