អភិបាលខេត្តត្បូងឃ្មុំ បានអះអាងថា មន្ទីរពេទ្យមិត្តភាពកម្ពុជា-ចិនត្បូងឃ្មុំ នឹងសម្រេចបញ្ចប់ការសាងសង់ក្នុងឆ្នាំ២០២១ ដោយរំពឹងថា នៅពេលសាងសង់រួចរាល់ មន្ទីរពេទ្យនេះនឹងក្លាយជាមន្ទីរពេទ្យប្រចាំតំបន់បម្រើប្រជាជនខេត្តក្រចេះ រតនគិរី ស្ទឹងត្រែង និងមណ្ឌលគិរី។
គិតមកដល់ថ្ងៃទី២៥ ខែមិថុនានេះ មន្ទីរពេទ្យមិត្តភាពកម្ពុជា-ចិនត្បូងឃ្មុំ សាងសង់សម្រេចបានចំនួន ៨០ភាគរយ បន្ទាប់ពីគម្រោងសាងសង់បានចាប់ផ្តើមកាលពីថ្ងៃទី០១ ខែមីនា ឆ្នាំ២០១៩ តាមរយៈជំនួយឥតសំណងរបស់ប្រទេសចិន ដែលមានតម្លៃប្រមាណ ៥០លានដុល្លារអាមេរិក។
មន្ទីរពេទ្យនេះ សាងសង់លើផ្ទៃដីចំនួន ២៤ ៣០០ម៉ែត្រក្រឡា ដែលផ្ទៃអគារសរុបចំនួន ៥៥,៨១៥ម៉ែត្រក្រឡា ដោយមានបន្ទប់អ្នកជំងឺសរុប ៣០០។
អភិបាលខេត្តត្បូងឃ្មុំ លោក ជាម ច័ន្ទសោភ័ណ មានប្រសាសន៍ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រី នៅព្រឹកថ្ងៃទី២៥ ខែមិថុនានេះ ថា មន្ទីរពេទ្យនេះ នឹងចូលរួមចំណែកសំខាន់ក្នុងការបម្រើវិស័យសុខាភិបាលក្នុងតំបន់។
លោកថ្លែងថា៖ «យើងកំពុងតែសាងសង់មន្ទីរពេទ្យខ្នាតធំ ឬយើងអាចហៅបានថាខ្នាតយក្សនោះ ដែលជាថវិការបស់រាជរដ្ឋាភិបាលរបស់យើងជាមួយនឹងមិត្តចិនរបស់យើងនោះ គឺបាននឹងកំពុងសាងសង់បានប្រមាណជាង ៨០ភាគរយហើយ ដែលចំណាយថវិកាប្រមាណជា ៥០លានដុល្លារសហរដ្ឋអាមេរិក។ ចឹងយើងគិតថា មន្ទីរពេទ្យនេះ ថ្ងៃក្រោយអាចក្លាយជាមន្ទីរពេទ្យតំបន់ ដោយសារតែធំទូលំទូលាយ និងមានបំពាក់នូវសម្ភារបច្ចេកទេសល្អៗបន្ថែមទៀត»។
យុវតី សៅ ដាឡែន ជាប្រជាពលរដ្ឋរស់នៅក្នុងខេត្តត្បូងឃ្មុំ ដោយសព្វថ្ងៃជានិសិត្សបរិញ្ញាបត្រនៅសាកលវិទ្យាល័យមួយក្នុងរាជធានីភ្នំពេញ បានលើកឡើងថា នាងពិតជាមានភាពសប្បាយរីករាយចំពោះការសាងសង់មន្ទីរពេទ្យនេះ។
យុវតី សៅ ដាឡែន បានប្រាប់ថា កាលណាមានមន្ទីរពេទ្យ ផ្តល់ភាពងាយស្រួលដល់ប្រជាពលរដ្ឋនៅតំបន់នោះផ្ទាល់ អាចជួយជនរងគ្រោះបានទាន់ពេលវេលា មិនចាំបាច់បញ្ជូនមកខេត្តកំពង់ចាមនៅពេលដែលមិនទាន់មានមន្ទីរពេទ្យដូចពីមុនឡើយ។
កញ្ញា សៅ ដាឡែន បានថ្លែងថា៖ «ខ្លួនខ្ញុំផ្ទាល់មានការកោតសរសើរចំពោះអភិបាលខេត្ត និងថ្នាក់ដឹកនាំដទៃទៀត ក្នុងការគិតគូរដល់សុខុមាលភាពរបស់ប្រជាពលរដ្ឋ ហើយនេះក៏ជាមោទកភាពមួយចំពោះរូបនាងខ្ញុំផ្ទាល់ ក៏ដូចជាប្រជាពលរដ្ឋទាំងអស់ផងដែរ»។
បើតាមលោក ជាម ច័ន្ទសោភ័ណ បច្ចុប្បន្ន ខេត្តត្បូងឃ្មុំ មានមន្ទីរពេទ្យបង្អែកមានចំនួន ០៦ទីតាំង មណ្ឌលសុខភាពមានចំនួន ៧១ទីតាំង និងប៉ុស្តិ៍សុខភាពមានចំនួន ១ទីតាំង មានគ្រែអ្នកជំងឺចំនួន ៣៨០គ្រែ មានបុគ្គលិកពេទ្យសរុបចំនួន ៩៩៨នាក់ ក្នុងនោះ វេជ្ជបណ្ឌិតឯកទេស ចំនួន ៤នាក់ វេជ្ជបណ្ឌិតចំនួន ១០៥នាក់ គ្រូពេទ្យមធ្យម ចំនួន ១១នាក់ ឱសថការី ចំនួន ២២នាក់ ក្នុងការបម្រើវិស័យសុខាភិបាលក្នុងខេត្តទាំងមូល៕