ក្រសួងកសិកម្មអះអាងថា ក្នុងរយៈពេល ៦ខែ ឆ្នាំ២០២០ កម្ពុជាបាននាំចេញអង្ករទៅកាន់ទីផ្សារអន្តរជាតិប្រមាណ ៤០ម៉ឺនតោន ចំនួននេះស្មើនឹង ៤១,២៥ភាគរយនៃផែនការនាំចេញប្រចាំឆ្នាំ។
កាលពីថ្ងៃទី៣០ ខែមិថុនា ឆ្នាំ២០២០ ក្រសួងកសិកម្មបានចេញរបាយការណ៍នៃការនាំចេញអង្ករទៅកាន់ទីផ្សារអន្តរជាតិក្នុងរយៈពេល ៦ខែ បានចំនួនជិត ៤០ម៉ឺនតោន (៣៩៧ ៦៦០) គិតជាទឹកប្រាក់ស្មើនឹង ២៦៤លានដុល្លារអាមេរិក។ របាយការណ៍ដដែលបញ្ជាក់ថា ក្នុងចំណោមជិត៤០ម៉ឺនតោននេះ កម្ពុជានាំទៅប្រទេសចំនួន៥៦។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ថ្លែងប្រាប់វីអូឌីបន្ថែមថា ចំនួនអង្ករដែលនាំចេញ៦ខែនេះគឺជាចំនួនតិចតួចតែប៉ុណ្ណោះ ដោយលោកថា កម្ពុជានៅសល់អង្ករប្រមាណ ៣លាន ៦សែន ៩ម៉ឺនតោនទៀត។ លោក បញ្ជាក់ថា កម្ពុជាមិនខ្វះអង្ករសម្រាប់ផ្គត់ផ្គង់ក្នុងស្រុក និងនាំចេញទេ។
លោកថ្លែងថា៖ «យើងមិនខ្វះស្រូវអង្ករទេ ឱ្យតែប្រទេសក្រៅបញ្ជាទិញចំនួនប៉ុន្មានក៏បាន ព្រោះកម្ពុជាមិនចេះខ្វះអង្ករសម្រាប់ផ្គត់ផ្គង់ឡើយ»។
អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ការនាំចេញអង្ករទៅកាន់ទីផ្សារក្រៅប្រទេសច្រើន ជាសញ្ញាណវិជ្ជមានច្រើន ព្រោះអាចផ្តល់អត្ថប្រយោជន៍ដល់ប្រជាកសិករដែលដាំដុះ និងលើកទឹកចិត្តបន្តការធ្វើកសិកម្មស្រូវអង្ករបន្ថែមទៀត។
លោក ថេង សាវឿន បន្តថា អ្វីជាចំណុចបញ្ហានោះគឺកសិករលក់ស្រូវរបស់ពួកគាត់ទៅឱ្យឈ្មួញកណ្តាលក្នុងតម្លៃថោកពេក ធ្វើឱ្យពួកគាត់ខាតបង់ ហើយរងការជំពាក់បំណុលធនាគារ មីក្រូហិរញ្ញវត្ថុ។
តាមរបាយការណ៍របស់សហព័ន្ធស្រូវអង្ករកម្ពុជា បង្ហាញថា អង្ករនាំចេញនៅឆ្នាំ២០១៨ មានជាង ៦០ម៉ឺនតោន (៦២៦ ២២៥) និងឆ្នាំ២០១៩ មានចំនួនថយចុះបន្តិច តែស្ថិតក្នុងចំនួនជាង ៦០ម៉ឺនតោនដដែល (៦២០ ១០៦)៕
