ក្រុមភរិយារបស់អតីតមន្ត្រីបក្សប្រឆាំង បានស្វែងរកអន្តរាគមន៍ពីតុលាការ និងស្ថានទូតអាមេរិក នៅក្នុងកិច្ចប្រឹងប្រែងរបស់ពួកគេ ដើម្បីជំរុញឱ្យមានការដោះលែងស្វាមីរបស់ពួកគេដែលត្រូវបានចាប់ខ្លួនដាក់ឃុំនៅពន្ធនាគារ។
ស្ត្រីចំនួន ១០រូប ដែលអះអាងថាជាភរិយារបស់អតីតសកម្មជនគណបក្សសង្គ្រោះជាតិ បានប្រមូលផ្ដុំគ្នាលើកបដា និងតវ៉ានៅមុខសាលាដំបូងរាជធានីភ្នំពេញនៅព្រឹកថ្ងៃនេះ ដើម្បីទាមទារឱ្យតុលាការដោះលែងស្វាមីរបស់ពួកគេដោយគ្មានលក្ខខណ្ឌ។
វីអូឌីមិនអាចសុំការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និង លោក សួស វិទ្យារ៉ាឌី បានទេ ដោយទូរសព្ទចូល គ្មានអ្នកទទួល។
នៅអំឡុងពេលប្រមូលផ្ដុំមុខសាលាដំបូងរាជធានីភ្នំពេញ ក្រុមស្ត្រីទាំងនោះបានព្យាយាមលើកបដានានា ដែលបង្ហាញឈ្មោះស្វាមីរបស់ពួកគេ និងសរសេររៀបរាប់«សូមដោះលែងប្ដីខ្ញុំដោយឥតលក្ខខណ្ឌ» ប៉ុន្តែ ត្រូវបានចាប់យក និងហែកចោលដោយក្រុមសន្តិសុខខណ្ឌ៧មករាមានគ្នាប្រមាណ ១០នាក់ ដែលស្លៀកពាក់ស៊ីវិល និងមានកាន់វិទ្យុទាក់ទងនៅក្នុងដៃ។
ក្រុមសន្តិសុខខណ្ឌ៧មករា មិនបានឆ្លើយតបនឹងសំណួររបស់អ្នកសារព័ត៌មាននោះឡើយ នៅពេលមានការចោទសួរថា តើការតវ៉ារបស់ក្រុមស្ត្រីទាំងនោះ បានប៉ះពាល់អ្វីនោះ។
បន្ទាប់ពីតវ៉ានៅមុខសាលាដំបូងរាជធានីភ្នំពេញ ប្រហែល ២ម៉ោង ក្រុមស្ត្រីទាំងនោះ ក៏បាននាំគ្នាយកញត្តិមកដាក់នៅស្ថានទូតអាមេរិក ស្ថិតនៅក្បែរវត្តភ្នំវិញនៅព្រឹកថ្ងៃនេះ។ ក្រុមស្ត្រីទាំងនោះ បានព្យាយាមលើកបដាជាថ្មី ប៉ុន្តែ ត្រូវបានរារាំងដោយក្រុមបុរស ៤នាក់ ដែលស្លៀកពាក់ស៊ីវិល។
អ្នកស្រី សុខ បូលីម៉ា គឺជាភរិយាអតីតចៅសង្កាត់ផ្សារដេប៉ូ៣ ក្នុងរាជធានីភ្នំពេញ លោក ឃឹម ភាណា អាយុ ៥៥ឆ្នាំ ដែលត្រូវបានសមត្ថកិច្ចចាប់ខ្លួនដាក់ឃុំកាលពីថ្ងៃទី២ ខែមេសា។
អ្នកស្រី បូលីម៉ា បានប្រាប់ថា ពួកគាត់បាននាំគ្នារកកិច្ចអន្តរាគមន៍ពីសា្ថនទូតអាមេរិកឱ្យជួយ ដោយយល់ថា អាមេរិកជាប្រទេសប្រជាធិបតេយ្យ និងគោរពសិទ្ធិមនុស្ស។
