ផ្លូវជាតិលេខ២ មានប្រវែង១៣៧គីឡូម៉ែត្រពីភ្នំពេញ ទៅដល់ច្រកទ្វារអន្តរជាតិកម្ពុជា-វៀតណាម។ កាលពីមុនប្រសិនបើធ្វើដំណើរតាមបណ្ដោយផ្លូវជាតិនេះបានប្រមាណជាជាង៣០គីឡូម៉ែត្រពីភ្នំពេញនោះគេនឹងបានឃើញកន្លែងលក់កង្កែបបោកអាំងរាប់សិបតូប តែនៅពេលនេះចំនួនអ្នកលក់បានថយចុះជាច្រើន ដោយសារតែផលប៉ះពាល់នៃការអូសបន្លាយការសាងសង់។
« ពួកខ្ញុំលក់ហ្នឹង ពួកខ្ញុំពិបាករើកន្លែងចុះឡើងហើយភ្ញៀវពេលឃើញធ្វើផ្លូវរញ៉េរញ៉ៃអ៊ីចឹងគេមិនចូលទេ អ៊ីចឹងវាលក់អត់ដាច់ដែរបង »។
នេះជាការត្អូញត្អែររបស់កញ្ញាចិន ធីតា អាយុ ២៦ ឆ្នាំ ដែលបានផ្អាកលក់កង្កែបបោកជិត១ខែមកហើយ បន្ទាប់ពីប្រកបរបរមនេះជិត១០ឆ្នាំមកនេះ។
កញ្ញារៀបរាប់ថា កាលពីមុនចំណូលដែលបានពីការលក់កង្កែបបោក ក្នុងមួយថ្ងៃគាត់រកបានប្រមាណ៤០ម៉ឺនរៀលខណៈថ្លៃដើមអស់ប្រមាណ ៣០ម៉ឺនរៀល។ តែប្រសិនជាថ្ងៃសៅរ៍ អាទិត្យ ឬបុណ្យទានផ្សេងៗកញ្ញាអាចចំណេញបានច្រើនជាងនេះ។
ក្នុងមួយសប្តាហ៍ កញ្ញា ចិន ធីតា អាចលក់អស់កង្កែប៧០ ទៅ៩០គីឡូក្រាម ទោះជាយ៉ាងណាមុខរបរមួយនេះបានធ្លាក់ចុះចំណូលប្រមាណ៥០ភាគរយនៅពេលដែលផ្លូវជាតិលេខ២ចាប់ផ្ដើមសាងសង់។
នៅពេលនេះកញ្ញា ងាកមកលក់ម្ហូប និងបង្អែមបន្តិចបន្តួចនៅផ្ទះវិញដើម្បីរកប្រាក់ចំណូល ដោយសង្ឃឹមថានៅពេលដែលផ្លូវជាតិលេខ២ សាងសង់រួចកញ្ញាអាចទៅលក់កង្កែបបោកតាមបណ្ដោយផ្លូវនេះវិញបាន។
កញ្ញា ចិន ធីតា៖ « វាហុយ ហើយពិបាកលក់ យើងត្រូវរើកន្លែងទៅមកៗ ដល់អ៊ីចឹងទៅពួកខ្ញុំនៅផ្ទះមួយរយៈ មិនដឹងថ្ងៃណាគេធ្វើផ្លូវហើយទេ ទាល់តែវាលំនឹង វាថេរបានអាចលក់បាន »។
ក្លិនឈ្ងុយនៃកង្កែបបោកអាំង ដែលផ្សំគ្រឿងពីស្លឹកគ្រៃ ល្មៀត រំដេង ស្លឹកម្រះព្រៅ លាយជាមួយសាច់ជ្រូក និងជើងកង្កែបចិញ្ច្រាំចូលគ្នា បានទាក់ទាញអ្នកដំណើរតាមផ្លូវមួយនេះឱ្យឈប់ ភ្លក់រសជាតិកង្កែបដែលមានពណ៌ក្រហម ពោះប៉ោងដោយសារញាត់គ្រឿងផ្សំព្រមទាំង សម្រាកលើគ្រែឫស្សី ដែលមានចងអង្រឹងចាំទទួលភ្ញៀវផងដែរ។
