លោកនាយករដ្ឋមន្ត្រី ហ៊ុន សែន អះអាងថា វិបត្តិសុខភាពសកលដែលកំពុងរាតត្បាតលើបណ្ដាប្រទេសនានារួមទាំងកម្ពុជាផងនោះ មិនអាចសម្លាប់រដ្ឋាភិបាលរបស់លោក ដូចមជ្ឈដ្ឋានមួយចំនួនបានលើកឡើងនោះឡើយ ដោយថា ចំណូលពន្ធគយតែមួយ អាចទប់ទល់ទៅនឹងចំណាយចរន្តបាន។
លោក ហ៊ុន សែន ក្នុងពិធីចុះពិនិត្យការដ្ឋានសាងសង់ព្រលានយន្តហោះនៅខេត្តកណ្តាលនាថ្ងៃចន្ទនេះ បានថ្លែងថា មានអ្នកខ្លះនិយាយថា កម្ពុជាកំពុងស្ថិតក្នុងវិបត្តិសេដ្ឋកិច្ច និងអ្នកខ្លះទៀតបង្ហោះតាមហ្វេសប៊ុកថា នៅឆ្នាំក្រោយ កម្ពុជានឹងអត់ថវិកាបើកប្រាក់ខែឱ្យមន្ត្រីរាជការ។
លោក ហ៊ុន សែន ថ្លែងថា៖ «ខ្ញុំគ្រាន់តែបញ្ជាក់ថា កូវីដមិនអាចសម្លាប់រដ្ឋាភិបាល ហ៊ុន សែន បានទេ។ បើទោះបីមកដល់ខែមេសា ត្រូវឡើងបៀវត្សរ៍មួយដំណាក់ទៀត ពេលនោះកូវីដកំពុងតែវាយប្រហារ ចំណូលធ្លាក់ចុះ ក៏ប៉ុន្តែ រដ្ឋាភិបាលនៅតែមានសមត្ថភាព ដើម្បីនឹងដំឡើងបៀវត្សរ៍ ហើយបន្តបើកបៀវត្សរ៍ក្នុង១ខែបើកពីរដងៗ»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានថ្លែងកាលពីខែមេសាកន្លងមកថា រដ្ឋាភិបាលបានសម្រេចចិត្តកាត់បន្ថយការចំណាយថវិកាជាតិ ៥០ភាគរយពីគ្រប់ក្រសួង និងថ្នាក់ក្រោមជាតិ សម្រាប់ប្រយុទ្ធប្រឆាំងនឹងជំងឺកូវីដ១៩។
កាលពីថ្ងៃទី២០ ខែមិថុនានេះ អតីតមេដឹកនាំបក្សប្រឆាំងមួយរូប ដែលកំពុងនិរទេសខ្លួន គឺលោក សម រង្ស៊ី ថ្លែងលើបណ្តាញសង្គមហ្វេសប៊ុករបស់លោកថា សេដ្ឋកិច្ចនៅកម្ពុជាកំពុងមានវិបត្តិ។ លោកថា ការកាត់បន្ថយការចំណាយថវិកាជាតិដល់ទៅ ៥០ភាគរយរបស់រដ្ឋាភិបាលលោក ហ៊ុន សែន បង្ហាញពីសញ្ញាជិតដួលរលំ។
លោក សម រង្ស៊ី សរសេររៀបរាប់ថា៖ «បើយើងធ្វើវិភាគផ្នែកសេដ្ឋកិច្ច ហ៊ុន សែន ទាល់ច្រកហើយ នយោបាយសេដ្ឋកិច្ចផ្នែករូបិយវត្ថុក៏ទៅអត់រួច ផ្នែកហិរញ្ញវត្ថុក៏ទៅអត់រួច។ អ៊ីចឹងវាគាំងហើយ ទៅមុខអត់រួច វាត្រូវតែដួលរលំហើយ»។
នាយកប្រតិបត្តិមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង និយាយថា អ្នកនយោបាយខ្មែរគួរដល់ពេលរួមគ្នាដោះស្រាយបញ្ហាពលរដ្ឋរាប់លាននាក់ ដែលកំពុងអត់ការងារធ្វើដោយកូវីដ១៩ និងការគំរាមដកប្រព័ន្ធអនុគ្រោះពន្ធ EBA ដើម្បីកុំឱ្យពលរដ្ឋមើលឃើញថា សារឆ្លើយឆ្លងដើម្បីតែប្រយោជន៍បក្ខពួក។
លោក យង់ គិមអេង ប្រាប់ថា៖ «ជាទូទៅ ខ្ញុំចង់ឃើញអ្នកនយោបាយចាប់ផ្តើមធ្វើការជាមួយគ្នា ដើម្បីដោះស្រាយបញ្ហារួមរបស់ជាតិ ជាជាងប្រើការនេះដើម្បីវាយប្រហារគ្នាទៅវិញទៅមក»។
កាលពីដើមខែមិថុនានេះ តំណាងអ្នកវិនិយោគធំៗចំនួន ៣ រួមមាន សមាគមរោងចក្រកាត់ដេរកម្ពុជា (GMAC) សមាគមស្បែកជើងកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា បានដាក់លិខិតស្នើសុំសហភាពអឺរ៉ុបពន្យារពេលអនុវត្តការដកប្រព័ន្ធអនុគ្រោះពន្ធ EBA ខ្ទង់ ២០ភាគរយ ដែលអឺរ៉ុបគ្រោងដកនៅខែសីហាខាងមុខ។
អគ្គលេខាធិការសមាគមស្បែកជើងកម្ពុជា លោក បេន កៅ (Ben Kao) លើកឡើងក្នុងលិខិតនោះថា បើសហភាពអឺរ៉ុបដក EBA ដូចការគ្រោងទុក ចំពេលដែលវិស័យមួយនេះកំពុងរងផលប៉ះពាល់ពីកូវីដ១៩ លោកថា៖
«គ្រួសារកម្ពុជារាប់សែនកំពុងស្ថិតក្នុងហានិភ័យនៃភាពបាត់បង់ការងារ ហើយពលរដ្ឋកម្ពុជារាប់លាននាក់ អាចនឹងធ្លាក់ចូលទៅក្នុងភាពក្រីក្រជាថ្មី ប្រសិនបើគ្មានដំណោះស្រាយណាមួយទេនោះ»៕