អ្នកស្រី សុខ បូលីម៉ា ប្រាប់ថា៖ «ព្រោះ US ជាប្រជាធិបតេយ្យ ផ្ដល់សិទ្ធិឱ្យប្រជាពលរដ្ឋ ផ្ដល់សិទ្ធិឱ្យអ្នកនយោបាយទាំងអស់ ឱ្យមានសិទ្ធិ ហើយគាត់តែងតែឃ្លាំមើលការរំលោភសិទ្ធិមនុស្សទូទាំងពិភពលោក ដល់អ៊ីចឹង ខ្ញុំជាជនរងគ្រោះ ខ្ញុំសង្ឃឹមថា ទូតអាមេរិកនឹងជួយអន្តរាគមន៍ដល់ពួកខ្ញុំជនរងគ្រោះទាំង ១៥រូបហ្នឹង»។
អ្នកស្រី សំ ចិន្តា ជាភរិយារបស់លោក កែវ ថៃ ដែលជាអតីតប្រធានប្រតិបត្តិគណបក្សសង្គ្រោះជាតិនៅខេត្តកំពង់ឆ្នាំង និងជាគ្រូបង្រៀនមួយរូបផងដែរ។ លោក កែវ ថែ ត្រូវបានសមត្ថកិច្ចចាប់ខ្លួនដាក់ឃុំកាលពីថ្ងៃទី២៧ ខែមីនា ក្រោមការចោទប្រកាន់ពីបទញុះញង់។
អ្នកស្រី សំ ចិន្ដា ប្រាប់ថា ចាប់តាំងពីសមត្ថកិច្ចចាប់ខ្លួនស្វាមីមក គ្រួសាររបស់គាត់ជួបបញ្ហាជីវភាពខ្លាំង ដោយសារប្រាក់ខែគ្រូរបស់ស្វាមី ត្រូវក្រសួងអប់រំឈប់បើកឱ្យបន្តទៀតចាប់ពីខែមេសាកន្លងមក។ អ្នកស្រីបន្តថា អ្នកស្រី និងអ្នកដទៃទៀត បានស្វែងរកការអន្តរាគមន៍ពីស្ថានទូតអាមេរិក ក្រោយពីគ្មានសង្ឃឹមថា រដ្ឋាភិបាលនឹងដោះលែងស្វាមីរបស់ពួកគាត់។
អ្នកស្រី សំ ចិន្ដា ប្រាប់ថា៖ «[សូម្បីតែលើកបដា មិនឱ្យលើក] បដាហ្នឹងគ្មានសរសេរពីរឿងអីសោះ គ្រាន់តែសូមដោះលែងប្ដីខ្ញុំឱ្យមានសេរីភាព ព្រោះគាត់អត់មានធ្វើអីខុសផង គ្រាន់តែពាក្យប៉ុណ្ណឹង ដកយករបស់គ្នា។ អ៊ីចឹង [មិន]ដឹងរកយុត្តិធម៌ម៉េចកើត? អ៊ីចឹងបានខ្ញុំមកដល់ហ្នឹងរកអន្តរាគមន៍ពីទូត ឱ្យគាត់ជួយអន្តរាគមន៍ទៅដល់រដ្ឋាភិបាលឱ្យដោះលែងប្ដីខ្ញុំ ព្រោះគាត់អត់មានខុសអី ហើយការដោះលែងនេះ អត់មានលក្ខខណ្ឌទេ»។
មន្ត្រីកិច្ចការសាធារណៈនៃស្ថានទូតអាមេរិកប្រចាំនៅកម្ពុជា លោក Arend C. Zwartjes បានឆ្លើយតបវីអូឌីតាមសារអេឡិចត្រូនិចនៅថ្ងៃនេះថា ស្ថានទូតបានទទួលរួចហើយនូវញត្តិរបស់ក្រុមស្ត្រីជាភរិយារបស់អតីតសកម្មជនបក្សប្រឆាំង។
