ក្រសួងមហាផ្ទៃជំរុញទៅមន្ត្រីរដ្ឋបាលឃុំ សង្កាត់ ឱ្យផ្តោតការយកចិត្តទុកដាក់ខ្ពស់ក្នុងការប្រមូលទិន្នន័យ និងជួយឧត្ថម្ភដល់ស្ត្រីមានផ្ទៃពោះ និងកុមារដែលមានអាយុ២ក្រោមឆ្នាំ ឱ្យបានទាន់ពេលក្នុងអំឡុងពេលនៃការឆ្លងរាលដាលមេរោគកូវីដ១៩។
ក្នុងលិខិតក្រសួងមហាផ្ទៃចុះផ្សាយនៅថ្ងៃទី៣ខែកក្កដាម្សិលមិញនេះបានជំរុញទៅអាជ្ញាធរឃុំ សង្កាត់ ចូលរួមអនុវត្តវិធានការឆ្លើយតបទៅនឹងគ្រោះអាសន្ន ពាក់ព័ន្ធនឹងការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារដែលមានអាយុក្រោម២ឆ្នាំ ដើម្បីធានាប្រយោជន៍ដល់អ្នកទទួលផលក្នុងស្ថានភាពលំបាក ឬគ្រោះអាសន្នក្នុងកំឡុងពេលនៃការរាតត្បាតជំងឺកូវីដ១៩ ឲ្យមានតម្លាភាព និងគណនេយ្យភាព។
លិខិតដដែលបញ្ជាក់ថា រដ្ឋបាលរាជធានី-ខេត្ត ក្រុង ស្រុក ខណ្ឌ ទាំងអស់ត្រូវ ណែនាំទៅរដ្ឋបាលឃុំ សង្កាត់ អនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំនេះ ឲ្យមានប្រសិទ្ធិខ្ពស់ តាមរយៈការបង្កើនកិច្ចសហការជាមួយក្រសួងសង្គមកិច្ច អនុវត្តការងារពិនិត្យ និងប្រមូលទិន្នន័យស្ត្រីមានផ្ទៃពោះ កុមារអាយុក្រោម២ឆ្នាំ ជាការងារអាទិភាពផងដែរ៕