វិវាទការងាររបស់ក្រុមកម្មករ និងថៅកែនៅរោងចក្រ ហាណា វ័ន ស្ថិតក្នុងខណ្ឌពោធិ៍សែនជ័យ រាជធានីភ្នំពេញ មិនទាន់ឈានទៅរកចំណុចរួមនៅឡើយទេ ក្រោយជួបចរចាគ្នារកដំណោះស្រាយជាមួយភាគីពាក់ព័ន្ធជាច្រើនម៉ោងនៅព្រឹកថ្ងៃនេះ។
តំណាងកម្មករ តំណាងក្រសួងការងារ និងតំណាងរោងចក្រ បានជួបចរចាគ្នារកដំណោះស្រាយទៀតនៅថ្ងៃនេះ ក្រោយក្រុមកម្មករផ្ទុះការតវ៉ា និងព្យាយាមនាំគ្នាដើរហែក្បួនទៅខុទ្ទកាល័យនាយករដ្ឋមន្ត្រីចំនួនពីរលើករួចមកហើយនៅក្នុងរយៈពេល ២សប្ដាហ៍ចុងក្រោយមកនេះ ដើម្បីសុំអន្តរាគមន៍ពីលោក ហ៊ុន សែន ឱ្យជួយដោះស្រាយវិវាទការងារ ខណៈវិវាទនេះអូសបន្លាយអស់រយៈពេលកន្លះខែ។
អ្នកស្រី ប៊ូ សុខុម បម្រើការងារនៅរោងចក្រ ហាណា វ័ន រយៈពេល ៤ឆ្នាំ ដែលចូលដោះស្រាយជាមួយភាគីពាក់ព័ន្ធ ប្រាប់វីអូឌីថា ការចរចារកដំណោះស្រាយរវាងតំណាងកម្មករ និងតំណាងរោងចក្រ ក្រោមការសម្របសម្រួលពីមន្ត្រីក្រសួងការងារនៅព្រឹកនេះ គឺមិនទាន់ទទួលបានដំណោះស្រាយនៅឡើយទេ។
កម្មការិនីរូបនេះ បញ្ជាក់ថា ភាគីរោងចក្រនៅតែរក្សាជំហរផ្តល់សំណងជូនកម្មករត្រឹមតែ ៣ចំណុចដដែល ខណៈតំណាងកម្មករនៅតែទាមទារសំណងចំនួន ៥ចំណុច។
អ្នកស្រី ប៊ូ សុខុម បន្ថែមថា ថៅកែរក្សាជំហរផ្តល់ ៣ចំណុច ដោយលើកហេតុផលថា រោងចក្រជួបវិបត្តិសេដ្ឋកិច្ចដោយសារការរីករាលដាលជំងឺកូវីដ១៩។ ចំណែកក្រុមកម្មករទាមទារអត្ថប្រយោជន៍ ៥ចំណុច ដោយយោងទៅលើកិច្ចព្រមព្រៀងរបស់ថៅកែកាលពីថ្ងៃទី២៣ ខែមិថុនា ដែលសន្យាផ្តល់សំណងជូនកម្មករ ៥ចំណុចតាមច្បាប់ស្តីពីការងារ។
កម្មករអះអាងថា ថៅកែរោងចក្រ ហាណា វ័ន បានប្រកាសបិទទ្វាររោងចក្រភ្លាមៗកាលពីថ្ងៃទី២២ ខែមិថុនា ដោយមិនបានជូនដំណឹងមុន ដែលបណ្តាលឱ្យក្រុមកម្មករផ្ទុះការតវ៉ាទាមទារការដោះស្រាយសំណងតាមផ្លូវច្បាប់។
ក្រោយក្រុមកម្មករផ្ទុះការតវ៉ា គឺនៅថ្ងៃទី២៣ ខែមិថុនា មន្ត្រីការងារក៏បានចុះដោះស្រាយផងដែរ។ ក្នុងកំណត់ហេតុរបស់ក្រសួងចុះដោះស្រាយថ្ងៃទី២៣ ខែមិថុនា ថៅកែរោងចក្រហាណាវ័នបានសន្យាផ្តល់សំណង ៥ចំណុចទៅតាមច្បាប់ ប៉ុន្តែ កម្មករអះអាងថា នៅថ្ងៃទី២៦ ដែលជាថ្ងៃពួកគេបើកលុយ គឺទូទាត់ឱ្យបានត្រឹមតែ ៣ចំណុចប៉ុណ្ណោះ មានប្រាក់ឈ្នួលចុងក្រោយ ប្រាក់អតីតភាព និងប្រាក់ដំណាច់ឆ្នាំដែលនៅសល់។
ក្រុមកម្មកររោងចក្រ ហាណា វ័ន បាននាំគ្នាដើរហែក្បួនទៅខុទ្ទកាល័យនាយករដ្ឋមន្ត្រីចំនួនពីរលើកហើយ ដើម្បីសុំអន្តរាគមន៍ពីលោក ហ៊ុន សែន ក្រោយពួកគេគ្មានដំណោះស្រាយពីអាជ្ញាធរមូលដ្ឋាន និងមន្ត្រីក្រសួងការងារ ប៉ុន្តែ រាល់លើក គឺត្រូវបានរារាំងដោយអាជ្ញាធរខណ្ឌពោធិ៍សែនជ័យ។
បើតាមអ្នកស្រី ប៊ូ សុខុម នៅរសៀលម៉ោង២នេះ ភាគីពាក់ព័ន្ធជួបចរចារកដំណោះស្រាយទៀត។ អ្នកស្រីថា ប្រសិនបើនៅតែគ្មានដំណោះស្រាយទេ ក្រុមកម្មករនឹងដើរដោយថ្មើរជើងទៅខុទ្ទកាល័យលោកនាយករដ្ឋមន្ត្រី ហ៊ុន សែន ម្តងទៀត។
បើតាមអ្នកគ្រប់គ្រងទូទៅនៅរោងចក្រ ហាណា អ្នកស្រី ទី សុធីតា រោងចក្រ ហាណាវ័ន ជារោងចក្រផលិតម៉ាស់ និងសម្លៀកបំពាក់ ដែលថៅកែជាជនជាតិកូរ៉េខាងត្បូង ហើយរោងចក្រនេះមានកម្មករសរុប ៦៦៩នាក់៕
