មេសហជីពមួយរូបត្រូវបានរដ្ឋាភិបាលព្រមានចាត់វិធានការផ្លូវច្បាប់ និងរំលាយសហជីពនេះចោល បន្ទាប់ពីមេសហជីពរូបនេះត្រូវបានចោទថា បានដឹកនាំកម្មកររបស់រោងចក្រមួយតវ៉ាទាមទារអត្ថប្រយោជន៍ផ្សេងៗ។
កាលពីម្សិលមិញ កម្មករប្រហែល ១,០០០នាក់បម្រើការងារនៅរោងចក្រ វ៉ាយអូលែត អឹភែរឹល (ខេមបូឌា) ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ បានផ្ទុះការតវ៉ាទាមទារអត្ថប្រយោជន៍ផ្សេងៗ ក្រោយថៅកែរោងចក្រនេះបានប្រកាសបញ្ចប់កិច្ចសន្យាភ្លាមៗដោយមិនបានជូនដំណឹងមុន និងផ្តល់សំណងមិនត្រឹមត្រូវតាមផ្លូវច្បាប់។
ក្នុងលិខិតព្រមានចុះថ្ងៃទី១ ខែកក្កដា ក្រសួងការងារបានចោទថា ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ បានញុះញង់ និងដឹកនាំកម្មកររោងចក្រ វ៉ាយអូលែត តវ៉ាខុសច្បាប់។
លិខិតដដែលចោទថា អ្នកស្រី យ៉ាង សុភ័ណ្ឌ បានញុះញង់កម្មករឱ្យគំរាមកំហែង និងដាក់សម្ពាធលើភាគីនិយោជក ដើម្បីទទួលបាននូវការទូទាត់ប្រាក់ ផ្ទុយពីស្មារតីច្បាប់ និងបទប្បញត្តិពាក់ព័ន្ធនឹងវិស័យការងារ។
លិខិតចោទប្រកាន់ទៀតថា អ្នកស្រី យ៉ាង សុភ័ណ្ឌ បានដឹកនាំកម្មករធ្វើសកម្មភាពឱ្យកកស្ទះរាំងខ្ទប់ផ្លូវចេញចូលបរិវេណរោងចក្រ និងបង្ខិតបង្ខំកម្មករឱ្យប្រើគ្រប់មធ្យោបាយ និងបង្ករឿងសម្រាប់តែគោលបំណង ឬមហិច្ឆតាផ្ទាល់ខ្លួនដែលផ្ទុយពីច្បាប់។
អ្នកស្រី យ៉ាង សុភ័ណ្ឌ បានបង្ហាញការខកចិត្ត និងច្រានចោលការចោទប្រកាន់របស់ក្រសួងការងារ ដោយថា អ្នកស្រីមិនបានញុះញង់កម្មករ និងធ្វើសកម្មភាពដូចការចោទប្រកាន់របស់ក្រសួងការងារឡើយ។
មេសហជីពរូបនេះ រៀបរាប់ថា ថៅកែរោងចក្រ វ៉ាយអូលែត ប្រកាសបញ្ចប់កិច្ចសន្យាការងារកម្មករភ្លាមៗ បន្ទាប់ពីព្យួរការងាររយៈពេល ២ខែ ដោយមិនបានដោះស្រាយសំណងជូនកម្មករត្រឹមត្រូវតាមផ្លូវច្បាប់ ទើបបណ្តាលឱ្យកម្មករផ្ទុះការតវ៉ា។
អ្នកស្រី យ៉ាង សុភ័ណ្ឌ បន្តថា តាមផ្លូវច្បាប់ ក្នុងនាមជាថ្នាក់ដឹកនាំសហជីព អ្នកស្រីមានសិទ្ធិទៅជួប និងស្វែងរកដំណោះស្រាយជូនសមាជិករបស់ខ្លួនពេលដែលពួកគេមានបញ្ហា។
