មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានប្រកាសហាមឃាត់ការធ្វើអាជីវកម្មទិញលក់ និងសម្លាប់សត្វឆ្កែចាប់ពីថ្ងៃម្សិលមិញនេះតទៅ ដោយថា ដើម្បីទប់ស្កាត់ការឆ្លងរាលដាលជំងឺឆ្កែឆ្កួត និងជំងឺផ្សេងៗទៀតដែលធ្វើឱ្យប៉ះពាល់ដល់សុខភាពសាធារណៈ។
ក្នុងសេចក្ដីជូនដំណឹងចុះថ្ងៃទី៦ ខែកក្កដា មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ឱ្យដឹងថា រយៈពេលប៉ុន្មានឆ្នាំចុងក្រោយនេះ ការធ្វើអាជីវកម្មទិញលក់ និងសម្លាប់សត្វសុនខ ឬសត្វឆ្កែដើម្បីយកសាច់ធ្វើម្ហូបអាហារនៅខេត្តរៀមរាបមានការកើនឡើងគួរឱ្យព្រួយបារម្ភ។
មន្ទីរកសិកម្មខេត្តនេះរៀបរាប់ថា៖ «តាំងពីបុរាណកាលរៀងមក សត្វសុនខ ឬសត្វឆ្កែ ត្រូវបានប្រជាជនទូទាំងពិភពលោក ជាពិសេសប្រជាជនខ្មែរយើង បានចាត់ទុកជាសត្វចិញ្ចឹមដ៏ស្មោះត្រង់របស់មនុស្ស ហើយសត្វឆ្កែមានគុណតម្លៃណាស់សម្រាប់ការពារផ្ទះ ចម្ការ ហ្វូងសត្វ ជួយក្នុងវិស័យយោធាបានល្អទៀតផង»។
មន្ទីរកសិកម្មដដែលថា ការធ្វើអាជីវកម្មសាច់សត្វឆ្កែនៅខេត្តទេសចរណ៍មួយនេះ បានធ្វើឱ្យមានការធ្លាក់ចុះនូវតម្លៃមនុស្សធម៌ គុណធម៌ ព្រមទាំងធ្វើឱ្យមានការឆ្លងរាលដាលជំងឺឆ្កែឆ្កួត និងជំងឺផ្សេងៗទៀត ដែលធ្វើឱ្យប៉ះពាល់ដល់សុខភាពសាធារណៈ។
អភិបាលខេត្តសៀមរាប លោក ទៀ សីហា បានប្រាប់ថា លោកជាប់រវល់ប្រជុំ ហើយអភិបាលក្រុងសៀមរាប លោក សូរ ប្លាតុង ថា លោកជាប់រវល់រៀននៅក្រសួងមហាផ្ទៃ។
មន្ទីរកសិកម្មខេត្តសៀមរាប បញ្ជាក់ថា អាជីវកម្មសាច់សត្វមួយប្រភេទនេះ ត្រូវបានធ្វើឡើងដោយគ្មានច្បាប់ទម្លាប់ និងល្មើសទៅនឹងមាត្រា១១២ -១១៣-១១៥ នៃច្បាប់ស្ដីពីសុខភាពសត្វ និងផលិតកម្មសត្វ។
វីអូឌីមិនអាចស្វែងរកការបកស្រាយពីប្រធានមន្ទីរកសិកម្មខេត្តសៀមរាប លោក ទា គឹមសុទ្ធ បានទេនៅថ្ងៃនេះ ដោយទូរស័ព្ទលោកពុំអាចទាក់ទងបាន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា ក្រសួងបានចេញសេចក្ដីហាមឃាត់បែបនេះ ព្រោះបារម្ភខ្លាចឆ្លងជំងឺទៅអ្នកបរិភោគ ដែលធ្វើឱ្យប៉ះពាល់សុខភាព ដោយសារសត្វឆ្កែដែលយកទៅធ្វើម្ហូបអាហារកន្លងមក មិនត្រូវបានត្រួតពិនិត្យដោយមន្ត្រីជំនាញឱ្យបានត្រឹមត្រូវទេ។
លោក វេង សាខុន ប្រាប់ថា៖ «ពលរដ្ឋយល់ថា ហូបសាច់សត្វឆ្កែសុខភាពល្អ លុះត្រាតែសត្វឆ្កែនោះ វាមានសុខភាពល្អដែរ។ ដល់ឆ្កែហ្នឹង យើងមិនដឹងប្រវត្តិ ហើយចេះតែលួចកាប់អ៊ីចឹងទៅ វាអាចប៉ះពាល់សុខភាព។ រឿងហ្នឹង ច្បាប់ស្ដីពីសុខភាពសត្វ និងផលិតកម្មសត្វ គឺបានចែងច្បាស់ពីវិធានការទប់ស្កាត់ និងចរាចរណ៍សត្វហ្នឹង»។
លោក វេង សាខុន បានប្រាប់បន្តថា ក្រសួងមិនបានបិទអាជីវកម្មលក់សាច់សត្វឆ្កែទេ ប៉ុន្តែ លោកថា តម្រូវឱ្យម្ចាស់អាជីវកម្មសាច់សត្វឆ្កែ ស្ថិតនៅក្រោមការត្រួតពិនិត្យសុខភាពសត្វជាមុន ដូចទៅនឹងអាជីវកម្មសត្វជ្រូកផងដែរ។
រដ្ឋមន្ត្រីកសិកម្មរូបនេះ បានបញ្ជាក់ថា ការជួញដូរ និងសម្លាប់សត្វឆ្កែ ត្រូវបានហាមឃាត់នៅទូទាំងប្រទេស ប៉ុន្តែ ក្រសួងបានចេញសេចក្ដីណែនាំជាថ្មីទៅខេត្តសៀមរាប បន្ទាប់ពីមើលឃើញថា សកម្មភាពលួចទាក់ និងធ្វើអាជីវកម្មលក់ និងពិឃាដសត្វឆ្កែមានសកម្មភាពច្រើននៅក្នុងខេត្តនេះ។
របាយការណ៍ស្រាវជ្រាវរបស់អង្គការ FOUR PAWS ចេញផ្សាយកាលពីខែតុលាមុន បង្ហាញថា សត្វឆ្កែដល់ទៅ ៣លានក្បាល ត្រូវបានគេសម្លាប់ក្នុងមួយឆ្នាំៗនៅក្នុងប្រទេសកម្ពុជា។ ជាងនេះទៅទៀត អង្គការនេះរកឃើញថា សត្វឆ្កែក៏ត្រូវបានគេជួញដូរដោយមិនមានការយកចិត្តទុកដាក់ពីអាជ្ញាធរកម្ពុជានោះឡើយ បើធៀបទៅនឹងបណ្ដាប្រទេសជិតខាង។
អង្គការ FOUR PAWS ដដែល រកឃើញថា ការស៊ើបអង្កេតរបស់អង្គការនេះដែលបានចុះទៅកាន់ហាងលក់សាច់ឆ្កែចំនួន ១១០កន្លែង នៅក្នុងរាជធានីភ្នំពេញ ក្នុងនោះ ហាងភាគច្រើន ទើបតែចាប់ផ្តើមបើកអំឡុងពេលពីរឆ្នាំចុងក្រោយប៉ុណ្ណោះ ដោយសារតែមុខរបរជួញដូរនេះមានការកើនឡើងជាបន្តបន្ទាប់៕