តំណាងរដ្ឋាភិបាលបានប្រាប់អង្គការសហប្រជាជាតិ(UN)ថា កម្ពុជាឱ្យតម្លៃខ្ពស់លើការមានគណបក្សនយោបាយច្រើនចូលរួមប្រកួតប្រជែងបោះឆ្នោត និងបានបង្ហាញតួនាទីរបស់ឧត្តមក្រុមប្រឹក្សាពិគ្រោះ និងផ្តល់យោបល់ក្នុងការឃ្លាំមើលរដ្ឋាភិបាល។
ក្នុងលិខិតបកស្រាយមួយរបស់ស្ថានបេសកកម្មអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិ កាលពីថ្ងៃទី១៩ ខែមិថុនា បញ្ជាក់ថា កម្ពុជាឱ្យតម្លៃខ្ពស់ទៅលើសេរីភាពបញ្ចេញមតិ និងសេរីពហុបក្ស។
លិខិតបញ្ជាក់ទៀតថា កម្ពុជាមានប្រព័ន្ធផ្សព្វផ្សាយទាំងវិទ្យុ ទូរទស្សន៍ អនឡាញ និង បោះពុម្ពផ្សាយជាង ១០០០ស្ថាប័ន ធ្វើការងារដោយសេរី ចំណែកឧត្តមក្រុមប្រឹក្សាពិគ្រោះ និងផ្តល់យោបល់បានកោះហៅមន្ត្រីពាក់ព័ន្ធសាកសួរជាប្រចាំ។
លិខិត៖«ឧត្តមក្រុមប្រឹក្សាពិគ្រោះយោបល់បានអញ្ជើញរដ្ឋមន្ត្រីជាច្រើនមកសួរសំណួរជាទៀងទាត់ និងស៊ើបអង្កេតដោយឯករាជ្យលើបញ្ហាប៉ះពាល់ដល់យុត្តិធម៌សង្គម»។
ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងក្រោយការបោះឆ្នោតឆ្នាំ២០១៨ បន្ទាប់ពីគណបក្សប្រជាជនកម្ពុជាទទួលអាសនៈចំនួន១២៥នៅក្នុងរដ្ឋសភា។ ទោះយ៉ាងណា ស្ថាប័នឧត្តមក្រុមប្រឹក្សាពិគ្រោះ និងផ្តល់យោបល់នេះ ត្រូវលោកនាយករដ្ឋមន្ត្រីហ៊ុន សែន បញ្ជាក់ថា នឹងមិនឱ្យមាននៅអាណត្តិក្រោយទេ ដោយសារធ្វើការងារលើសដែនសមត្ថកិច្ច៕