កម្ពុជាបានសម្រេចកែសម្រួលលក្ខខណ្ឌមួយចំនួនសម្រាប់អ្នកដំណើរមកពីក្រៅប្រទេសចូលមកប្រទេសមួយនេះ នៅក្នុងវិធានការទប់ស្កាត់ការឆ្លងរីករាលដាលនៃវីរុសកូរ៉ូណានៅក្នុងចំណោមអ្នកដំណើរមកពីបរទេស។
ក្នុងសេចក្ដីប្រកាសព័ត៌មានចេញកាលពីថ្ងៃម្សិលមិញនេះ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ដែលដឹកនាំដោយក្រសួងសុខាភិបាល បានសម្រេចអនុញ្ញាតឱ្យពលរដ្ឋខ្មែរដែលកាន់លិខិតឆ្លងដែនបរទេស ឬប្រើប្រាស់ទិដ្ឋាការពិសេស (Visa K) អាចធ្វើដំណើរចូលមកកម្ពុជាដោយមិនចាំបាច់តម្រូវឱ្យតម្កល់ប្រាក់ ៣,០០០ដុល្លារសម្រាប់ចំណាយលើសេវាសុខាភិបាលទាក់ទងនឹងវិធានការត្រួតពិនិត្យ និងព្យាបាលវីរុសកូរ៉ូណានោះឡើយ។
ប៉ុន្តែ ក្រសួងសុខាភិបាល នៅតែតម្រូវឱ្យពលរដ្ឋខ្មែរដែលកាន់លិខិតឆ្លងដែនបរទេស ត្រូវមានលិខិតបញ្ជាក់ថា អ្នកដំណើរទាំងនោះគ្មានផ្ទុកវីរុសកូរ៉ូណានៅក្នុងរយៈពេល ៧២ម៉ោងចុងក្រោយ ដែលលិខិតនោះចេញដោយអាជ្ញាធរសុខាភិបាលនៃប្រទេសសាម៉ី។
សម្រាប់ស្ថានបេសកកម្មបរទេស និងអង្គការអន្តរជាតិនៅភ្នំពេញទាំងអស់ដែលមានអ្នកការទូត និងមន្ត្រីអង្គការអន្តរជាតិចូលកម្ពុជា ក្រសួងថា ត្រូវមានការធានាអះអាងគ្មានជំងឺកូវីដ១៩របស់ការទូត និងមន្ត្រីអង្គការអន្តរជាតិទាំងនោះ ហើយត្រូវធានានូវការដាក់ឱ្យនៅដាច់ដោយឡែករយៈពេល ១៤ថ្ងៃដោយខ្លួនឯងឱ្យបានត្រឹមត្រូវ។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន សុំមិនធ្វើអត្ថាធិប្បាយបន្ថែមនោះឡើយជុំវិញការផ្លាស់ប្ដូរនេះ ដោយឱ្យអ្នកសារព័ត៌មានទៅមើលសេចក្ដីប្រកាសព័ត៌មានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ និងឱ្យទៅសួរអ្នកនាំពាក្យក្រសួងការបរទេសវិញ។
វីអូឌីបានទូរសព្ទ និងផ្ញើសួរសំណួរតាមប្រព័ន្ធតេឡេក្រាមទៅអ្នកនាំពាក្យក្រសួងបរទេសកម្ពុជា លោក កុយ គួង ដើម្បីសាកសួរបន្ថែមផងដែរ ប៉ុន្តែ គិតមកដល់ពេលនេះ មិនទាន់មានការឆ្លើយតបនៅឡើយ។
ការកែប្រែលក្ខខណ្ឌរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ធ្វើឡើងបន្ទាប់ពីរដ្ឋមន្ត្រីក្រសួងសុខាភិបាល កាលពីថ្ងៃទី០៥ ខែមិថុនា បានស្នើទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីកំណត់ថ្លៃសេវាលើជនបរទេសដែលចូលមកប្រទេសកម្ពុជាក្នុងអំឡុងផ្ទុះជំងឺកូវីដ១៩។
តម្លៃសេវាដែលជនបរទេសត្រូវបង់នោះ មានដូចជា ថ្លៃដឹកជញ្ជូនពីព្រលានយន្តហោះ ទៅមណ្ឌលសំចតរង់ចាំធ្វើតេស្ត និងទទួលលទ្ធផលតេស្ត ថ្លៃយកសំណាកទៅពិនិត្យ និងការចេញលទ្ធផល តម្លៃស្នាក់នៅក្នុងសណ្ឋាគារ ឬមណ្ឌលចត្តាឡីស័ក ថ្លៃអាហារ៣ពេល ជាដើម ដោយសរុបជាទឹកប្រាក់ជិត ៣,០០០ដុល្លារ។
ក្រសួងសុខាភិបាល គិតដល់ថ្ងៃទី១៨ ខែមិថុនា ឆ្នាំ២០២០ កម្ពុជារកឃើញអ្នកកើតជំងឺកូវីដ១៩ សរុប ១២៩នាក់ ក្នុងនោះអ្នកត្រូវបានព្យាបាលឱ្យជាសះស្បើយពីជំងឺកូវីដ១៩ ចំនួន ១២៦នាក់ ហើយនៅសល់ ៣នាក់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតនៅឡើយ៕
