សមាគមរោងចក្រកាត់ដេរនៅកម្ពុជា (GMAC) និងសមាគមស្បែកជើងនៅកម្ពុជា (CFA) បានស្នើជាថ្មីទៀតទៅគណៈកម្មការអឺរ៉ុប ឱ្យពន្យារពេលដកផ្នែកខ្លះនៃប្រព័ន្ធអនុគ្រោះពន្ធ«អ្វីគ្រប់យ៉ាងលើកលែងតែអាវុធ» ឬ EBA ពីកម្ពុជា ដោយសមាគមទាំងពីរនេះ ព្រួយបារម្ភខ្លាចវិស័យកាត់ដេរនៅកម្ពុជាដួលរលំក្រោយបាត់បង់ចំណែក ២០ភាគរយនៃប្រព័ន្ធអនុគ្រោះពន្ធ។
កាលពីខែកុម្ភៈ សហភាពអឺរ៉ុបប្រកាសថា ខ្លួននឹងអនុវត្តវិធានការដកចំណែក ២០ភាគរយនៃប្រព័ន្ធអនុគ្រោះពន្ធ (EBA) ពីកម្ពុជា នៅថ្ងៃទី១២ ខែសីហា ប្រសិនបើអឺរ៉ុបមើលឃើញថា ស្ថានភាពសិទ្ធិមនុស្ស និងប្រជាធិបតេយ្យនៅកម្ពុជា មិនត្រូវបានស្តារឡើងវិញតាមលក្ខខណ្ឌរបស់ខ្លួន។
ក្នុងលិខិតមួយចុះថ្ងៃទី២២ ខែមិថុនានេះ សមាគមរោងចក្រកាត់ដេរនៅកម្ពុជា (GMAC) សមាគមស្បែកជើងនៅកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា បានស្នើរួមគ្នាទៅគណៈកម្មការអឺរ៉ុបឱ្យពន្យារពេលដកហូតប្រព័ន្ធអនុគ្រោះពន្ធ (EBA) រយៈពេល ១២ខែទៀត ដោយថា វិស័យកាត់ដេរ និងផលិតស្បែកជើងនៅកម្ពុជា កំពុងរងផលប៉ះពាល់ធ្ងន់ធ្ងរពីវិបត្តិជំងឺកូវីដ១៩។
បើតាមលិខិត គឺការស្នើសុំពន្យារពេលលើកទី២នេះ ធ្វើឡើងបន្ទាប់ពីអ្នកជំនាញពីររូបនៅសហរដ្ឋអាមេរិក បានវាយតម្លៃថា វិស័យកាត់ដេរនៅកម្ពុជាអាចនឹងរលំ ប្រសិនបើបាត់បង់ផ្នែកខ្លះនៃ EBA។
លិខិតដដែលលើកឡើងថា ការដក EBA នេះ នឹងធ្វើឱ្យអ្នកបញ្ជាទិញគេចចេញពីការបញ្ជាទិញគ្រប់ផលិតផលពីកម្ពុជាដែលត្រូវបង់ពន្ធ ជាពិសេសផលិតផលទាំងអស់នៃវិស័យកាត់ដេរពីកម្ពុជា ហើយអ្នកបញ្ជាទិញនឹងងាកទៅបញ្ជាទិញពីប្រទេសដែលមាន EBA ពេញលេញវិញ៕