អ្នកស្រី បញ្ជាក់ថា វត្តមានរបស់អ្នកស្រីនៅរោងចក្រ វ៉ាយអូលែត កាលពីម្សិលមិញ ដើម្បីជួយពិភាក្សា និងជួយស្វែងរកដំណោះស្រាយដល់កម្មករដែលជាសមាជិករបស់ខ្លួនប៉ុណ្ណោះ ខណៈដែលថៅកែបានផ្តល់សំណងជូនពួកគេត្រឹមតែ ៣ចំណុច តែចំពោះផ្លូវច្បាប់ ពេលដែលរោងចក្របិទទ្វារភាមៗ គឺត្រូវផ្តល់សំណងជូនកម្មករចំនួន ៥ចំណុចនោះ។
អ្នកស្រី យ៉ាង សុភ័ណ្ឌ ចាត់ទុកថា ករណីក្រសួងការងារចេញលិខិតព្រមានអ្នកស្រីនេះ គឺជាការគំរាមកំហែងមកលើអ្នកស្រី និងថ្នាក់ដឹកនាំសហជីពផ្សេងទៀត មិនឱ្យដឹកនាំកម្មករតវ៉ាទាមទារប្រាក់សំណងជំងឺចិត្ត និងប្រាក់ជូនដំណឹងមុន។
អ្នកស្រី យ៉ាង សុភ័ណ្ឌ ប្រាប់ថា៖ «លិខិតនេះសរសេរមកខ្ញុំ ចោទប្រកាន់ខ្ញុំធ្ងន់ណាស់ ថាខ្ញុំគំរាមកំហែងនិយោជក ថាខ្ញុំញុះញង់កម្មករឱ្យធ្វើកូដកម្មមិនត្រូវ ខុសច្បាប់ផ្សេងៗ។ អ៊ីចឹង ចំណុចនេះ ខ្ញុំសុំបដិសេធ អាចទៅសួរកម្មករបានថាខ្ញុំញុះញង់កម្មករមួយណា ថាខ្ញុំគំរាមនិយោជក តើនិយោជកនោះឈ្មោះអី។ តើគំរាមហ្នឹងប្រើភាសាយ៉ាងម៉េច។ ខ្ញុំមិនដែលទៅគំរាមអ្នកណាទេ។ ខ្ញុំនិយាយអ្វីដែលជាគោលការណ៍ផ្លូវច្បាប់ ហើយបើសិនណាអ្នកលើកមកមិនសមហេតុផល មិនឱ្យខ្ញុំឆ្លើយតបទេ? បើមិនឱ្យខ្ញុំឆ្លើយតប តើសេរីភាពនៃការនិយាយស្តីរបស់ខ្ញុំបាត់ទៅណា? ហើយយើងយកច្បាប់ទៅណាបាត់ហើយ?»
បម្រើការងារផ្នែកកាន់ឃ្លាំងនៅរោងចក្រ វ៉ាយអូលែត រយៈពេល ១៧ឆ្នាំ កម្មការិនី អ្នកស្រី អ៊ុង ចាន់ធឿន អះអាងថា អ្នកស្រី យ៉ាង សុភ័ណ្ឌ មិនបានញុះញង់កម្មករឱ្យតវ៉ាដូចការចោទប្រកាន់របស់ក្រសួងការងារនោះទេ។
កម្មការិនីរូបនេះបន្តថា កម្មករតវ៉ាដោយសារថៅកែប្រកាសបិទទ្វារ និងបញ្ចប់កិច្ចសន្យាការងារកម្មករភ្លាមៗ ដោយមិនបានដោះស្រាយសំណងត្រឹមត្រូវតាមផ្លូវច្បាប់។
អ្នកស្រី អ៊ុង ចាន់ធឿន បន្ថែមថា ក្រោយកម្មករផ្ទុះការតវ៉ា គឺអ្នកស្រី យ៉ាង សុភ័ណ្ឌ បានជួបជាមួយកម្មករដែលជាសមាជិករបស់ខ្លួន ហើយក្រុមកម្មករស្នើសុំសម្របសម្រួលដោះស្រាយវិវាទការងារនេះតែប៉ុណ្ណោះ។
