ក្រុមប្រជាពលរដ្ឋដែលអះអាងថា កំពុងមានជម្លោះដីធ្លីជាមួយក្រុមហ៊ុនមេត្រីភាព ស្ថិតក្នុងស្រុកជាំក្សាន្ត ខេត្តព្រះវិហារ នៅថ្ងៃនេះ បានស្វែងរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ដើម្បីឱ្យជួយដោះស្រាយវិវាទដីធ្លីជូនពួកគេ។
អ្នកភូមិមានជម្លោះដីធ្លីប្រហែលជាង ១០០នាក់ តំណាងឱ្យពលរដ្ឋជាង ១ពាន់គ្រួសារ មកពីភូមិអន្ទិល និងភូមិរស្មី ឃុំយាង ស្រុកជាំក្សាន្ត ធ្វើដំណើរពីខេត្តមកស្នាក់នៅក្នុងវត្តស្ទឹងមានជ័យនារាជធានីភ្នំពេញ ហើយត្រៀមយកញត្តិទៅដាក់នៅខុទ្ទកាល័យលោកនាយករដ្ឋមន្ត្រីនៅថ្ងៃនេះ។ ក្នុងញត្តិត្រៀមដាក់ទៅខុទ្ទកាល័យនាយករដ្ឋមន្ត្រី បានឱ្យដឹងថា ក្រុមហ៊ុនមេត្រីភាពបានឈូសឆាយប៉ះពាល់ដីពលរដ្ឋចំនួន ១០៥០គ្រួសារ តាំងពីឆ្នាំ២០១៨។
ទោះយ៉ាងណា គម្រោងយកញត្តិទៅដាក់នៅខុទ្ទកាល័យលោកនាយករដ្ឋមន្ត្រីនៅព្រឹកថ្ងៃនេះ ត្រូវខកខានវិញ ដោយពលរដ្ឋអះអាងថា គ្នាពួកគាត់ធ្វើដំណើរមកពីខេត្តមួយចំនួនទៀតត្រូវសមត្ថកិច្ចរារាំងតាមផ្លូវ។
នៅព្រឹកនេះ មន្ត្រីពាក់ព័ន្ធមួយចំនួនក៏បានទៅសម្របសម្រួលជាមួយពលរដ្ឋនៅក្នុងវត្ត ហើយស្នើឱ្យពួកគាត់ត្រឡប់ទៅខេត្តវិញ តែពលរដ្ឋមិនព្រម។ ព្រឹកនេះ ក៏មានកម្លាំងប្រដាប់អាវុធដាក់ពង្រាយជុំវិញវត្តស្ទឹងមានជ័យផងដែរ។
អគ្គលេខាធិការរងអចិន្ត្រៃយ៍ នៃអាជ្ញាធរជាតិដោះស្រាយទំនាស់ដីធ្លីនៅក្រសួងរៀបចំដែនដី លោក អេ ប៊ុនធឿន ដែលបានទៅជួបពលរដ្ឋនៅក្នុងវត្តស្ទឹងមានជ័យ អះអាងថា វិវាទដីធ្លីនេះ គឺអាជ្ញាធរថ្នាក់ខេត្ត និងថ្នាក់ជាតិ កំពុងដំណើរការដោះស្រាយជូនពលរដ្ឋតាមរយៈការផ្តល់ដីសម្បទានសង្គមកិច្ច ដោយពលរដ្ឋមួយគ្រួសារទទួលបាន ២ហិកតា។
លោកបន្ថែមថា៖ «គោលការណ៍ដោះស្រាយដីសម្បទានសង្គមកិច្ច គឺយើងអនុវត្តតែពីរហិកតានេះ គឺគ្រប់ខេត្តទាំងអស់។ ករណីនេះ មានប្រជាពលរដ្ឋខ្លះគាត់ចង់បានរហូតទៅដល់ ៣ហិកតា ប៉ុន្តែ ជាគោលការណ៍ គឺយើងមិនអាចធ្វើទីតាំងមួយខុសពីទីតាំងមួយបានទេ។ បើយើងដោះស្រាយខុសគ្នា វាកើតរឿងច្រណែនគ្នាមិនខាន»។
ពលរដ្ឋម្នាក់ដែលមកដាក់ញត្តិ លោក អន រតនា និយាយថា គោលការណ៍ដោះស្រាយរបស់អាជ្ញាធរដោយផ្តល់ដីសម្បទានសង្គមកិច្ចត្រឹមតែ ២ហិកតានោះ គឺអ្នកភូមិមិនអាចទទួលបានឡើយ។ លោកថា អ្វីដែលពលរដ្ឋចង់បាន គឺស្នើសុំរដ្ឋាភិបាលកាត់ឆ្វៀលចេញពីដីក្រុមហ៊ុន ឬសុំអភិវឌ្ឍនៅនឹងកន្លែង ត្រឹម ៥ហិកតាចុះ នៃដីដែលខ្លួនបានកាន់កាប់។
