អ្នកនាំពាក្យក្រសួងបរិស្ថាន អះអាងថា មិនទាន់ចាប់បានជនល្មើសដែលសម្លាប់សត្វខ្ទីងក្នុងតំបន់ការពារព្រៃធម្មជាតិ ខេត្តព្រះវិហារ និងពោធិ៍សាត់ បាននៅឡើយទេ ដោយថា សមត្ថកិច្ចកំពុងស្រាវជ្រាវ។
តាមការបង្ហោះលើទំព័រហ្វេសប៊ុករបស់ក្រសួងបរិស្ថាន សត្វខ្ទីង១ក្បាល មានអាយុ ៥ឆ្នាំ រស់នៅក្នុងដែនជម្រកសត្វព្រៃព្រះរការ ខេត្តព្រះវិហារ ត្រូវបានជនល្មើសសម្លាប់ដោយការបាញ់នឹងកាំភ្លើងច្នៃ ហើយត្រូវបានអាជ្ញាធរល្បាតរកឃើញកាលពីថ្ងៃទី២១-២៣ ខែឧសភា ឆ្នាំ២០២០។
ដោយឡែក កាលពីថ្ងៃទី២៣ ខែមិថុនា ឆ្នាំ២០២០ សត្វខ្ទីងមួយក្បាលរស់នៅក្នុងដែនការពារសត្វព្រៃភ្នំសំកុស តាមជួរភ្នំក្រវាញ ខេត្តពោធិ៍សាត់ ក៏បានជាប់អន្ទាក់ព្រានព្រៃរហូតបាត់បង់ជីវិត។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានប្រាប់វីអូឌីនៅព្រឹកថ្ងៃនេះថា ក្រសួងកំពុងធ្វើការស៊ើបអង្កេតករណីទាំងពីរនេះ។ លោកបានស្នើឱ្យប្រជាពលរដ្ឋដែលមានព័ត៌មានពាក់ព័ន្ធនឹងជនល្មើស រាយការណ៍ជូនសមត្ថកិច្ច ដើម្បីឈានដល់ការចាប់ខ្លួនជនល្មើសទាំងនោះ។
លោក នេត្រ ភក្ត្រា មានប្រសាសន៍ថា មន្ត្រីឧទ្យានុរក្សចំនួន ១,២៦០នាក់ កំពុងសហការជាមួយសហគមន៍ក្នុងតំបន់ការពារធម្មជាតិនានា ចុះល្បាតទប់ស្កាត់បទល្មើស ព្រមទាំងធ្វើការអប់រំដល់ប្រជាសហគមន៍ឱ្យការពារតំបន់ជម្រកសត្វព្រៃ។
លោកថ្លែងបន្តថា៖ «យើងនឹងរឹតបន្តឹងការអនុវត្តច្បាប់បន្ថែមទៀត សម្រាប់ជនទាំងឡាយណាដែលប្រព្រឹត្តបទល្មើសដូចជា ការជួញដូរសត្វព្រៃ បាញ់សត្វព្រៃជាដើម និងបន្តការប្រឹងប្រែងការពារទៅលើសត្វកម្រផ្សេងៗដោយយកចិត្តទុកដាក់ខ្ពស់បំផុត»។
សកម្មជនការពារបរិស្ថាន លោក សាន់ មេឡា ប្រាប់វីអូឌីនៅរសៀលនេះថា សត្វព្រៃជាច្រើន ក៏ដូចជា សត្វកម្រ និងជិតផុតពូជដទៃទៀត កំពុងរងការគំរាមកំហែង និងសម្លាប់ដោយសារ សកម្មភាពកាប់បំផ្លាញព្រៃឈើខុសច្បាប់ ការបរបាញ់ សំឡេងរណារអារឈើ សំឡេងម៉ូតូ ក៏ដូចជាការបាត់បង់ទីជម្រកជាដើម។
លោកបន្តថា៖ «បើសិនក្រសួងមិនមានការប្រែចំណាត់ការទេ ខ្ញុំជឿថា ព្រៃឈើ សត្វព្រៃ នឹងបន្តបាត់បង់ ព្រោះអ្វីដែលយើងមើលឃើញស្រាប់ គឺគ្រាន់តែជាការបង្ការ និងពន្យារពេល ដោយមិនអាចបញ្ឈប់ការកាប់បំផ្លាញព្រៃឈើ បរបាញ់សត្វ ដូច្នេះ ថ្ងៃណាមួយនឹងបាត់បង់»។
បើតាមអ្នកនាំពាក្យក្រសួងបរិស្ថាន ក្នុងរយៈពេល ៦ខែដើមឆ្នាំ២០២០នេះ សត្វកម្រក្នុងប្រទេសកម្ពុជា ចំនួន ២ប្រភេទ ត្រូវបានសម្លាប់ ក្នុងនោះរួមមាន សត្វទន្សោងចំនួន ១០ក្បាល ដោយ ៦ក្បាលក្នុងតំបន់អភិរក្សព្រៃសហគមន៍សង្ឃរុក្ខវ័ន្ត ខេត្តឧត្តរមានជ័យ ១ក្បាលក្នុងខេត្តកំពង់ស្ពឺ ៣ក្បាលទៀតក្នុងខេត្តមណ្ឌលគិរី និងសត្វខ្ទីងចំនួន ២ក្បាលនៅពោធិ៍សាត់ និងព្រះវិហារ៕
