ធនាគារអភិវឌ្ឍន៍អាស៊ី (ADB) អនុម័តកម្ចីថវិកា ២៥០លានដុល្លារជូនប្រទេសកម្ពុជា ដើម្បីឆ្លើយតប និងទប់ស្កាត់កូវីដ១៩ ក៏ដូចជាដោះស្រាយបញ្ហាសង្គម និងដំណើរសេដ្ឋកិច្ចមិនប្រក្រតី។
ធនាគារអភិវឌ្ឍន៍អាស៊ីមានស្នាក់ការនៅទីក្រុងម៉ានីល ប្រទេសហ្វីលីពីន បានចេញសេចក្តីប្រកាសព័ត៌មាននៅថ្ងៃទី០៨ ខែកក្កដា ឆ្នាំ២០២០ ថាប្រាក់កម្ចីចំនួន ២៥០លានដុល្លារត្រូវបានអនុម័តរួចរាល់សម្រាប់ផ្តល់ឱ្យប្រទេសកម្ពុជា ក្នុងការដោះស្រាយបញ្ហាសង្គម ជំរុញសេដ្ឋកិច្ច ទប់ស្កាត់វិបត្តិកូវីដ១៩ និងនិរន្តរភាពហិរញ្ញវត្ថុសាធារណៈ។
សេចក្តីប្រកាសព័ត៌មានដដែលបាននិយាយថា ការអនុម័តថវិកាកម្ចីក្នុងរង្វង់ទឹកប្រាក់ខាងលើដើម្បីផ្តល់ជូនរាជរដ្ឋាភិបាលកម្ពុជា ក្នុងការពង្រឹងប្រព័ន្ធគាំពារសុខភាពក្នុងប្រទេស បង្កើនជំនួយដល់ប្រជាពលរដ្ឋក្រីក្រ និងគាំទ្រសេដ្ឋកិច្ចសម្រាប់អាជីវកម្ម សហគ្រាសខ្នាតតូច និងមធ្យម។
លោក Masatsugu Asakawa ប្រធានធនាគារអភិវឌ្ឍន៍អាស៊ី ADB មានប្រសាសន៍ថា កម្ពុជាមានកំណត់ត្រានៃការគ្រប់គ្រងម៉ាក្រូសេដ្ឋកិច្ចល្អ ប៉ុន្តែ កូវីដ១៩ គំរាមធ្វើឱ្យថយចុះនូវការរីកចម្រើនក្នុងការកាត់បន្ថយភាពក្រីក្រ ជាពិសេសក្នុងចំណោមក្រុមងាយរងគ្រោះ ដូចជា ស្ត្រី និងកម្មករចំណាកស្រុក។
លោក Masatsugu Asakawa បានបន្តថា កម្ចីនេះជាផែនការចូលរួមរយៈពេលវែងរបស់ ADB ដែលផ្តោតទៅលើការគាំទ្រការស្ទុះងើបឡើងវិញនៃសេដ្ឋកិច្ច និងនិរន្តរភាពហិរញ្ញវត្ថុសាធារណៈរបស់កម្ពុជា។