គណបក្សប្រជាធិបតេយ្យមូលដ្ឋាន (គ ប ម) អំពាវនាវដល់រដ្ឋាភិបាលឱ្យសាងសង់ស្តូប ឬរូបសំណាក ដើម្បីរំឭកគុណដល់វីរបុរសខ្មែរដែលបានលះបង់ ការពារជាតិមាតុភូមិ ប្រសើរជាងការខំកៀរគរថវិកាសាងសង់ស្តូបរំឭកគុណវៀតណាម។
គណបក្សប្រជាធិបតេយ្យមូលដ្ឋាន បានសរសេរសារលើហ្វេសប៊ុករបស់ខ្លួនកាលពីថ្ងៃទី២៧ ខែមិថុនា ដោយអំពាវនាវឱ្យរដ្ឋាភិបាលសាងសង់ស្តូប ឬរូបសំណាករំឭកគុណវីរបុរសខ្មែរ ដាក់តំណាងនៅតាមខេត្ត ឬតំបន់។
គ ប ម៖ «សាងសង់ស្តូបរំឭកគុណវីរបុរសខ្មែរទាំងឡាយដែលបានបូជាចំពោះការការពារជាតិ ឬរូបសំណាកតំណាងឱ្យខេត្តតំបន់ឱ្យបានធំ និងល្អប្រណិត ជំនួសឱ្យស្តូបរំឭកគុណជាតិសាសន៍ដទៃ ដើម្បីជាការលើកស្ទួយដល់ការកសាងមោទកភាពជាតិខ្មែរឡើងវិញ»។
គណបក្សនេះក៏បានលើកឡើងទៀតថា ការខិតខំកសាងស្តូបរំឭកគុណវៀតណាមគ្រប់រាជធានីខេត្ត មិនល្អសម្រាប់កូនចៅខ្មែរជំនាន់ក្រោយទេ។
គ ប ម៖ «រាជរដ្ឋាភិបាលដែលដឹកនាំដោយគណបក្សប្រជាជនមានការខំប្រឹងប្រែងយ៉ាងខ្លាំងក្នុងការកៀរគរធនធានកសាងស្តូបរំឭកគុណវៀតណាមនៅគ្រប់រាជធានីខេត្តក្នុងប្រទេសកម្ពុជា ដែលយើងគិតថា ជារឿងមិនល្អសម្រាប់អនាគតជាតិខ្មែរ»។
កាលពីថ្ងៃទី១ ខែមិថុនា ឆ្នាំ២០២០ ក្រុមប្រឹក្សាឃ្លាំមើលកម្ពុជា ក៏បានអំពាវនាវទៅរដ្ឋាភិបាលឱ្យផ្អាកគម្រោងសាងសង់ស្ដូបមិត្តភាពកម្ពុជា-វៀតណាម ឬស្ដូបអនុស្សាវរីយ៍នៃនយោបាយឈ្នះៗនៅតាមរាជធានី-ខេត្ត ដោយបារម្ភថា ស្តូបនេះបង្ហាញរូបភាពកម្ពុជាចុះខ្សោយក្លាយជារដ្ឋចំណុះឱ្យប្រទេសជិតខាង៕
