តំណាងជនជាតិដើមភាគតិច និងសង្គមស៊ីវិលនៅខេត្តមណ្ឌលគិរី ជំរុញតុលាការកោះហៅអ្នកពាក់ព័ន្ធមួយចំនួនទៀតដែលបានឃុបឃិតគ្នារំលោភដីរដ្ឋ ក្រៅពីមន្ត្រីជាន់ខ្ពស់ម្នាក់នៅក្រសួងយុត្តិធម៌។
អ្នកនាំពាក្យអយ្យការអមសាលាដំបូងរាជធានីភ្នំពេញ លោក គុជ គឹមឡុង ប្រាប់ក្រុមអ្នកសារព័ត៌មានតាមតេឡេក្រាមថា អតីតអនុរដ្ឋលេខាធិការក្រសួងយុត្តិធម៌ លោក សេង សុវណ្ណារ៉ា ត្រូវបានចោទប្រកាន់ដោយតុលាការ ៤បទល្មើស រួមមាន បទឆបោកមានស្ថានទម្ងន់ទោស បទកាន់កាប់អាវុធគ្មានលិខិតអនុញ្ញាត បទសម្លុតកុំឱ្យមានការប្តឹងផ្តល់ និងបទរំលោភទ្រព្យសម្បត្តិសាធារណៈ។
បើតាមលោក គុជ គឹមឡុង លោក សេង សុវណ្ណារ៉ា ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួននៅពន្ធនាគារបណ្ដោះអាសន្នកាលពីថ្ងៃទី២៧ ខែមិថុនា ពីបទរំលោភយកទ្រព្យសម្បត្តិរដ្ឋសាធារណៈដោយខុសច្បាប់។
កាលពីថ្ងៃទី២ ខែមករា ឆ្នាំ២០១៩ អភិបាលខេត្តមណ្ឌលគិរី លោក ស្វាយ សំអ៊ាង បានចេញលិខិតឱ្យអនុរដ្ឋលេខាធិការក្រសួងយុត្តិធម៌ លោក សេង សុវណ្ណារ៉ា កាន់កាប់ដីធ្លីទំហំជិត ១ពាន់ហិកតា ស្ថិតនៅភូមិអន្ត្រេះ ឃុំអរបួនលើ នៅស្រុកកោះញែក ប៉ុន្តែ អភិបាលខេត្តរូបនេះ បានលុបចោលការទទួលសិទ្ធិកាន់កាប់ដីធ្លីនេះវិញ បន្ទាប់ពីរកឃើញថា ដីនោះស្ថិតនៅក្នុងដែនអភិរក្សគ្រប់គ្រងដោយក្រសួងបរិស្ថាន។
អ្នកប្រឹក្សាយោបល់សម្រាប់សហគមន៍ជនជាតិដើមភាគតិចនៅខេត្តមណ្ឌលគិរី លោក គ្រើង តុលា លើកឡើងថា អាជ្ញាធរមូលដ្ឋានប្រាកដជាដឹងច្បាស់ថា ដីជិត ១,០០០ហិកតាដែលលោក សេង សុវណ្ណារ៉ា ស្នើសុំកាន់កាប់នោះ ជាដីស្ថិតក្នុងតំបន់អភិរក្ស ប៉ុន្តែ អាជ្ញាធរទាំងនោះនៅតែចុះហត្ថលេខាឱ្យលោកកាន់កាប់ទៀត។ លោកស្នើទៅតុលាការកោះហៅអាជ្ញាធរមូលដ្ឋាន និងអ្នកពាក់ព័ន្ធផ្សេងទៀតមកសាកសួរផងដែរ។
លោក គ្រើង តុលា ប្រាប់ថា៖ «ក្នុងលិខិតហ្នឹង គឺមានអាជ្ញាធរភូមិ ឃុំ ស្រុក ខេត្ត ជាអ្នកចុះហត្ថលេខា។ អ៊ីចឹងយើងគិតថា មិនគួរជាប់តែលោក សេង សុវណ្ណារ៉ា ម្នាក់ទេ គួរជាប់អ្នកពាក់ព័ន្ធទាំងអស់ ពីព្រោះចុះហត្ថលេខាមួយៗ គឺមានសេវាអីត្រឹមត្រូវរបស់គេ។ ចំណុចទាំងអស់ហ្នឹងដែលគិតថា បើមិនដាក់ទោសអ្នកទាំងអស់ហ្នឹងទេ វាអយុត្តិធម៌សម្រាប់លោក សេង សុវណ្ណារ៉ា»។
មន្ត្រីសម្របសម្រួលសមាគមអាដហុកប្រចាំខេត្តមណ្ឌលគិរី លោក អ៊ាង ម៉េងលី គាំទ្រចំពោះការសម្រេចរបស់តុលាការ ប៉ុន្តែ លោកក៏ជំរុញទៅតុលាការចាត់វិធានការអ្នកពាក់ព័ន្ធផ្សេងទៀតនៅក្នុងករណីនេះដែរ។
លោក អ៊ាង ម៉េងលី ប្រាប់ថា៖ «ប្រសិនបើរកឃើញថា បុគ្គល ឬអាជ្ញាធរដែលពាក់ព័ន្ធក្នុងការឃុបឃិតរំលោភយកដីរដ្ឋ តុលាការគួរតែមានវិធានការផ្លូវច្បាប់ ដើម្បីអនុវត្តឱ្យមានប្រសិទ្ធភាព ចៀសវាងអនុវត្តតែបុគ្គលម្នាក់ ព្រោះខ្ញុំសង្កេតឃើញថា ការរំលោភដីរដ្ឋ គឺវាលក្ខណៈជាប្រព័ន្ធ។ អ៊ីចឹងបើអនុវត្តតែម្នាក់ អ៊ីចឹងមិនតម្លាភាពក្នុងការអនុវត្តច្បាប់ទេ»។
វីអូឌីបានទូរសព្ទ និងផ្ញើសំណួរតាមប្រព័ន្ធតេឡេក្រាមទៅអ្នកនាំពាក្យអយ្យការអមសាលាដំបូងរាជធានីភ្នំពេញ លោក គុជ គឹមឡុង ដើម្បីសុំសាកសួរបន្ថែម ប៉ុន្តែ មកដល់ពេលនេះ លោកមិនទាន់ឆ្លើយតបនៅឡើយ។
វីអូឌីមិនអាចទាក់ទងសុំការបញ្ជាក់បន្ថែមពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និងលោក សួស វិទ្យារ៉ាឌី បានទេ ដោយទូរសព្ទចូល គ្មានអ្នកទទួល។
លោក សេង សុវណ្ណារ៉ា ត្រូវបានដកហូតពីតំណែងអនុរដ្ឋលេខាធិការក្រសួងយុត្តិធម៌កាលពីថ្ងៃទី២៤ ខែសីហាឆ្នាំមុន តែ១០ថ្ងៃប៉ុណ្ណោះក្រោយពីត្រូវបានលោក ស ខេង សម្រេចដកចេញពីសមាជិកក្រុមការងារថ្នាក់ជាតិចុះមូលដ្ឋាននៅខេត្តមណ្ឌលគិរី ដោយដាក់លោក មាស ប្រុស ប្រធានរដ្ឋបាលសាលាដំបូងខេត្តមណ្ឌលគិរីជំនួសវិញ៕
