តំណាងរដ្ឋាភិបាលកម្ពុជា និងចិន បញ្ជាក់ពីការព្រមព្រៀងសហការគ្នាប្រឆាំងនឹងអ្នកដែលយកបញ្ហាជំងឺកូវីដ១៩ ធ្វើជារឿងនយោបាយ និងការធ្វើបដិវត្តន៍ពណ៌ផ្តួលរំលំរដ្ឋាភិបាល។
សេចក្ដីប្រកាសព័ត៌មានរួមនៃកិច្ចប្រជុំគណៈកម្មាធិការសម្របសម្រួលអន្តររដ្ឋាភិបាលរវាងចិននិងកម្ពុជាលើកទី៥ រវាងឧបនាយករដ្ឋមន្ត្រីកម្ពុជា លោក ហោ ណាំហុង ជាមួយ ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន លោក វ៉ាង យី កាលពីថ្ងៃទី១៦ ខែមិថុនា ឆ្នាំ២០២០ ឱ្យដឹងថា កម្ពុជា-ចិនបានយល់ព្រមសហការគ្នា ដោយប្រឆាំងនឹងអ្នកដែលយកបញ្ហាជំងឺកូវីដ១៩ ធ្វើជានយោបាយ និងលាបពណ៌បង្ខូចអ្នកដទៃ។
ស្ថានទូតចិន៖ «ភាគីទាំងពីររក្សាជំហរថា នៅចំពោះមុខ ជំងឺកូវីដ១៩ដែលជាបញ្ហាប្រឈមដ៏ធំសម្រាប់មនុស្សជាតិទាំងអស់ គួរតែធ្វើកិច្ចការរួមគ្នា ប្រឆាំងនឹងការយកបញ្ហាជំងឺកូវីដធ្វើជានយោបាយ ដាក់បន្ទុកបង្ខូចកិត្តិយសគ្នា ការរើសអើងពូជសាសន៍ និងការប្រកាន់បក្សពួក ហើយគាំទ្រដល់អង្គការសហប្រជាជាតិ ដើម្បីអនុវត្ត និងសម្របសម្រួលជាប្រព័ន្ធនូវសកម្មភាពជាសកលប្រឆាំងនឹងជំងឺរាតត្បាតនេះ គាំទ្រអង្គការសុខភាពពិភពលោកក្នុងការបំពេញតួនាទីដឹកនាំចម្បងរបស់ខ្លួន និងរួមគ្នាបង្កើតសហគមន៍សុខភាពសម្រាប់មនុស្សជាតិ»។
សេចក្ដីប្រកាសព័ត៌មានរួមដដែល ថា ភាគីកម្ពុជា-ចិនក៏បានឯកភាពគ្នាពង្រឹងការផ្លាស់ប្ដូរបទពិសោធន៍ស្ដីពីអភិបាលកិច្ចរដ្ឋ តាមរយៈការផ្លាស់ប្ដូរទស្សនកិច្ចថ្នាក់ដឹកនាំជាន់ខ្ពស់រវាងប្រទេសទាំងពីរ ដើម្បីការពារប្រឆាំងនឹងបដិវត្ដន៍ពណ៌ផងដែរ។
មន្ត្រីសម្របសម្រួលអង្គការឃ្លាំមើលការបោះឆ្នោត ខុមហ្វ្រែល លោក កន សាវាង្ស មានប្រសាសន៍ថា រដ្ឋាភិបាលគួរតែបញ្ជាក់ពីប្រភេទព័ត៌មានដល់ប្រជាពលរដ្ឋឱ្យបានច្បាស់លាស់ ដើម្បីបញ្ចៀសការចោទប្រកាន់ និងចាប់ខ្លួនប្រជាពលរដ្ឋ។
លោកថា៖ «អ្នកខ្លះមិនមានលទ្ធភាពទៅជជែកទៅជាមួយរដ្ឋាភិបាល គេអាចធ្វើការសម្ដែងអំពីអារម្មណ៍ និង[បញ្ហា]ខ្លួនដែលជួបប្រទះ។ អ៊ីចឹង ព័ត៌មានខ្លះ ធ្វើឱ្យរដ្ឋាភិបាលមិនសប្បាយចិត្ត ឬប្រទេសដទៃមិនសប្បាយចិត្ត ហើយគិតថា ជារឿងនយោបាយ ដើម្បីក្នុងបំណងចាប់ចង ឬមួយក្នុងការបំបិទសិទ្ធិសេរីភាពបញ្ចេញមតិ អាហ្នឹងមិនមែនជារឿងមួយល្អទេ»។
យ៉ាងក៏ដោយ បើតាមសេចក្ដីប្រកាសព័ត៌មានរួមកម្រាស់ ៤ទំព័រ បាននិយាយផងដែរថា ភាគីទាំងពីរបានឯកភាពគ្នាជំរុញកិច្ចសហប្រតិបត្តិការលើវិស័យការពារជាតិ ចរចាអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការសុខភាពកងទ័ព និងបន្តកិច្ចសហប្រតិបត្តិការលើគម្រោងសំខាន់ៗដូចជា សមយុទ្ធយោធារួមគ្នា និងការអភិវឌ្ឍបណ្ឌិតសភាយោធាជាដើម។
លោកនាយករដ្ឋមន្ត្រី ហ៊ុន សែន បានថ្លែងសារជាបន្តបន្ទាប់ក្នុងការចាត់វិធានការលើក្រុមអតីតបក្សប្រឆាំងដែលលោកចោទថា កំពុងតែប្រើប្រាស់បញ្ហាមេរោគកូវីដ១៩ ចង់ផ្តួលរំលំរដ្ឋាភិបាលស្របច្បាប់របស់លោក។
បើតាមមេធាវីការពារក្ដីឱ្យអតីតមេបក្សប្រឆាំង គឺលោក សំ សុគង់ សកម្មជនអតីតបក្សប្រឆាំង ដែលកំពុងឃុំខ្លួនមាន ១៩នាក់ ក្នុងនោះឆ្នាំ២០២០នេះ មានការចាប់ខ្លួនចំនួន ១៤នាក់ និងចាប់ខ្លួនអំឡុងឆ្នាំ២០១៩ ចំនួន ៥នាក់ ។
កាលពីថ្ងៃទី១១ ខែមិថុនាកន្លងទៅនេះ អង្គការ សមាគម និងសហជីព ចំនួន ៣០ អំពាវនាវឱ្យអាជ្ញាធរពាក់ព័ន្ធរបស់រដ្ឋាភិបាល បញ្ឈប់ជាបន្ទាន់នូវការប្រើប្រាស់ប្រព័ន្ធច្បាប់ទៅយាយីអ្នកនយោបាយប្រឆាំង ដោយបង្ហាញកង្វល់ថា ចំណាត់ការនេះកំពុងជំរុញកម្ពុជាឱ្យរងសម្ពាធកាន់តែកើនឡើងខ្លាំងទាំងក្នុង និងក្រៅប្រទេស ហើយឈានដល់ធ្លាក់ក្នុងវិបត្តិ«ធ្ងន់ធ្ងរ»៕
