ធនាគារពិភពលោកបានសម្រេចអនុម័តឥណទាន៩៣លានដុល្លារជួយកម្ពុជាលើគម្រោង បង្កើនសុវត្ថិភាពសិទ្ធកាន់កាប់ដីធ្លី ការទទួលបានហេដ្ឋារចនាសម្ព័ន្ធ និងសេវាកសិកម្ម ដល់កសិករក្រីក្រ ព្រមទាំងសហគមន៍ជនជាតិដើមភាគតិច។
កាលពីថ្ងៃទី២៦ មិថុនា ឆ្នាំ២០២០ ធនាគារពិភពលោកបានចេញលិខិតមួយច្បាប់បញ្ជាក់ថា ក្រុមប្រឹក្សាភិបាលនៃធនាគារនេះ បានអនុម័តឥណទាន៩៣លានដុល្លារពីសមាគមអភិវឌ្ឍន៍អន្តរជាតិ(IDA) ដោយគ្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣ (LASED III) នៅប្រទេសកម្ពុជាដោយគ្រប់ដណ្តប់លើសហគមន៍ និងទីតាំងចំនួន៧១កន្លែងក្នុងខេត្តទាំងអស់លើកលែងរាជធានីភ្នំពេញ។
គម្រោង៩៣លានដុល្លាររបស់ធនាគារពិភពលោកពី(IDA) អាចជួយអោយប្រជាកសិករខ្នាតតូច ព្រមទាំងសហគមន៍ជនបទមានលទ្ធភាពប្រើប្រាស់ដីធ្លី និងធនធានធម្មជាតិ តាមរបៀបមួយមានចីរភាព និងឋិតថេរយូរអង្វែង ដោយថាគម្រោងនេះនិងអាចជួយកាត់បន្ថយភាពក្រីក្រ ព្រមទាំងលើកកម្ពស់សិទ្ធិកាន់កាប់ដីធ្លីរបស់ជនជាតិដើមភាគតិច។
លោកស្រី អ៊ុនហ្គូណា ដូប្រាចា នាយកគ្រប់គ្រងធនាគារពិភពលោកប្រចាំនៅកម្ពុជា មានប្រសាសន៍ថា លទ្ធភាពទទួលបានដីធ្លី និងការផ្តល់សេវាកម្មនិងការបណ្តុះបណ្តាលបច្ចេកទេសសកសិកម្មដើម្បីបង្កើនផលិតភាពកសិកម្មក៏ដូចជា ការទទួលបានសេវាសាធារណៈល្អប្រសើរ គឺពិតជាមានសារៈសំខាន់ខ្លាំងណាស់សម្រាប់ប្រជាជនក្រីក្រដែលរស់នៅតាមទីជនបទ។
លោកស្រី អ៊ុនហ្គូណា ដូប្រាចា បន្តទៀតថា គម្រោង LASED ជំហាន៣ នឹងបន្តជួយរដ្ឋាភិបាលក្នុងការផ្តល់ដីធ្លី និងសិទ្ធិកាន់កាប់ដីធ្លីដល់គ្រួសារគ្មានដីនិងគ្រួសារខ្វះដី និងធានាអោយមានសន្តិសុខផ្នែកសិទ្ធិកាន់កាប់ដីធ្លីសម្រាប់សហគមន៍ជនជាតិដើមភាគតិច នៅតាមតំបន់គោលដៅរបស់គម្រោងនេះ។
យោងទៅតាមលិខិតចេញដោយធនាគារពិភពលោកបានអោយដឹងថា គម្រោងបែកចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣ និងកាន់តែល្អប្រសើរជាងមុនដោយគម្រោងនេះនិងជួយដល់ការកសាងផ្លូវលំជនបទ ប្រព័ន្ធធារាសាស្ត្រខ្នាតតូច ការផ្គត់ផ្គង់ទឹកស្អាត អគារសាលារៀន ជាពិសេសការទទួលបានជំនួយសម្រាប់ការដាំដុះដំណាំ ក្នុងនោះមានគ្រាប់ពូជជាដើម។
ក្នុងឆ្នាំ២០១៨គម្រោងជំហាន១ និង២បានជួយដល់ការអភិវឌ្ឍន៍ផ្លូវជនបទ ប្រព័ន្ធធារាសាស្ត្រខ្នាតតូច សាងសង់សាលាបឋមសិក្សា ប៉ុស្តិសុខភាព បច្ចេកទេសដាំដុះ ព្រមទាំងបានជោគជ័យលើការបែកចែកដីចំនួន១៧០០០ហិកតា សម្រាប់សង់លំនៅឋាន ដាំដុះ ដល់គ្រួសារគ្មានដីខ្វះជីចំនួន៥០០០គ្រួសារ ក្នុងនោះ៣៣៦០គ្រួសារបានបណ្ណកម្មសិទ្ធិដីធ្លីរួចរាល់៕ អោយអ