មន្ត្រីស្ថានទូតអាមេរិករូបនេះ ប្រាប់ថា រដ្ឋាភិបាលអាមេរិកមានក្ដីបារម្ភខ្លាំងចំពោះការធ្វើទុក្ខបុកម្នេញទៅលើអតីតបក្សប្រឆាំងនាពេលថ្មីៗនេះពីសំណាក់រដ្ឋាភិបាលកម្ពុជា ហើយអាមេរិកក៏បានអំពាវនាវទៅគ្រប់ភាគីទាំងអស់ឱ្យដើរលើផ្លូវជជែកពិភាក្សាគ្នាដោយសន្តិវិធី។
លោក Arend C. Zwartjes សរសេរតាមអ៊ីម៉ែលថា៖ «យើងព្រួយបារម្ភយ៉ាងជ្រាលជ្រៅទៅលើការចាប់ខ្លួន ការគំរាមកំហែង និងការធ្វើទុក្ខបុកម្នេញនាពេលថ្មីៗនេះ ទៅលើគណបក្សប្រឆាំងពីសំណាក់រដ្ឋាភិបាលកម្ពុជា។ យើងអំពាវនាវទៅគ្រប់ភាគីទាំងអស់ឱ្យអនុវត្តដំណើរការការជជែកគ្នាដោយសន្តិវិធី ប្រកបដោយខ្លឹមសារ និងការផ្សះផ្សាជាតិ»។
មេធាវីការពារក្ដីឱ្យអតីតសកម្មជន និងអ្នកគាំទ្របក្សប្រឆាំង លោក សំ សុគង់ ឱ្យដឹងថា គិតចាប់តាំងពីខែមករាដើមឆ្នាំនេះមក សកម្មជន និងអ្នកគាំទ្របក្សប្រឆាំងចំនួន ១៤រូបហើយ ត្រូវបានសមត្ថកិច្ចចាប់ខ្លួន និងត្រូវបានចោទប្រកាន់ថា បានរួមគំនិតក្បត់ ឬការចោទប្រកាន់ពីបទញុះញង់ជាដើម។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលបានតាមដានករណីនេះ ជំរុញទៅរដ្ឋាភិបាលឱ្យដោះលែងគ្រួសារអតីតគណបក្សប្រឆាំងឱ្យមានសេរីភាពវិញ ដើម្បីទទួលបានប្រព័ន្ធអនុគ្រោះពន្ធពីសហគមន៍អន្តរជាតិជាដើម។ លោកបន្តថា ការឃុំខ្លួនអតីតមន្ត្រីបក្សប្រឆាំងនៅពន្ធនាគារនោះ មិនបានចំណេញអ្វីដល់រដ្ឋាភិបាលទេ ប៉ុន្តែ វានឹងធ្វើឱ្យប៉ះពាល់ដល់មុខមាត់ប្រទេសកម្ពុជាក៏ដូចជារដ្ឋាភិបាលផងដែរ។
លោក ស៊ឹង សែនករុណា ប្រាប់ថា៖ «រកវិធីចរចារបៀបណា ដើម្បីឱ្យមានស្ថានភាពធូរស្រាលផ្នែកនយោបាយ រួមទាំងទទួលបានផលប្រយោជន៍សម្រាប់សង្គមជាតិជារួមផង ទាំងប្រព័ន្ធអនុគ្រោះពន្ធ ការដាក់សម្ពាធផ្សេងៗទៀតពីបណ្ដាប្រទេសលោកសេរី ដែលយើងមើលឃើញនាពេលកន្លងមកជាបន្តបន្ទាប់។ អ៊ីចឹង គួរតែបន្ធូរភាពតានតឹងហើយ ព្រោះប្រជាពលរដ្ឋកំពុងរងគ្រោះកូវីដ១៩ ហើយអ្នកដែលមានគ្រួសារចាប់ខ្លួនកាន់តែមានស្ថានភាពលំបាក អ្នកទាំងអស់ហ្នឹងគាត់បែកបាក់គ្រួសារ បាត់មុខរបរអ៊ីចឹង»៕
