ក្រសួងអប់រំនឹងបើកសាលារៀនឡើងវិញនាពេលឆាប់ៗខាងមុខនេះ បន្ទាប់ពីពិភាក្សាជាមួយស្ថាប័នពាក់ព័ន្ធលើវិធានការសុខុមាលភាព និងកត្តាសង្គម-សេដ្ឋកិច្ច។
អ្នកនាំពាក្យក្រសួងអប់រំ លោក រស់ សុវាចា មានប្រសាសន៍ប្រាប់វីអូឌីនៅថ្ងៃនេះថា ក្រសួងអប់រំនឹងធ្វើតាមអនុសាសន៍ណែនាំរបស់លោកនាយករដ្ឋមន្ត្រី ហ៊ុន សែន ឲ្យបើកដំណើរការសាលារៀនទាំងអស់ឡើងវិញ គឺនឹងប្រព្រឹត្តិទៅតាមបីដំណាក់កាលរួមមាន សាលារៀនមានស្តង់ដាសុវត្ថិភាពខ្ពស់ សាលារៀនមានស្តង់ដាមធ្យម និង សាលារៀនមានស្តង់ដាអប្បបរមា។
អ្នកនាំពាក្យរូបនោះបញ្ជាក់ថា ក្រសួងអប់រំ យុវជន និងកីឡា បាននិងកំពុងសហការជាមួយគ្រប់ភាគីពាក់ព័ន្ធ ជាពិសេសក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ដោយពិភាក្សាលើវិធានការសុខុមាលភាព កត្តាសង្គម-សេដ្ឋកិច្ច មុននឹងជម្រាបសាធារណៈជនពីកាលបរិច្ឆេទ រួមទាំងវិធានការចាំបាច់នានា សម្រាប់បើកឲ្យដំណើរការសាលារៀនតាមបីដំណាក់កាលខាងលើនាពេលឆាប់ៗខាងមុខនេះ។
សាលារៀនទាំងអស់បានចាប់ផ្ដើមបិទទ្វារតាំងពីថ្ងៃទី១៦ ខែមីនា ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩។ ជាងមួយខែក្រោយមក គឺនៅថ្ងៃទី១៧ ខែមេសា ក្រសួងអប់រំបានប្រកាសពន្យារពេលចូលរៀនឡើងវិញ ដោយមិនទាន់កំណត់កាលបរិច្ឆេទចូលរៀននៅឡើយទេ។
ទិន្នន័យស្ថិតិចងក្រងដោយក្រសួងអប់រំឆ្នាំសិក្សា២០១៩ បង្ហាញថា កម្ពុជាមានគ្រឹះស្ថានអប់រំចំណេះទូទៅ និងមត្តេយ្យសាធារណៈចំនួនជាង ១៣៣០០ ក្នុងនោះ សាលារៀននៅតំបន់ទីប្រជុំជនមាន ១៤២២ និងសាលារៀននៅទីជនបទមាន ១១ ៨៧៨។
សាលារៀនជួបការលំបាកមានចំនួន ២៤៨កន្លែង ដែលភាគច្រើនជាសាលាបឋមសិក្សា។ សិស្សដែលរៀនក្នុងឆ្នាំសិក្សា២០១៨ -២០១៩ មានចំនួន ជាង ៣លាន ១សែន ៨ម៉ឺននាក់ (៣ ១៨៩ ១៧២នាក់) និងមានបុគ្គលិកបង្រៀនជាង ៩ម៉ឺននាក់ (៩៣ ៧០៣នាក់) និងបុគ្គលិកមិនបង្រៀនជាង ១ម៉ឺន ៩ពាន់នាក់ (១៩ ០៦៦នាក់)៕