មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បានអំពាវនាវទៅរដ្ឋាភិបាលឱ្យជួយអន្តរាគមន៍ពលករខ្មែរ ២១នាក់ ដែលអង្គការនេះបញ្ជាក់ថា កំពុងជាប់នៅប្រទេសហ្ស៊កដានី ឱ្យបានវិលត្រឡប់កម្ពុជាវិញក្នុងពេលឆាប់ៗនេះ ដោយថា បច្ចុប្បន្នពួកគេកំពុងជួបផលលំបាកជីវភាព។
ក្នុងសេចក្ដីថ្លៃងការណ៍នៅថ្ងៃនេះ អង្គការសង់ត្រាល់ ឱ្យដឹងថា ក្រុមហ៊ុន Vega Textile Co., Ltd និង Camel Textile International Corporation ដែលជារោងចក្រមានទីតាំងស្ថិតនៅក្រុងអាល់ការ៉ាក់ ប្រទេសហ្ស៊កដានី បានបញ្ចប់កិច្ចសន្យាការងារពលករខ្មែរ ២១នាក់កាលពីថ្ងៃទី១៧ ខែមីនាកន្លងមកនេះ។
សង់ត្រាល់ ឱ្យដឹងថា នៅពេលបញ្ចប់កិច្ចសន្យាការងារ ក្រុមហ៊ុន VegaTextile និង CamelTextile មិនបានទទួលខុសត្រូវទិញសំបុត្រយន្តហោះដើម្បីបញ្ជូនពលករខ្មែរត្រឡប់មកកម្ពុជាវិញឡើយ ហើយក្រុមហ៊ុននេះក៏មិនបានផ្ដល់អត្ថប្រយោជន៍ផ្នែកគាំពារសង្គមដល់ពលករខ្មែរដែរ បើទោះបីជាកន្លងមកក្រុមហ៊ុនបានកាត់ប្រាក់ឈ្នួលពលករជារៀងរាល់ខែប្រមាណ ១,០០០ដុល្លារសម្រាប់ពលករម្នាក់ៗក៏ដោយ។
អង្គការសង់ត្រាល់អំពាវនាវឱ្យរដ្ឋាភិបាលកម្ពុជា ជាពិសេសក្រសួងការបរទេសតាមរយៈស្ថានទូតកម្ពុជាប្រចាំនៅប្រទេសអេហ្ស៊ីប និងគុយវ៉ែត ឱ្យធ្វើអន្តរាគមន៍ភ្លាមៗលើករណីនេះ ដើម្បីធានាថា ក្រុមហ៊ុនបានបំពេញតួនាទីខ្លួន ដោយបញ្ជូនពលរដ្ឋខែ្មរ និងទូទាត់ប្រាក់អត្ថប្រយោជន៍ផ្នែកកិច្ចគាំពារសង្គមដល់ពួកគេឱ្យបានគ្រប់គ្រាន់។
នាយកប្រតិបត្តិអង្គការសង់ត្រាល់ លោក មឿន តុលា បន្ថែមថា ពលករខ្មែរទាំងនោះកំពុងជួបការលំបាកខ្វះស្បៀងអាហារ និងមិនមានប្រាក់សម្រាប់ទិញសំបុត្រយន្តហោះដើម្បីត្រឡប់មកប្រទេសកម្ពុជាវិញ ដោយសារតែពួកគេទាំងអស់ត្រូវបានក្រុមហ៊ុនបញ្ចប់កិច្ចសន្យាការងាររយៈពេលបីខែហើយ។
លោក មឿន តុលា ប្រាប់ថា៖ «ខ្ញុំនៅតែសំណូមពរឱ្យខាងរដ្ឋាភិបាលលោកជួយអន្តរាគមន៍ជំរុញឱ្យក្រុមហ៊ុនទទួលខុសត្រូវទៅលើចំណាយអីផ្សេងៗហ្នឹង។ ដូចយើងបានរៀបរាប់ក្នុងសេចក្ដីថ្លែងការណ៍ហើយ តាមពិតមានលទ្ធភាពរៀបចំជើងយន្តហោះពីហ្ស៊កដានីមកស្រុកខ្មែរបាន អាចថា ពីហ្ស៊កដានីទៅហ្ស៊កដង់ ទៅឌូបៃ ហ្កាតា ហើយមកហុងកុង បន្ទាប់មកប្រទេសខ្មែរ មកអ៊ីចឹងក៏បាន»។
