គណបក្សសង្គ្រោះជាតិចោទថា រដ្ឋាភិបាលចំណាយថវិកាទិញរថយន្តយោធាជិត៣០០គ្រឿងពីចិន ដើម្បីទុក បង្ក្រាបប្រជាពលរដ្ឋ បើហ៊ានចេញតវ៉ាពេលពួកគេជួបការលំបាកផ្សេងៗកំឡុងពេលសេដ្ឋកិច្ចធ្លាក់ចុះ ដែលបង្កដោយជំងឺកូវីដ១៩។
ក្នុងសេចក្តីថ្លែងការណ៍របស់អតីតគណបក្សសង្គ្រោះជាតិ ចេញផ្សាយកាលពីម្សិលមិញ បែបរិះគន់ទៅរដ្ឋាភិបាលថា ការបញ្ចេញថវិកាទិញរថយន្តយោធា២៩០គ្រឿងពីចិន មិនមែនសម្រាប់ពង្រឹងវិស័យយោធា ការពារប្រជាពលរដ្ឋ និងការពារបូរណភាពទឹកដីកម្ពុជានោះទេ។
ផ្ទុយទៅវិញ រដ្ឋាភិបាលទិញរថយន្តយោធាននោះ ក្រាន់តែជាឧបករសម្រាប់ដឹកជញ្ជូនកម្លាំងប្រដាប់អាវុធ ដើម្បី បង្ក្រាបប្រជាពលរដ្ឋបាត់បង់ការងារ បាត់បង់ចំណូល និងជួបវិបត្តិបំណុល ដែលហ៊ានងើបតវ៉ាប្រឆាំងនឹងរដ្ឋាភិ បាល ក្នុងកំឡុងពេលនៃវិបត្តិសេដ្ឋកិច្ចដែលបង្កដោយជំងឺកូវីដ១៩ និងស្របពេលដែលកម្ពុជា កំពុងតែទទួលរងទណ្ឌកម្មពីសហគមន៍អន្តរជាតិជាបន្តបន្ទាប់ ជាពិសេសសហភាពអឺរ៉ុប។
កាលពីថ្ងៃទី១៨ ខែមិថុនាកន្លងទៅនេះ លោក ហ៊ុន ម៉ាណែត ជាកូនប្រុសលោកនាយករដ្ឋមន្ត្រី ហ៊ុន សែន និងជាមន្ត្រីជាន់ខ្ពស់ផ្នែកកងទ័ព បានបកស្រាយថា ការទិញរថយន្តទាំងនេះគឺដើម្បីជួយសង្គ្រោះពលរដ្ឋដូចជា ករណីភ្លើងឆេះ ទឹកជំនន់ ឬ មានការប៉ះទង្គិចគ្នានៅតាមព្រំដែនជាដើម។ លោកច្រានចោលការចោទប្រកាន់នានា ហើយអំពាវនាវឱ្យអ្នករិះគន់ទាំងនោះមើលគុណសម្បត្តិរបស់កងទ័ពដែលបានខិតខំធ្វើការងារដើម្បីប្រជាពលរដ្ឋផង៕
