កូរ៉េខាងត្បូង អះអាងថា ខ្លួននឹងចាប់ផ្តើមចរចាលើកិច្ចព្រមព្រៀងពាណិជ្ជកម្មសេរីជាមួយកម្ពុជានៅខែក្រោយនេះ បន្ទាប់ពីសិក្សាលើសក្តានុពលពាណិជ្ជកម្មពីគ្នាទៅវិញទៅមករួច។
សារព័ត៌មានកូរ៉េខាងត្បូង (KBS) បានចុះផ្សាយថា កាលពីថ្ងៃចន្ទ រដ្ឋមន្ត្រីក្រសួងហិរញ្ញវត្ថុ លោក ហុង ណាំគី (Hong Nam-Ki) បាននិយាយថា រដ្ឋាភិបាលកូរ៉េខាងត្បូងនឹងព្យាយាមចាប់ផ្តើមការចរចាសម្រាប់កិច្ចព្រមព្រៀងពាណិជ្ជកម្មសេរីទ្វេភាគីជាមួយកម្ពុជាក្នុងខែកក្កដាខាងមុខនេះ។
លោក ហុង ណាំគី បានលើកឡើងក្នុងកិច្ចប្រជុំជាមួយមន្រ្តីពាក់ព័ន្ធកូរ៉េនៅទីក្រុងសេអ៊ូលថា៖ «ប្រទេសទាំងពីរបានបញ្ចប់ការសិក្សារួមគ្នាស្តីពីសក្តានុពលពាណិជ្ជកម្មសេរី (FTA) កាលពីចុងខែមុន ជាមួយនឹងការបើកសវនាការជាសាធារណៈពាក់ព័ន្ធកាលពីសប្តាហ៍មុន»។
រដ្ឋមន្ត្រីក្រសួងហិរញ្ញវត្ថុកូរ៉េខាងត្បូងរូបនេះ និយាយទៀតថា រដ្ឋាភិបាលកូរ៉េខាងត្បូងនឹងរាយការណ៍អំពីបញ្ហានេះទៅរដ្ឋសភារបស់ខ្លួន និងបញ្ចប់នីតិវិធីក្នុងស្រុកនៅចុងខែនេះ ដើម្បីចាប់ផ្តើមកិច្ចពិភាក្សាពាណិជ្ជកម្មសេរី (FTA) ជាមួយកម្ពុជានៅខែក្រោយ។
អ្នកនាំពាក្យក្រសួងពាណិជ្ជកម្មកម្ពុជា លោក ស៊ាង ថៃ ឱ្យ VOD ដឹងនៅថ្ងៃនេះថា ក្រសួងបានបញ្ចប់ការសិក្សាពីសក្តានុពលនៃកិច្ចព្រមព្រៀងសេរីជាមួយកូរ៉េខាងត្បូងនាពេលថ្មីៗនេះ ក្រោយពីភាគីទាំងពីរបានចុះអនុសារណៈនៃការយោគយល់គ្នា (MoU) ពាណិជ្ជកម្មកាលពីចុងឆ្នាំ២០១៩។
មន្ត្រីរូបនេះ អះអាងថា តាមការសិក្សារួមគ្នា បើកម្ពុជាធ្វើពាណិជ្ជកម្មសេរីជាមួយកូរ៉េខាងត្បូង កម្ពុជាអាចនាំចេញផលិតផលបន្ថែមទៀតទៅកាន់សាធារណរដ្ឋកូរ៉េ នូវផលិតផលកាត់ដេរដូចជា សម្លៀកបំពាក់ និងស្បែកជើង។ លោកថា ចំណែកភាគីកូរ៉េវិញ អាចនាំចូលមកកម្ពុជាបានដូចជា គ្រឿងចក្រ និងកុំព្យូទ័រ។
លោកថា៖ «មួយទៀត យើងក៏អាចទាក់ទាញវិនិយោគគិនល្អៗ មកកាន់ប្រទេសយើងបន្ថែមទៀត។ ខ្ញុំចង់បញ្ជាក់វិនិយោគិន និងការដែលបើករោងចក្រដែលមានបច្ចេកវិទ្យាខ្ពស់ ហើយគេអាចផ្ទេរបច្ចេកវិទ្យាមកកាន់ប្រទេសយើងបន្ថែមទៀតដែរ»។
បើតាមមន្ត្រីក្រសួងពាណិជ្ជកម្ម ការចរចា FTA ជាមួយកូរ៉េខាងត្បូង នឹងមិនអាចបញ្ចប់នៅត្រឹមដំណាច់ឆ្នាំ២០២០នេះទេ។ ប៉ុន្តែថា ការចរចាកិច្ចព្រមព្រៀងដូចគ្នានេះជាមួយចិន អាចនឹងចប់នៅចុងឆ្នាំនេះ។
ការចរចាកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសនានាមានដូចជា ចិន និងកូរ៉េខាងត្បូង របស់កម្ពុជានាពេលនេះ ធ្វើឡើងស្របពេលកម្ពុជាប្រឈមនឹងការព្យួរប្រព័ន្ធអនុគ្រោះពន្ធ EBA របស់សហភាពអឺរ៉ុបនៅខែសីហាខាងមុខ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បង្ហាញការព្រួយបារម្ភថា កិច្ចព្រមព្រៀងពាណិជ្ជកម្មសេរី អាចនឹងធ្វើឱ្យកម្ពុជារងគ្រោះ។
លោកថា៖ «កាលណាយើងអត់ពង្រឹងកសិកម្ម និងផលិតក្នុងស្រុកទេ យើងនឹងទៅជាប្រទេសរងគ្រោះដោយសារប្រព័ន្ធ FTA ហ្នឹង។ ប្រព័ន្ធពាណិជ្ជកម្មសេរីហ្នឹងមានន័យថា យើងអត់មានអីនាំចេញនឹងគេ យើងមានតែនាំចូលពីប្រទេសគេ ហើយនាំចូលដោយអត់បង់ពន្ធទៀត អ៊ីចឹងវានាំឱ្យការនាំចូលគំហុកពីប្រទេសគេ។ វានឹងសម្លាប់ផលិតផលក្នុងស្រុកតែម្តង»។
បើតាមលោក មឿន តុលា ប្រព័ន្ធFTA លើកលែងពន្ធចំពោះប្រទេសណាដែលបានចុះកិច្ចព្រមព្រៀងពាណិជ្ជកម្មសេរី ប៉ុន្តែ ប្រព័ន្ធអនុគ្រោះពន្ធ EBA កម្ពុជាបានផលច្រើនជាង ព្រោះកម្ពុជានាំទំនិញទៅលក់នៅអឺរ៉ុប កម្ពុជារួចពន្ធ តែប្រទេសនៅអឺរ៉ុបនាំទំនិញចូលកម្ពុជាវិញ ត្រូវបង់ពន្ធ។
បើតាមការថ្លែងរបស់នាយករដ្ឋមន្ត្រីកម្ពុជា កាលពីថ្ងៃទី៣ ខែកុម្ភៈឆ្នាំនេះ ទំហំពាណិជ្ជកម្មកម្ពុជា-កូរ៉េខាងត្បូង ឆ្នាំ២០១៩ មានជាង ១ពាន់លាន់ដុល្លារ (១,០៣២ដុល្លារ) ក្នុងនោះ កម្ពុជានាំចេញទៅកូរ៉េខាងត្បូង មាន ៣៣៥លានដុល្លារ កូរ៉េខាងត្បូងនាំចូលមកកម្ពុជា ៦៩៦លានដុល្លារ៕