ក្រសួងសុខាភិបាលបានប្រកាសថា រកឃើញអ្នកមានផ្ទុកមេរោគកូវីដ១៩ចំនួន ៩នាក់បន្ថែមទៀត នាំឱ្យកម្ពុជាមានអ្នកផ្ទុកមេរោគនេះទាំងអស់នៅទូទាំងប្រទេសកើនដល់ ១៣៩នាក់។
តាមសេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃសៅរ៍នេះ បានឱ្យដឹងថា អ្នកមានមេរោគកូវីដ១៩ចំនួន៩នាក់នេះ មានជនជាតិខ្មែរចំនួន៨នាក់ និងជនជាតិឥណ្ឌូនេស៊ីចំនួន១ម្នាក់។ ក្រសួងបញ្ជាក់ថា អ្នកទាំងអស់ធ្វើដំណើរតាមយន្តហោះផ្ទាល់មកពីប្រទេសឥណ្ឌូនេស៊ីមកកម្ពុជា កាលពីថ្ងៃទី២៥ ខែមិថុនា ដែលនៅលើយន្តហោះនោះមានអ្នកជិះសរុបចំនួន៤០នាក់។
របាយការណ៍របស់ក្រសួងសុខាភិបាលបញ្ចាក់ថា គិតត្រឹមថ្ងៃទី២៦ខែមិថុនា អ្នកមានមេរោគកូវីដ១៩សរុបមានចំនួន១៣៩នាក់ ក្នុងនោះបានព្យាបាលជាសះស្បើយបានចំនួន១២៩នាក់៕
