កម្មករដែលរងគ្រោះករណីបាក់រលំអគារនៅក្នុងខេត្តព្រះសីហនុ កាលពីខែមិថុនា ឆ្នាំ២០១៩ អំពាវនាវឱ្យតុលាការពន្លឿននីតិវិធីលើបណ្តឹងរបស់ពួកគាត់ ដើម្បីផ្តល់យុត្តិធម៌ និងជំរុញឱ្យក្រុមហ៊ុនផ្តល់សំណងដល់ពួកគាត់ដែលរងរបួសក្នុងហេតុការណ៍នេះ។
នៅថ្ងៃនេះ សហជីព កម្មករ និងសាច់ញាតិជនរងគ្រោះ បានធ្វើពិធីរំលឹកខួប១ឆ្នាំ នៃការបាក់រំលំអគារនៅក្រុងព្រះសីហនុ សង្កត់លើកម្មករស្លាប់២៨នាក់ និង២៦នាក់ទៀត រងរបួសធ្ងន់ និងស្រាល កាលពីថ្ងៃទី២២ ខែមិថុនា ឆ្នាំ២០១៩។
លោក អ៊ុក សាវ៉ាត វ័យ ៣១ ឆ្នាំ ជាជនរងគ្រោះម្នាក់ក្នុងហេតុការណ៍បាក់រលំអគារថ្លែងថា រូបលោកមានរបួសធ្ងន់ មិនអាចបំពេញការងារបានដូចមុន។ លោកបន្តថា បើទោះជាមានការជួយឧបត្ថម្ភពីសប្បុរសជនខ្លះហើយក៏ដោយ ក៏លោកនិងកម្មកររងគ្រោះផ្សេងទៀតសុំឱ្យក្រុមហ៊ុនទទួលខុសត្រូវក្នុងករណីនេះដែរ។
លោកមានប្រសាសន៍ថា៖ «ហេតុអ្វីបានជាយើងថា អត់ទាន់សមស្រប ទីមួយក្រុមហ៊ុនអត់ទាន់ចេញសំណងឲ្យយើងទេ ហើយសំណងដែលយើងបានមកពីសប្បុរសជនមកដូចថាអ្នកឧបត្ថម្ភចេញមកពីក្រៅទេ សំខាន់បំផុតគឺយើងត្រូវការបានសំណងចេញពីប្រធានក្រុមហ៊ុន ដើម្បីផ្តល់យុត្តិធម៌ដល់យើង»។
កម្មករម្នាក់ទៀតលោក ម៉ម ធីម វ័យជាង៥០ឆ្នាំ បាននិយាយថា របួសផ្លូវកាយ និង បញ្ហាផ្លូវអារម្មណ៍ បណ្តាលពីហេតុការណ៍បាក់អគារនេះនៅតែជះឥទ្ធិពលលើពួកគាត់។
លោកមានប្រសាសន៍ថា៖ «បាក់បែកទៅគេ[ក្រុមហ៊ុន]អត់សង វាប៉ះពាល់ដល់អារម្មណ៍ អ្នកស្លាប់ក៏ស្លាប់ អ្នកសល់ពីស្លាប់អត់សង ធ្វើឲ្យប៉ះពាល់ដល់អារម្មណ៍យើង ហើយប៉ះពាល់ដល់ជីវភាពគ្រួសារច្រើនដែរ»។
ប្រធានសហព័ន្ធសហជីពកម្មករសំណង់ លោក សុខ គីន សង្កេតឃើញថា រដ្ឋាភិបាលនិងស្ថាប័នពាក់ព័ន្ធមិនមានយន្តការច្បាស់លាស់ក្នុងការចាប់បង្ខំឲ្យម្ចាស់អគារសងសំណងដល់ជនរងគ្រោះនោះទេ។ លោកបន្តថា ក្រុមការងាររបស់លោកនឹងសហការជាមួយដៃគូពាក់ព័ន្ធ ជំរុញទៅរដ្ឋាភិបាល និងតុលាការចាប់បង្ខំឲ្យម្ចាស់អគារចេញមុខទទួលខុសត្រូវលើបញ្ហានេះ។
លោកមានប្រសាសន៍ថា៖ «ទោះបីជារឿងហ្នឹងមានមេធាវីតំណាងរបស់រដ្ឋាភិបាលការពារក្តីឲ្យពួកគាត់ក៏ដោយ យើងនៅតែព្យាយាមស្នើទៅរដ្ឋាភិបាល ក៏ដូចជាស្ថាប័នពាក់ព័ន្ធជំរុញធ្វើយ៉ាងណា ត្រូវពន្លឿននីតិវិធីនៅតុលាការ ដើម្បីឲ្យពួកគាត់ទទួលបានសំណងដោយយុត្តិធម៌»។
ប្រធានសហព័ន្ធសហជីពរូបនោះ អះអាងថា នៅថ្ងៃទី២៥ ខែមិថុនានេះ តុលាការខេត្តព្រះសីហនុនឹងបើកសវនាការរឿងកម្មករសំណង់ដែលរងគ្រោះទាំងនោះផងដែរ។ ព្រះរាជអាជ្ញានៃសាលាដំបូងខេត្តព្រះសីហនុ លោក សៀង សុខ សុំមិនធ្វើការបកស្រាយជុំវិញករណីនេះ។
ដោយឡែក ការបាក់រលំអគារកម្ពស់៧ជាន់នៅខេត្តកែប កាលពីថ្ងៃទី៣ ខែមករា ឆ្នាំ២០២០ បណ្ដាលឱ្យស្លាប់កម្មករសំណង់ ៣៦នាក់ ហើយមនុស្ស ២៣នាក់ផ្សេងទៀតបានរងរបួសធ្ងន់ស្រាល។
ប្រធានសហព័ន្ធសហជីពកម្មករសំណង់ លោក សុខ គីន បញ្ជាក់ថា ដើមឆ្នាំ២០១៨ ដល់ឆ្នាំ២០១៩ ក្រុមហ៊ុនសំណង់ដែលបានចុះបញ្ជីជាង២ពាន់ក្រុមហ៊ុន ប៉ុន្តែក្រុមហ៊ុនដែលមានសុពលភាពប្រហែលជា ៩០០ក្រុមហ៊ុន តែប៉ុណ្ណោះ។ ចំណែក ជាងមួយពាន់ក្រុមហ៊ុនទៀតមិនបន្តសុពលភាពនៅក្រសួងនោះទេ ប៉ុន្តែក្រុមហ៊ុនទាំងនោះ នៅតែដំណើរការការងាររបស់ខ្លួនដដែល ករណីនេះលោកថា ធ្វើឲ្យបញ្ហាប្រឈមនៅតែកើតមានចំពោះកម្មករ៕