ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន បានសម្រេចបញ្ចប់មុខតំណែងទាំងអស់របស់ទីប្រឹក្សាជំនួយការ ដែលស្ថិតនៅក្នុងតួនាទីចំនួន៦ នៅក្នុងក្រសួងចំនួន ៤ផ្សេងគ្នា។
ក្នុងអនុក្រឹត្យរបស់ប្រមុខរដ្ឋាភិបាល ចុះផ្សាយកាលពីថ្ងៃទី១០ ខែមិថុនានេះ បានឱ្យដឹងថា រដ្ឋាភិបាលបានសម្រេចបញ្ចប់មុខតំណែងទីប្រឹក្សា ជំនួយការ លេខាធិការ និងមន្ត្រីដែលមានឋានៈស្មើ អមថ្នាក់ដឹកនាំ អមក្រសួង នៅក្រសួងយុត្តិធម៌ ក្រសួងប្រៃសណីយ៍ និងទូរគមនាគមន៍ ក្រសួងធម្មការ និងសាសនា ក្រសួងមុខងារសាធារណៈ ដែលបានតែងតាំងដោយអនុក្រឹត្យមុនថ្ងៃទី៣០ ខែមីនា ឆ្នាំ២០២០។
អ្នកនាំពាក្យរដ្ឋាភិបាល លោក ផៃ ស៊ីផាន ប្រាប់វីអូឌីបន្ថែមលើខ្លឹមអនុក្រឹត្យនោះថា ដើមចមដែលនាំឱ្យរដ្ឋាភិបាលបញ្ចប់មុខងារមន្ត្រី និងជំនួយការនៅតាមក្រសួងទាំងនោះ ដោយសារតែរដ្ឋាភិបាលបានប្តូររដ្ឋមន្ត្រីថ្មីជំនួសមកវិញ។ ចំណែកមន្ត្រី ឬជំនួយការដែលធ្វើការងារជាមួយរដ្ឋមន្ត្រីចាស់ ត្រូវបញ្ចប់តួនាទីដោយស្វ័យប្រវត្តិ។
លោក ផៃ ស៊ីផាន បញ្ជាក់ថា តាមច្បាប់ រដ្ឋមន្ត្រីថ្មី មានសិទ្ធិជ្រើសរើសមន្ត្រី ទីប្រឹក្សា និងជំនួយការជាថ្មីបាន ក្រោយពេលចូលកាន់តំណែង។
លោកមានប្រសាសន៍ថា៖ «រំសាយហ្នឹង មន្ត្រីអាណត្តិ ជំនួយការ ទីប្រឹក្សាជាមន្ត្រីអាណត្តិ បានសេចក្តីថា មន្ត្រីទាំងអស់នោះ ពួកគេទទួលតំណែង និងការងារតាមអាណត្តិរបស់រដ្ឋមន្ត្រីរបស់ខ្លួន បើមន្ត្រីនោះទៅបាត់ហើយ គាត់អត់មាន [តួនាទីទៀត] ទេ រំសាយទាំងអស់ហើយ»។
នៅពេលសួរថា តើការបញ្ចប់មុខតំណែងមន្ត្រី និងជំនួយការទាំងនោះមានចំនួនប៉ុន្មាននាក់ដែរ? លោក ផៃ ស៊ីផាន ឆ្លើយយ៉ាងខ្លីថា មិនដឹងនោះទេ ដោយបង្វែរសំនួរឱ្យទៅក្រសួងមុខងារសាធារណៈវិញ។
ចំណែក អ្នកនាំពាក្យមុខងារសាធារណៈ លោក យក់ ប៊ុណ្ណា សុំមិនធ្វើការបកស្រាយជុំវិញករណីនេះ ដោយលោកថា នឹងជួយរកតួលេខអ្នកដែលត្រូវបញ្ចប់មុខតំណែង រួចផ្ញើរបាយការណ៍មកអ្នកសារព័ត៌មានវិញ។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍ថា ការបញ្ចប់មុខតំណែងមន្ត្រី និងជំនួយការមួយចំនួននៅតាមស្ថាប័នរដ្ឋចំនួន ៤នោះ អាចដោយសារតែបញ្ហាសេដ្ឋកិច្ចកម្ពុជាធ្លាក់ចុះ បន្ទាប់ពីកម្ពុជាមានជំងឺកូវីដ១៩។
លោក ឯម សុវណ្ណរ៉ា ផ្តល់ជាអនុសាសន៍ថា រដ្ឋាភិបាលគួរតែធ្វើកំណែទម្រង់បញ្ចប់មុខតំណែងមន្ត្រី និងជំនួយការនៅតាមក្រសួងទាំងអស់ ដើម្បីទទួលបានអត្ថប្រយោជន៍ច្រើន សម្រាប់ការចំណាយថវិកាជាតិ។
លោកផ្តល់ជាអនុសាសន៍ថា៖ «បើជាទស្សនៈខ្ញុំ បើសិនជាមានការកាត់បន្ថយបាន វាមានអត្ថប្រយោជន៍សម្រាប់ថវិកាជាតិ ប្រសិនបើអាចធ្វើបានក្នុងក្របខ័ណ្ឌរដ្ឋាភិបាលទាំងមូល រឹតតែមានការប្រសើរឡើង»។
ដោយសារឥទ្ធិពលនៃមេរោគកូវីដ១៩ ដែលផ្ទុះឡើងនៅដើមឆ្នាំ២០២០នេះ រដ្ឋាភិបាលបានសម្រេចធ្វើកែទម្រង់ជាបន្តបន្ទាប់ ដោយកាត់បន្ថយការចំណាយនៅតាមក្រសួង ស្ថាប័នរដ្ឋ និងកាត់បន្ថយការចំណាយថវិកាជាតិទាំងមូល៕