អ្នកនាំពាក្យក្រសួងការបរទេស លោក កុយ គួង បានប្រាប់ថា ក្រសួងបានទទួលដំណឹងអំពីករណីនេះហើយ ហើយលោកថា ក្រសួងក៏បានធ្វើកិច្ចការនេះជាមួយស្ថានទូតកម្ពុជាប្រចាំប្រទេសចំនួន២ដែលស្ថិតនៅជិតប្រទេសហ្ស៊កដានី ដើម្បីជួយអន្តរាគមន៍ដល់ពួកគេផងដែរ។
លោក កុយ គួង ប្រាប់ថា៖ «ខ្ញុំបានទទួលដំណឹងពីសារព័ត៌មាន ហើយឥលូវក្រសួងការបរទេសបានណែនាំឱ្យទូតកម្ពុជាប្រចាំនៅអេហ្ស៊ីប និងប្រចាំនៅគុយវ៉ែត ឱ្យសហការគ្នាធ្វើការជាមួយប្រទេសហ្ស៊កដានីតាមរយៈស្ថានទូតនៅទីនោះដែរ ហើយនឹងព្យាយាមទំនាក់ទំនងផ្ទាល់ទៅប្រជាពលរដ្ឋហ្នឹងដែរ»។
បើតាមសេចក្ដីថ្លែងការណ៍របស់សង់ត្រាល់ ពលរដ្ឋខ្មែរដែលធ្វើការនៅប្រទេសហ្ស៊កដានីមានចំនួន ៤១នាក់ ហើយអ្នកដែលត្រូវបានក្រុមហ៊ុនបញ្ចប់ការងារមានចំនួន ២១នាក់។
ពលរដ្ឋកម្ពុជាជាច្រើននាក់បានជាប់គាំងនៅតាមបណ្ដាប្រទេសមួយចំនួនចាប់តាំងពីដើមឆ្នាំនេះ ក្រោយពីវីរុសកូរ៉ូណាបានផ្ទុះឡើងនៅក្នុងប្រទេសចិន និងបានរីករាលដាលទៅដល់បណ្ដាប្រទេសជាច្រើន ដែលនាំទៅដល់ការបិទជើងហោះហើរជាច្រើននៅលើពិភពលោក។
របាយការណ៍អង្គការសុខភាពពិភពលោកដែលចេញនៅថ្ងៃនេះ បង្ហាញថា មនុស្សដល់ទៅជាង ១០លាន ៣៥ម៉ឺននាក់ហើយ ត្រូវបានរកឃើញឆ្លងវីរុសកូរ៉ូណានៅទូទាំងពិភពលោក ក្នុងនោះមនុស្សដល់ទៅជាង ៥សែន ៨ម៉ឺននាក់ បានស្លាប់បាត់បង់ជីវិត គិតត្រឹមថ្ងៃម្សិលមិញនេះ។
កាលពីថ្ងៃទី១៦ ខែមិថុនា ក្រសួងសុខាភិបាលឱ្យដឹងថា ពលរដ្ឋខ្មែរសរុប ២០៤នាក់ដែលជាប់នៅប្រទេសម៉ាឡេស៊ី ត្រូវបានរដ្ឋាភិបាលសម្របសម្រួល និងអនុញ្ញាតឱ្យវិលត្រឡប់មកប្រទេសកំណើតវិញ តាមជើងហោះហើររបស់ក្រុមហ៊ុនអាកាសចរណ៍ម៉ាឡេស៊ី។
នៅពេលសាកសួរអំពីចំនួនពលរដ្ឋកម្ពុជាដែលបានវិលត្រឡប់មកកម្ពុជាវិញក្រោយរដ្ឋាភិបាលបើកទទួលយកវិញនោះ លោក កុយ គួង បានប្រាប់ថា លោកមិនមានតួលេខនៅក្នុងដៃទេ។
ចំណែកអ្នកនាំពាក្យរដ្ឋលេខាធិការអាកាសចរណ៍ស៊ីវិលកម្ពុជា លោក ស៊ិន ចាន់សិរីវុត្ថា មិនបានឆ្លើយតបនឹងការស្វែងរកតួលេខនេះពីសំណាក់វីអូឌីផងដែរនៅថ្ងៃនេះ។
ក្រសួងការបរទេសកម្ពុជា បានប្រកាសកាលពីថ្ងៃទី២៥ ខែមិថុនាថា ពលរដ្ឋកម្ពុជាសរុប ១៥៨នាក់ទៀត ដែលមាននិស្សិត និងពលករផងដែរ ត្រូវបានសម្របសម្រួល និងដឹកជញ្ជូនពីប្រទេសម៉ាឡេស៊ីវិលត្រឡប់មកដល់កម្ពុជានៅថ្ងៃទី២៦ ខែមិថុនា៕