អ្នកស្រី អ៊ុង ចាន់ធឿន ប្រាប់ថា៖ «សម្រាប់ខ្ញុំដែលបាននៅហ្នឹងផ្ទាល់ គឺបង យ៉ាង សុភ័ណ្ឌ មិនបានញុះញង់ ឬដឹកនាំកម្មករតវ៉ាទេ។ កម្មករបានប្រមូលផ្តុំមុន។ នៅម៉ោង៩ បានបង ភ័ណ្ឌ មកដល់ ហើយនៅក្នុងរឿងហ្នឹង គឺកម្មករស្នើឱ្យបង ភ័ណ្ឌ នាំរឿងពួកគេទៅក្រុមប្រឹក្សាអាជ្ញាកណ្តាល មិនមែនគាត់ដឹកនាំកម្មករតវ៉ាទេ»។
បើតាមអ្នកស្រី យ៉ាង សុភ័ណ្ឌ រោងចក្រ វ៉ាយអូលែត អឹភែរឹល (ខេមបូឌា) ផលិតសម្លៀកបំពាក់ឱ្យក្រុមហ៊ុនបញ្ជាទិញសម្លៀកបំពាក់យីហោ ណៃគី (Nike) មានកម្មករសរុបជាង ១,០០០នាក់។
កាលពីម្សិលមិញ រោងចក្រនេះ បានប្រកាសបញ្ចប់កិច្ចសន្យាកម្មករទាំងអស់ បន្ទាប់ពីព្យួរការងាររយៈពេល ២ខែ ក្រោមហេតុផលគ្មានអ្នកបញ្ជាទិញដោយសារវិបត្តិជំងឺកូវីដ១៩។
មន្ត្រីគ្រប់គ្រងកម្មវិធីការងារ និងសិទ្ធិមនុស្សនៃអង្គការសង់ត្រាល់ លោក ឃុន ថារ៉ូ បានប្រាប់ថា ករណីក្រសួងការងារចេញលិខិតព្រមានអ្នកស្រី យ៉ាង សុភ័ណ្ឌ នេះ គឺជាការគំរាមកំហែង និងរំលោភទៅលើសិទ្ធិជាមូលដ្ឋានរបស់សហជីព។
លោក ឃុន ថារ៉ូ បន្ថែមថា ករណីនេះក៏ជាសារមួយគំរាមទៅដល់មេសហជីពផ្សេងៗមិនឱ្យដឹកនាំកម្មករតវ៉ាស្របច្បាប់ ខណៈជំងឺកូវីដកំពុងរីករាលដាល។ លោកថា ក្រសួងការងារធ្វើបែបនេះ នឹងធ្វើឱ្យប៉ះពាល់ផលប្រយោជន៍របស់កម្មករយ៉ាងច្រើន។
លោក ឃុន ថារ៉ូ ប្រាប់ថា៖ «ខ្ញុំគិតថា នេះជាសារមួយគំរាមទៅដល់ថ្នាក់ដឹកនាំសហជីពផ្សេងៗទៀត ដែលគាត់ចូលតវ៉ាក្នុងកាលៈទេសៈកូវីដ ដែលរោងចក្រត្រូវបានបិទ ថៅកែរត់ចោល និយោជកគេចវេះពីកាតព្វកិច្ចផ្លូវច្បាប់ ដែលគាត់ក្រោកឈរតវ៉ាហ្នឹង វាអាចហេតុផលឈានទៅដល់ការរំលាយសហជីព ឬជាការចោទប្រកាន់ទៅថ្នាក់ដឹកនាំសហជីពដែលអនុវត្តស្របច្បាប់របស់ពួកគាត់។ ខ្ញុំគិតថា ក្រសួងគួរតែចេញលិខិតព្រមានហ្នឹង ឬចុះធ្វើអធិការកិច្ច ឬជំរុញឱ្យនិយោជកហ្នឹងគាត់បំពេញកាតព្វកិច្ចផ្លូវច្បាប់វិញទេ បានវាត្រឹមត្រូវ»៕
