សាលារៀនអន្តរជាតិឃីដខាសល( Kid Castle International School)នៅថ្ងៃនេះ ប្រកាសបង្ខំចិត្តបិទទ្វារភ្លាមៗក្រោមមូលហេតុថា មិនអាចទ្រាំទ្រនឹងការចំណាយទៅលើថ្លៃជួលអគារ (ពេញ១០០%) ជារៀងរាល់ខែ និងប្រាក់ឧបត្ថម្ភបុគ្គលិកបានទេ។
បន្ទាប់ពីវិបត្តិសុខភាពពិភពលោកកំពុងប្រឈមមុខខ្លាំងដល់បញ្ហាសេដ្ចកិច្ចកម្ពុជា នៅថ្ងៃនេះ សាលារៀន អន្តរជាតិឃីដខាសល( Kid Castle International School) បានចេញសេចក្តីប្រកាសជូនដំណឹង ដល់សាធារណជនថា សាលារៀន នឹងបិទជាអចិន្ត្រៃយ៍ដែលមានទីតាំងស្ថិតនៅអគារលេខ95-97 ផ្លូវលេខ7 បុរីពិភពថ្មី សង្កាត់ដង្កោ ខណ្ឌដង្កោ ចាប់ពីថ្ងៃទី០១ ខែកក្កដា ឆ្នាំ២០២០ ដោយសារក្ស័យធន។
យោងតាមការប្រកាសដដែលបានអោយដឹងថា សាលាកំពុងរុះរើចេញពីអគារសាលារៀនដែលមានបច្ចុប្បន្ន ហើយផែនការអនាគតរបស់សាលានឹងស្វែងរកទីតាំងថ្មីសំរាប់ការរៀបចំសាលារៀនឡើងវិញនៅក្នុងពេលវេលាដ៏សក្តិសមខាងមុខ។
នាយិកាសាលារៀនខាងលើបានថ្លែងក្នុងសេចក្តីជូនដំណឹងថា៖« យើងមានការសោកស្តាយ និងឈឺចាប់ផ្លូវចិត្តយ៉ាងខ្លាំង ហើយធ្វើការសំរេចចិត្តដ៏លំបាកបំផុត។ ដើម្បីរក្សា និងទ្រទ្រង់ជីវិតសាលារៀនអន្តរជាតិឃីដខាសលនេះ ខ្ញុំបានតស៊ូព្យាយាមយ៉ាងលំបាកអស់ពីលទ្ធភាពចាប់តាំងពីពាក់កណ្តាលខែមិនា រហូតមកដល់បច្ចុប្បន្ន»។
នាយិការបន្តថា ការចំណាយធនធានហិរញ្ញវត្ថុមានជាប្រចាំខែ ឯការរង់ចាំឱ្យមានការបើកសាលារៀនឡើងវិញគ្មានកាលកំណត់ច្បាស់លាស់ ហើយក៏គ្មានការជួយឧបត្ថម្ភទ្រទ្រង់ ឬការយល់យោគពីភាគីពាក់ព័ន្ធណាមួយឡើយ [ភាគីពាក់ព័ន្ធ មិនសំដៅទៅលើអាណាព្យាបាលសិស្សឡើយ]។
អ្នកនាំពាក្យក្រសួងអប់រំលោក រស់ សុវាចា ថ្លែងថា ជំហររបស់ក្រសួង ក៏ដូចជា រដ្ឋាភិបាលអំពាវនាវឱ្យថ្នាក់គ្រប់គ្រងសាលារៀន និង ម្ចាស់អគារត្រូវចរចារកដំណោះស្រាយរួមដែលអាចទទួលយកបានទាំងអស់គ្នា។
លោក រស់ សុវាចា៖«ក្រសួងអប់រំយុវជន និងកីឡា បន្តលើកទឹកចិត្តឱ្យមានការចរចាដោយសន្តិវិធីរវាងគ្រឹះស្ថានសិក្សាឯកជន និងគ្រប់ភាគីពាក់ព័ន្ធ នៅក្នុងការវិនិយោគរបស់គាត់ដើម្បីបន្តឱ្យមានការចូលរួមជាមួយរាជរដ្ឋាភិបាល ក្នុងការចូលរួមគ្រប់គ្រង បង្ការ និងទប់ស្កាត់ការឆ្លងរាលដាលមេរោគកូវីដ១៩នេះ»។
បើតាមប្រសាសន៍លោកនាយករដ្ឋមន្ត្រី ហ៊ុន សែនថ្លែងក្នុងពិធីប្រកាសដាក់ឱ្យដំណើរការជាផ្លូវការ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និង ងាយរងគ្រោះ ក្នុងអំឡុងពេលជំងឺកូវីដ-១៩ នៅព្រឹកថ្ងៃទី ២៤ ខែ មិថុនា នេះថា លោកពិតជាមិនចង់ឃើញគ្រឹះស្ថានអប់រំឯកជនណាមួយដួលរលំនោះឡើយ។
លោកនាយករដ្ឋមន្ត្រី បានមានប្រសាសន៍ទៀតថា លោកបានស្នើឲ្យក្រសួងហិរញ្ញវត្ថុបន្តធ្វើការជាមួយធនាគារ រៀបចំឥណទានឡើងវិញ ដើម្បីផ្តល់លទ្ធភាពដល់គ្រឹះស្ថានឯកជន អាចមានឱកាសខ្ចីថវិកាក្នុងការអភិវឌ្ឍកម្មវិធីបង្រៀនតាម “ Online” ព្រោះមានសាលារៀនឯកជនជាច្រើន ដែលមិនបានរៀបចំកម្មវិធីបង្រៀន Online បង្រៀនសិស្សានុសិស្ស ឲ្យទាន់សភាពការណ៍កូវីដបច្ចុប្បន្ន៕