សមាគមមិត្តនគរបាលជាតិកម្ពុជា ស្នើទៅរដ្ឋមន្ត្រីក្រសួងព័ត៌មាន ឱ្យពិនិត្យសកម្មភាពរបស់តារាកំប្លែង ដែលកំពុងផលិតជាវីឌីអូ ហើយផ្សព្វផ្សាយតាមទូរទស្សន៍ និងបណ្តាញទំនាក់ទំនងសង្គមមួយចំនួន ធ្វើឱ្យប៉ះពាល់កិត្តិយសនគរបាល។
ក្នុងលិខិតរបស់សមាគមមិត្តនគរបាលជាតិកម្ពុជា ចុះថ្ងៃទី១៦ ខែមិថុនា បានលើកឡើងថា ស្របពេលដែលនគរបាលកំពុងរឹតបន្តឹងការអនុវត្តច្បាប់ចរាចរណ៍ផ្លូវគោក មានតារាកំប្លែង និងស្ថានីយទូរទស្សន៍មួយចំនួនផលិតជាវីឌីអូខ្លី មានស្លៀកសម្លៀកបំពាក់នគរបាលមិនត្រឹមត្រូវ និង ប្រើពាក្យសម្តីមិនសមរម្យ ធ្វើឱ្យប៉ះពាល់ដល់កិត្តិយស និងកិត្យានុភាពរបស់នគរបាល។
លិខិត៖ «មានការស្លៀកពាក់ឯកសណ្ឋានមិនត្រឹមត្រូវ និងមិនគ្រប់គ្រាន់សញ្ញាសម្គាល់តាមបទដ្ឋានស្តីពីឯកសណ្ឋាន និងស្លាកសញ្ញាមន្ត្រីនគរបាលជាតិដែលបានកំណត់ ហើយតួអង្គនគរបាលមានសក់វែង និងមានប្រើប្រាស់ពាក្យសម្តីខ្លះមិនសមរម្យទៅនឹងក្រមសីលធម៌របស់មន្ត្រីនគរបាលជាតិ»។
នៅក្នុងលិខិតរបស់សមាគមមិត្តនគរបាលជាតិកម្ពុជា មិនបានបញ្ជាក់ឈ្មោះស្ថានីយទូរទស្សន៍ និងក្រុមសិល្បករទាំងនោះទេ។ ទោះយ៉ាងណា មួយរយៈចុងក្រោយនេះ ទូរទស្សន៍CTN បានផលិតវីឌីអូកំប្លែងខ្លីៗជាបន្តបន្ទាប់ ពាក់ព័ន្ធការងាររបស់មន្ត្រីនគរបាលចរាចរណ៍ ដែលសម្តែងដោយក្រុមកំប្លែងលោក ពាក់មី៕