លោកនាយករដ្ឋមន្ត្រី ហ៊ុន សែន អះអាងថា គម្រោងសាងសង់ព្រលានយន្តហោះអន្តរជាតិភ្នំពេញថ្មី នឹងត្រូវការកម្លាំងកម្មករប្រមាណ ២ម៉ឺននាក់ ដោយលោកថា នឹងស្រូបទាញកម្លាំងពលកម្មពីវិស័យដទៃទៀតដែលកំពុងបាត់បង់ការងារ។
ថ្លែងក្នុងពេលចុះពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកនេះ លោកនាយករដ្ឋមន្ត្រី ហ៊ុន សែន មានប្រសាសន៍ថា នៅពេលដែលការសាងសង់ពេញបន្ទុកនោះ គឺការដ្ឋានសាងសង់ព្រលានយន្តហោះមួយនេះ នឹងត្រូវការកម្លាំងកម្មករប្រហែល ២ម៉ឺននាក់ ដើម្បីសាងសង់។
លោក ហ៊ុន សែន បន្តថា ការដ្ឋានដែលត្រូវកម្លាំងកម្មករដ៏ច្រើននេះ នឹងជួយដល់ពលករ និងកម្មករកន្លែងផ្សេងៗទៀតដែលបានបាត់បង់ការងារធ្វើ អាចមកធ្វើការងារនៅការដ្ឋានសាងសង់ព្រលានយន្តហោះអន្តរជាតិភ្នំពេញថ្មីនេះបាន។
លោក ហ៊ុន សែន ថ្លែងថា៖ «កម្មករដែលបានបាត់បង់ការងារពីថៃ បានបាត់បង់ការងារពីកន្លែងនេះ កន្លែងនោះ ត្រូវទៅរកការងារធ្វើកន្លែងដែលគេបើក»។
ក្នុងលិខិតមួយកាលពីចុងឆ្នាំ២០១៧កន្លងមក រដ្ឋាភិបាលបានប្រកាសពីគម្រោងសាងសង់អាកាសយានដ្ឋានភ្នំពេញអន្តរជាតិថ្មីមានតម្លៃ ១,៥០០លានដុល្លារ ស្ថិតលើផ្ទៃដីទំហំ ២,៦០០ហិកតា នៅភូមិសាស្ត្រស្រុកកណ្ដាលស្ទឹង ស្រុកស្អាង ខេត្តកណ្ដាល និងមួយផ្នែកនៃស្រុកបាទី ខេត្តតាកែវ៕