ពលរដ្ឋម្នាក់២នាក់ដែលមានអាការៈធ្ងន់ធ្ងរក្រោយពីបានទទួលទានស្រាថ្នាំចិនតាំងគួយបានឆ្លងផុតពីគ្រោះថ្នាក់ហើយ ដោយម្នាក់ត្រូវបានអនុញ្ញាតឱ្យចេញពីមន្ទីរពេទ្យ ខណៈបុរសម្នាក់ទៀតគ្រូពេទ្យឱ្យនៅសម្រាកព្យាបាលបន្ត។
ប្រធានមន្ទីរសុខាភិបាលខេត្តបន្ទាយមានជ័យ លោក រឿន សុធី បានប្រាប់វីអូឌីនៅព្រឹកនេះថាបុរសម្នាក់ក្នុងចំណោមអ្នកមានអាការៈពុលស្រាថ្នាំចិនធ្ងន់ធ្ងរ បានចាកចេញពីមន្ទីរពេទ្យបង្អែកស្រុកមង្គលបុរីកាលពីថ្ងៃចន្ទ បន្ទាប់ពីសម្រាកព្យាបាលនៅទីនោះប្រហែល២សប្តាហ៍។ លោក រឿន សុធី បន្ថែមថាបុរសម្នាក់ទៀត កំពុងព្យាបាលបន្តនៅមន្ទីរខេត្តសៀមរាប ដោយថាស្ថានភាពសុខភាពបានធូរស្បើយហើយ។
លោក រឿន សុធី បានមានប្រសាសន៍ថា៖«គាត់បានឆ្លងផុតគ្រោះថ្នាក់ហើយ ប៉ុន្តែគាត់នៅមានរោគសញ្ញាញៀនស្រា។ ប្រព័ន្ទប្រសាទរបស់គាត់មិនទាន់នឹងនរ។ មួយរយៈដែលគាត់ដេកពេទ្យប៉ះពាល់ទម្លាប់ញៀនស្រារបស់គាត់»។
ប្រធានសាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប)រាជធានីភ្នំពេញ លោក ហេង មាលី បានប្រាប់ថាអាជ្ញាធរមិនទាន់ចាប់ខ្លួនម្ចាស់សិប្បកម្មផលិតស្រាថ្នាំចិនសែយីហោតាំងគូយបាននៅឡើយទេគិតត្រឹមព្រឹកថ្ងៃសុក្រនេះ ដោយថាអាជ្ញាធរកំពុងបន្តស្រាវជ្រាវ។
ពលរដ្ឋ៧នាក់នៅខេត្តបន្ទាយមានជ័យបានស្លាប់កាលពីថ្ងៃទី១១ ខែមិថុនា បន្ទាប់ពីពួកគាត់បានទទួលទានស្រាថ្នាំចិនតាំងគួយ។
ក្រោយពីមានករណីពុលបណ្តាលឲ្យឈឺ និងស្លាប់នោះ ក្រសួងបានយកសំណាកស្រាថ្នាំនោះពីទីតាំងផ្សេងគ្នាទៅពិសោធនៅមជ្ឈមណ្ឌលជាតិពិសោធ៍នៃក្រសួងសុខាភិបាល កាលពីថ្ងៃទី១២ ខែមិថុនា ឆ្នាំ២០២០។ លទ្ធផលនៃការពិសោធន៍បង្ហាញថាសំណាកភូមិក្បាលស្ពាន១ សង្កាត់ប៉ោយប៉ែត មានកម្រិតមេតាណុល ១៣.៥%។ ដោយឡែកសំណាកយកពីភូមិខ្លាងាប់ ឃុំទួលពង្រ ស្រុកម៉ាឡៃ មានកម្រិត ១៤.៩% និងសំណាកនៅភូមិអូរសំព័រ ឃុំអូរសំព័រ ស្រុកម៉ាឡៃ មានកម្រិតមេតាណុល ១៥.១%។ មេតាណុល ជាប្រភេទអាល់កុលដែលមិនអាចទទួលទានបាននោះទេ ដែលគេប្រើវានៅក្នុងឥន្ធនៈជាដើម។
កាលពីថ្ងៃសៅរ៍សប្តាហ៍មុន សមត្ថកិច្ចបានចុះទៅឆែកឆេរនៅទីតាំងផលិតស្រាំថ្នាំចិនតាំងគួយនៅសង្កាត់បាក់ខែង ខណ្ឌជ្រោយចង្វា រាជធានីភ្នំពេញ ប៉ុន្តែទីតាំងនោះត្រូវបានបិទរួចទៅហើយ។ អាជ្ញាធរបានដាក់ការសង្ស័យថាម្ចាស់អាជីវកម្មបានរត់គេចខ្លួន បន្ទាប់ពីបានលឺព័ត៌មាននៃការស្លាប់របស់ពលរដ្ឋបន្ទាប់ពីទទួលទានស្រាថ្នាំរបស់ខ្លួន៕
