រដ្ឋាភិបាលសហរដ្ឋអាមេរិក ផ្តល់ជំនួយឥតសំណងប្រមាណ៥៦លានដុល្លារជូនដល់រាជរដ្ឋាភិបាលប្រទេសកម្ពុជាសម្រាប់បម្រើលើវិស័យចំនួន៤រូមមានវិស័យអប់រំ សុខាភិបាល កសិកម្ម និងបរិស្ថាន។
កាលពីថ្ងៃទី២៥ ខែមិថុនា ឆ្នាំ២០២០ ក្រុមប្រឹក្សាអភិវឌ្ឍន៍កម្ពុជា(CDC) និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍ (USAID)បានចុះហត្ថលេខា ដោយរដ្ឋាភិបាលសហរដ្ឋអាមេរិកផ្តល់ថវិកាចំនួន៥៦លានដុល្លារមកប្រទេសកម្ពុជា ក្នុងនោះថវិកាចំនួន៣៨លានដុល្លារ សម្រាប់បម្រើលើវិស័យសុខាភិបាល និងវិស័យអប់រំ។ ដោយឡែកថវិកាចំនួន១៨លានដុល្លារបន្ថែមទៀត សម្រាប់បម្រើលើវិស័យកសិកម្ម និងបរិស្ថាន។
លោក ជិនប៊ុនស៊ាន ទេសរដ្ឋមន្ត្រីទទួលបន្ទុកបេសកម្មពិសេស និងជាអនុប្រធានក្រុមប្រឹក្សាអភិវឌ្ឍន៍កម្ពុជា មានប្រសាសន៍ ការបន្តកិច្ចសហប្រតិបត្តិការអភិវឌ្ឍទេ្វភាគីនេះគឺជាសសរស្តម្ភសំខាន់ក្នុងការលើកកម្ពស់ និងពង្រើកកិច្ចសហប្រតិបត្តិការ និងភាពជាដៃគូរវាង ប្រទេសទាំងពីរ។
តាមរយះកិច្ចសហការរវាងរដ្ឋាភិបាលសហរដ្ឋអាមេរិក និងរាជរដ្ឋាភិបាលកម្ពុជា លោកW.Patrick Murphy ឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាមេរិកបានថ្លែងថា រដ្ឋាភិបាលសហរដ្ឋមេរិកប្តេជ្ញាបន្តការគាំទ្ររបស់ខ្លួនចំពោះប្រជាជនកម្ពុជា ក្នុងការសម្រេចអោយបាននូវការអភិវឌ្ឍសង្គម សេដ្ឋកិច្ចប្រកបដោយចីរភាព បរិយាបន្ន និងសមធម៌។
គិតចាប់ពីខែមីនាឆ្នាំ២០១៦ រហូតដល់ការហត្ថលេខាលើកនេះទៀត សហរដ្ឋអាមេរិកបានផ្តល់ជំនួយឥតសំណងចំនួន២៥៣លានដុល្លារដល់កម្ពុជាលើវិស័យទាំង៤រួមមានវិស័យអប់រំ សុខាភិបាល កសិកម្ម និងបរិស្ថាន។ ដោយឡែកពាក់ព័ន្ធការប្រយុទ្ធប្រឆាំងមេរោគកូវីដ១៩ឆ្នាំចាប់ពីខែមីនាឆ្នាំ២០២០មក សហរដ្ឋអាមេរិកជួយកម្ពុជាចំនួន១១លានដុល្លារអាមេរិក។ សូមបញ្ចាក់ថារដ្ឋាភិបាលសហរដ្ឋអាមេរិកបានផ្តល់ការគាំទ្រមកប្រទេសកម្ពុជាប្រមាណជាង១ពាន់លានដុល្លារ នេះបើគិតចាប់តាំងពីឆ្នាំ១៩៩៤មកទល់បច្ចុប្បន្ន៕