អ្នកលក់មួយរូបទៀតគឺអ្នកស្រី អំ ផល្លី ឲ្យដឹងដែរថា កន្លែងលក់កង្កែបបោកចន្លោះពីផ្លូវចូលរមណីយដ្ឋានទន្លេបាទី និង ផ្លូវចូលរមណីយដ្ឋានភ្នំតាម៉ៅនេះ គឺអ្នកលក់ភាគច្រើនជួលដីគេហើយសម្រាប់អ្នកស្រីគឺជួលក្នុងតម្លៃ ៧០ម៉ឺនរៀលក្នុងមួយឆ្នាំ។ អ្នកស្រីបន្តថា គាត់លក់ក្នុងតម្លៃចន្លោះពី៣ពាន់ ទៅ៣ពាន់៥រយរៀលក្នុងមួយចង្កាក់ ហើយការលក់ដូរកង្កែបបោកនេះ គឺហាក់ពិបាកចាប់តាំងពីមុនចូលឆ្នាំថ្មីប្រពៃណីជាតិ ដោយសារមូលហេតុនៃការសាងសង់ផ្លូវជាតិលេខ២នេះ និងការផ្ទុះជំងឺកូវីដ១៩ ដែលនាំឲ្យអ្នកដំណើរភាគច្រើនមិនហ៊ានចូលហូប ហើយធ្វើឲ្យចំណូលរបស់គាត់ធ្លាក់ចុះពីជាង ១០ម៉ឺនរៀលក្នុងមួយថ្ងៃមកត្រឹមពី៤ទៅ៥ម៉ឺនរៀលប៉ុណ្ណោះ។
អ្នកស្រី អំ ផល្លី៖ « អាហ្នឹងដូចថាវាពិបាកមែនទែនតែម្ដង អាឈូសអ៊ីចឹងទាំងគេទាំងយើងពិបាកទាំងលក់ គេពិបាករកផ្លូវចុះអត់ឃើញ ម្លោះហើយអាលក់ទៅវាសល់វាខាត បើអញ្ចឹងហើយផ្អាកទៅវាល្អជាងអា មកសំកុកអត់ប្រយោជន៍។ ផ្លូវល្អស្រួលទៅ គេជិះចូលមកទិញមកអីយើងស្រណុកលក់ ដល់ពេលឥឡូវវាពិបាកផ្លូវតូចទៅៗ ហើយខូងអញ្ចឹងអត់សូវមានអ្នកលក់ ដូចអូនឯងបានឃើញស្រាប់ហើយអ្នកលក់ បិទ តូបភាគច្រើន »។
មិនមែនត្រឹមតែអ្នកដែលលក់កង្កែបបោកនោះទេ ដែលត្រូវប៉ះពាល់ជីវភាពពីការសាងសង់ផ្លូវជាតិលេខ២នេះ អ្នកផ្គត់ផ្គង់កង្កែបស្រស់ដល់អ្នកលក់កង្កែបបោកនេះ ក៏ប៉ះពាល់ផងដែរ។
អ្នកស្រី ពិន ស្រី ជាអ្នកមើលការខុសត្រូវកន្លែងផ្គត់ផ្គង់កង្កែបស្រស់នៅក្នុងឃុំកណ្ដឹងនេះ ឲ្យដឹងថា កង្កែបស្រស់ដែលអ្នកស្រីយកមកផ្គត់ផ្គង់ដល់អ្នកលក់កង្កែបបោកនេះ គឺ ទទួលទិញពីខេត្តតាកែវ ព្រៃវែង ស្វាយរៀង និងកន្លែងផ្សេងទៀតតាមដែលគេទាក់ទងមកហើយនិយាយត្រូវតម្លៃគ្នា។ អ្នកស្រីបន្តថា មុនសាងសង់ផ្លូវជាតិលេខ២ក្នុងឃុំ កណ្ដឹងនេះ អ្នកលក់កង្កែបបោកខ្លះបញ្ជាទិញកង្កែបស្រស់ចន្លោះពី៩០ទៅ១០០គីឡូក្រាមក្នុងមួយសប្ដាហ៍ ក្នុងតម្លៃ១ម៉ឺន២ពាន់រៀលក្នុងមួយគីឡូក្រាម តែចាប់ពីផ្លូវជាតិលេខ២សាងសង់កាត់ទីនោះ ការបញ្ជាទិញបានធ្លាក់ចុះជាងពាក់កណ្ដាល។
អ្នកស្រី ពិន ស្រី៖ « ឥឡូវម្នាក់ៗលក់អស់៥០គីឡូអីវ៉ាន់ហ្នឹង ពីមុន ច្រើន រាប់អត់ឈ្នះ អ្នកខ្លះលក់រាល់ថ្ងៃ ២ថ្ងៃយកម្ដង អ្នកខ្លះគេលក់ថ្ងៃ សៅរ៍ អាទិត្យ មួយអាទិត្យគេយកម្ដង។ អ្នកស្ថិតស្ថេររាល់ថ្ងៃមួយអាទិត្យគេអស់ជិត១០០គីឡូរបស់គេដែរហ្នឹង » ។
