លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលគ្រោងបង្កើនការទម្លាក់ថវិកាជាង ១០០លានដុល្លារទៅជនបទ ដើម្បីជួយស្ដារជីវភាពប្រជាពលរដ្ឋកម្ពុជាឡើងវិញ ខណៈដែលកម្ពុជាកំពុងរងប៉ះផលពាល់ដោយសារវិបត្តិសុខភាពសកលដែលបង្កដោយវីរុសកូរ៉ូណា។
ក្នុងពិធីប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋ មានជីវភាពក្រីក្រ និងងាយរងគ្រោះដោយសារជំងឺកូវីដ១៩ នៅថ្ងៃនេះ លោកនាយករដ្ឋមន្ត្រី ហ៊ុន សែន ថ្លែងថា ការទម្លាក់ថវិកាទំហំដល់ទៅ ១០០លានដុល្លារទៅកាន់តំបន់ជនបទនេះ គឺដើម្បីផ្ដល់ភាពងាយស្រួលជូនប្រជាពលរដ្ឋក្នុងការពង្រីកប្រព័ន្ធស្រោចស្រពបង្កបង្កើនផល។
លោក ហ៊ុន សែន ថ្លែងថា៖ «១០០លានដុល្លារសាច់ប្រាក់ គឺផ្ដល់ជូនឱ្យប្រជាពលរដ្ឋរបស់យើង អាចធ្វើជាកូនប្រឡាយ ដើម្បីយកទឹកទៅស្រោចស្រព គាត់អាចនាំគ្នាជីកស្រះ ឬក៏ធ្វើនេះ ធ្វើនោះ ផលប្រយោជន៍បានទៅលើការអភិវឌ្ឍហេដ្ឋារចនាសម្ព័ន្ធជនបទផង និងទឹកប្រាក់ទាំងឡាយបានមកដល់នៅក្នុងហោប៉ៅរបស់ប្រជាពលរដ្ឋយើងផង»។
លោក ហ៊ុន សែន បន្តថា ឆ្នាំមុនៗ កម្ពុជានាំអង្ករចេញទៅក្រៅប្រទេសបានតែ ៤០ ទៅ ៥០ម៉ឺនតោនប៉ុណ្ណោះក្នុង ១ឆ្នាំ ប៉ុន្តែ ឆ្នាំនេះ ដោយសារ ជំងឺកូវីដ១៩ បានធ្វើឱ្យការនាំអង្ករចេញរបស់កម្ពុជាកើនឡើងជាបន្តបន្ទាប់ ពោលគឺឈានដល់ ៨០ម៉ឺនតោន ឬលើសពី ៨០ម៉ឺនតោនទៅទៀត។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានប្រាប់ថា រដ្ឋាភិបាលបានផ្ដល់ប្រាក់ចំនួន ៣០លានដុល្លារក្នុងមួយឆ្នាំ សម្រាប់ពង្រីកប្រព័ន្ធធារាសាស្ត្រ ប៉ុន្តែ ក្នុងឆ្នាំ២០២០នេះ ប្រមុខរដ្ឋាភិបាលដំឡើងដល់ ១០០លានដុល្លារ។ លោកបន្តថា ការដំឡើងថវិកាពង្រីកប្រព័ន្ធធារាសាស្ត្របន្ថែមនេះ អាចជួយបង្កើតការងារដល់ប្រជាពលរដ្ឋដែលបាត់បង់ការងារផងដែរ។
លោក មាស សុខសេនសាន ប្រាប់ថា៖ «យើងជួយដើម្បីឱ្យបងប្អូនកម្មករដែលបាត់បង់ការងារមួយចំនួន គាត់ទៅធ្វើស្រែចម្ការ ហើយខ្ញុំឃើញអ្វីដែលគឺគាត់ធ្វើស្រែបាន ៣ដងក្នុង១ឆ្នាំតាមប្រព័ន្ធថ្មីដែលយើងបានផ្ដល់លុយទៅដល់គាត់ ដើម្បីធ្វើប្រព័ន្ធធារាសាស្ត្រហ្នឹង មានធ្វើព្រែកធ្វើអីហ្នឹង គឺជួយមែនទែន ជួយដល់ប្រជាពលរដ្ឋផ្ទាល់តែម្ដង។ ថវិកាហ្នឹងទម្លាក់នៅថ្នាក់ក្រោមជាតិ មានន័យថា ខេត្តគាត់យកទៅប្រើ បើសិនដល់ស្រុក គឺស្រុកយកទៅប្រើ បើរឿងដល់ឃុំ គឺឃុំយកទៅប្រើ»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បង្ហាញការសាទរចំពោះការបន្ថែមថវិកាសម្រាប់ពង្រីកប្រព័ន្ធធារាសាស្ត្រនេះ ហើយលោកចង់ឱ្យរដ្ឋាភិបាលផ្ដល់ថវិកានេះទៅតំបន់ដែលមានបញ្ហាប្រឈមខ្លាំង។
លោក ថេង សារឿន ប្រាប់ថា៖ «កាលណាដោះស្រាយបញ្ហាប្រឈមមួយហ្នឹងបាន ខ្ញុំគិតថា វាជាឱកាសមួយក្នុងការជួយដល់កសិករដែលមានបញ្ហាប្រឈម ឬកង្វះទឹកហ្នឹង។ មួយទៀតជាការឆ្លើយតបហ្នឹង បែបទំនួលខុសត្រូវរបស់រដ្ឋក្នុងតួនាទី ក្នុងការបំពេញកាតព្វកិច្ចដោះស្រាយបញ្ហាជូនប្រជាពលរដ្ឋ [ពាក់ព័ន្ធនឹងបញ្ហាទឹក]។ ក្រៅពីបញ្ហាទឹក គឺបញ្ហាបច្ចេកទេស ឬទុនក្នុងការប្រើប្រាស់របស់កសិករ»។
បើតាមអគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ឱ្យដឹងកាលពីសប្ដាហ៍មុនថា រយៈពេល ៥ខែដើមឆ្នាំ២០២០ ការនាំអង្ករកម្ពុជាចេញទៅទីផ្សារអន្តរជាតិមានការកើនឡើងគួរឱ្យកត់សម្គាល់ ពោលគឺមានការកើនឡើងជាង ៤២ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៩៕