លោកបន្ថែមថា៖ «បើដីនោះជាដីរបស់រដ្ឋ តើប្រជាពលរដ្ឋសុំដីនោះមកបង្កបង្កើនផលបានអត់? ពួកខ្ញុំសុំអង្វរសម្តេចអីចឹង ថាពលរដ្ឋខ្ញុំទាំងអស់គ្នានេះសុំដីហ្នឹងបានអត់? ឱ្យប្រជាពលរដ្ឋត្រឹមតែប៉ុណ្ណឹង ដើម្បីប្រកបអាជីវកម្មបន្តទៅទៀត ពីព្រោះពួកខ្ញុំទាំងនេះជាកូនខ្មែរ មិនមែនជាជនបរទេសទេ»។
ពលរដ្ឋម្នាក់ទៀត អ្នកស្រី សន សី និយាយថា ជុំវិញជម្លោះដីធ្លីជាមួយក្រុមហ៊ុនមេត្រីភាពនេះ គឺពលរដ្ឋមួយចំនួនបានរងការគំរាមកំហែងពីអាជ្ញាធរ និងក្រុមហ៊ុន។ ស្ត្រីរូបនេះ អះអាងថា ក្រុមហ៊ុនបានដុតផ្ទះពលរដ្ឋ និងពលរដ្ឋ ២៥នាក់កំពុងជាប់បណ្តឹងនៅតុលាការ រួមទាំងការគំរាមបាញ់សម្លាប់ពលរដ្ឋថែមទៀតពីសំណាក់ក្រុមហ៊ុន។
អ្នកស្រីបន្ថែមថា៖ «ពួកខ្ញុំហែលឆ្លងកាត់ឆ្អែតហើយពីការកៀបសង្កត់របស់ក្រុមហ៊ុនជាមួយប្រជាពលរដ្ឋ។ មានទាំងចាប់ចង មានទាំងគំរាមបាញ់ មានទាំងដុតផ្ទះ មានទាំងដាក់គុក ឥលូវនេះឈ្មោះដែលជាប់បណ្តឹងនៅតុលាការ ២៥នាក់។ តើកន្លែងត្រង់នេះ រដ្ឋាភិបាលមើលឃើញពីទុក្ខលំបាករបស់ប្រជាពលរដ្ឋអត់»។
វីអូឌីមិនរកការឆ្លើយតបពីភាគីក្រុមហ៊ុនមេត្រីភាពបានទេ ជុំវិញការចោទប្រកាន់នេះ។
ពាក់ព័ន្ធករណីនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ស្នើឱ្យក្រសួងរៀបចំដែនដី ពិចារណា និងពិភាក្សាជាមួយប្រជាពលរដ្ឋឡើងវិញ ដើម្បីស្វែងរកដំណោះស្រាយរួមណាមួយដែលពលរដ្ឋអាចទទួលយកបានទាំងអស់គ្នា។
មន្ត្រីសិទ្ធិមនុស្សរូបនេះ លើកឡើងថា ការដោះស្រាយណាមួយដែលផ្តល់សំណងតិចតួចខ្លាំងពេក គឺពលរដ្ឋមិនអាចទទួលយកបាននោះទេ ហើយជម្លោះនោះមិនអាចដោះស្រាយចប់ឡើយ។
លោកបន្ថែមថា៖ «កន្លែងហ្នឹង ខាងក្រសួងគួរតែពិចារណាឡើងវិញ ដោយសារតែពលរដ្ឋបាត់បង់ដីក្នុងទំហំធំ។ ហើយដល់ពេលគាត់បានវិញក្នុងទំហំតូចដូចពី ២ហិកតាអីចឹង។ វាមានគម្លាតគ្នាឆ្ងាយពេករវាងដីទទួលបាន និងដីដែលបាត់បង់ទៅ។ អីចឹងហើយដែលពួកគាត់ពិបាកក្នុងការទទួលយក»។
ក្នុងញត្តិពលរដ្ឋ បញ្ជាក់ថា ពួកគាត់រស់នៅ និងអាស្រ័យផលលើដីនេះតាំងពីឆ្នាំ១៩៤២ រហូតដល់ឆ្នាំ២០១៨ ទើបក្រុមហ៊ុនមេត្រីភាព បានប្រើប្រាស់គ្រឿងចក្រមកឈូសឆាយផ្ទះ និងដំណាំរបស់ពួកគាត់៕