ទាក់ទងនឹងរបរលក់កង្កែកបោកអាំង និងការកសាងផ្លូវជាតិលេខ២នេះមេឃុំកណ្ដឹង ស្រុកបាទី គឺលោក ស្រី សំបូរ ឲ្យដឹងថាជាធម្មតាការអភិវឌ្ឍតែងតែមានផលប៉ះពាល់ តែទោះជាយ៉ាងណាអាជ្ញាធរឃុំបានស្នើឲ្យថ្នាក់ខេត្ត និងក្រសួងពន្លឿនការសាងសង់នេះ ដើម្បីឲ្យឆាប់រួចរាល់ផងដែរ។ លោកឲ្យដឹងថានៅក្នុងឃុំកណ្ដឹងទាំងមូលមានអ្នកប្រកបរបរលក់កង្កែបបោកអាំងនេះប្រមាណ៧០គ្រួសារ ហើយក្នុងនោះគ្រួសារខ្លះលក់២ទៅ៣តូប តែលោកថារហូតមកដល់ពេលនេះមានតែប្រមាណ២០ ទៅ៣០តូបប៉ុណ្ណោះដែលនៅលក់។
លោក ស្រី សំបូរ៖ « យើងកំណត់អត់បានទេពេលខ្លះកន្លែងណាដែលមានចន្លោះល្អគាត់ចេះតែលើកដាក់លក់ទៅពេលណាដែលគេឈូសគាត់លើកចល័តចេញទៅ »។
ផ្លូវជាតិលេខ២ និងផ្លូវជាតិលេខ២២ ដែលមានប្រវែងជាង៧០គីឡូម៉ែត្រ និងទទឹងពី១៣ ដល់២០,៥ម៉ែត្រ បានបើកការដ្ឋានសាងសង់ឡើងវិញកាលពីថ្ងៃទី ១១ ខែកុម្ភៈ ឆ្នាំ២០២០ ដោយ គ្រោងចំណាយទឹកប្រាក់ ៤៥,៧លានដុល្លារសហរដ្ឋអាមេរិក ជាប្រាក់កម្ចីពីរដ្ឋាភិបាលកូរ៉េខាងត្បូង ហើយគ្រោងប្រើរយៈពេលសាងសង់ ៣០ខែ ។ ផ្លូវទាំងពីរខ្សែនេះ ត្រូវសាងសង់ដោយក្រុមហ៊ុន Hanshin Engineering and Construction Co., Ltd ។
មន្ត្រីសម្របសំរួលផ្លូវ ថ្នល់នៃក្រសួងសាធារណការ និងដឹកជញ្ជូនមួយរូបដែលសុំមិនបញ្ចេញឈ្មោះទទួលស្គាល់ថា ពីផលប៉ះពាល់ដល់ពលរដ្ឋដោយសារការងសាងសង់ផ្លូវនេះ តែក្រសួងក៏ទើបនឹង បានបើកកិច្ចប្រជុំបន្ទាន់ជាមួយភាគីក្រុមហ៊ុន ដើម្បីដោះស្រាយបញ្ហាដែលកំពុងជួបប្រទះផងដែរ ព្រោះថារដូវភ្លៀងបានចូលមកដល់ដែលប្រាកដណាស់នឹងធ្វើឲ្យប្រជាពលរដ្ឋកាន់តែលំបាក ជាពិសេសតំបន់ទីប្រជុំជន និងកន្លែងដែលប្រជាពលរដ្ឋប្រកបរបរអាជីវកម្មផ្សេងៗ។
លោកថា៖ « សូមអធ្យាស្រ័យមួយរយៈ ព្រោះថាឥឡូវនេះកំពុងតែខំប្រឹងប្រែង ទាំងអស់ គ្រប់ភាគីទាំងអស់ ទាំងក្រុមហ៊ុនសាងសង់ តាំងពីទីប្រឹក្សាបច្ចេកទេស អង្គភាពគ្រប់គ្រងគម្រោង ជាពិសេសបទបញ្ជាដាច់ខាតពីឯកឧត្តមទេសរដ្ឋមន្ត្រីឲ្យដោះស្រាយទាំងនិរន្តភាពការងារ និងបរិស្ថានដែលប៉ះពាល់ »។
មន្ត្រីព័ត៌មាននៃក្រុមហ៊ុន Hanshin Engineering and Construction Co., Ltd ដែលសុំមិនបញ្ចេញឈ្មោះ បានឲ្យVOD ដឹងតាមសារអេឡិចត្រូនិចថា រហូតមកដល់ពេលនេះគម្រោងសាងសង់ផ្លូវជាតិលេខ២នេះគឺសម្រេចបាន ជាង១០ភាគរយហើយ តែអ្វីដែលជាការខ្វះខាតគឺកម្លាំងពលកម្ម និងគ្រឿងចក្រ។ យ៉ាងនេះក្តីក្រុមហ៊ុននឹងដោះស្រាយបញ្ហានេះតាមរយៈការចល័តគ្រឿងចក្រ និងកម្លាំងពលកម្មនិងពន្លឿនការសាងសង់ ដើម្បីឲ្យសម្រេចតាមគម្រោង៕
