អ្នកនាំពាក្យក្រសួងសាធារណការ អះអាងថា ខ្សែរថភ្លើងចេញចូលព្រលានយន្តហោះអន្តរជាតិភ្នំពេញ គឺបិទជាបណ្ដោះអាសន្នប៉ុណ្ណោះ ដោយគ្មានបំណងបិទជាអចិន្ត្រៃយ៍នោះទេ។
ការបញ្ជាក់នេះគឺបន្ទាប់ពីរដ្ឋមន្ត្រីក្រសួងសាធារណការ លោក ស៊ុន ចាន់ថុល បានប្រកាសកាលពីថ្ងៃទី៧ ខែកក្កដា ថាក្រសួងកំពុងពិចារណាក្នុងការបិទផ្លូវរថភ្លើងពីស្ថានីយភ្នំពេញទៅព្រលានយន្តហោះ ដោយសារគ្មានអ្នកជិះ។
លោកថា៖ «យើងខ្ញុំកំពុងពិចារណាគួរតែបិទផ្លូវរថភ្លើងពីស្ថានីយភ្នំពេញមកព្រលានយន្តហោះអន្តរជាតិភ្នំពេញដែរទេ? ព្រោះថាគ្មានអ្នកជិះ។ ដូច្នេះបិទបានគួរតែបិទទៅ ដោយថា អាចបង្កគ្រោះថា្នក់តាមខ្សែរត់»។
អ្នកនាំពាក្យក្រសួងសាធារណការ និងដឹកជញ្ចូន ផ្នែកថែទាំផ្លូវដែក លោក លី បូរិន មានប្រសាសន៍ប្រាប់VOD នៅថ្ងៃទី៨ ខែកក្កដា ថាក្រសួងពុំមានបំណងក្នុងការបិទខ្សែរថភ្លើងទៅព្រលានយន្តហោះរហូតនោះទេ គឺគ្រាន់តែបិទបណ្ដោះអាសន្នប៉ុណ្ណោះ ដើម្បីឱ្យក្រុមហ៊ុនរៀបចំជួសជុល និងគូសគំនូសផ្លូវបញ្ចៀសគ្រោះថ្នាក់។
លោកបន្តថា ខ្សែរថភ្លើងស្ថានីយភ្នំពេញទៅអាកាសយានដ្ឋានអន្តរជាតិភ្នំពេញ នឹងចាប់បើកឡើងវិញនៅពេលជំងឺកូវីដ១៩ ត្រូវបានទប់ស្កាត់ ហើយមានការហោះហើរឡើងវិញ។
លោកថ្លែងថា៖ «កន្លងមក យើងជោគជ័យ ដោយបងប្អូនប្រើប្រាស់រថភ្លើងជារឿយៗពេលទៅព្រលានយន្តហោះ។ ក៏ប៉ុន្តែ ដោយសារពេលចេញពីភ្នំពេញទៅព្រលានមានបញ្ហាផ្លូវ ខាងផ្លូវ ដោយបងប្អូនប្រជាពលរដ្ឋរស់នៅអមសងខាងផ្លូវជិតពេក ហើយផ្លូវខ្វាត់ខ្វែងច្រើនពេក ទើបបង្កគ្រោះថ្នាក់»។
ខ្សែរថភ្លើងចេញចូលព្រលានយន្តហោះអន្តរជាតិភ្នំពេញ មានប្រវែង ១៧០០ម៉ែត្រ បានបើកដំណើរការកាលពីថ្ងៃទី១០ ខែមេសា ឆ្នាំ២០១៨ ដោយមកទល់ពេលបច្ចុប្បន្នមានរយៈពេលជាង ២ឆ្នាំមកហើយ ក្រោមការសហការគ្នារវាងក្រសួងសាធារណការ និងដឹកជញ្ជូន ជាមួយនឹងក្រុមហ៊ុនរ៉ូយាល់រេវ៉េ (Royal Group)។ តម្លៃសំបុត្រនៃការធ្វើដំណើរពីស្ថានីយរថភ្លើងភ្នំពេញទៅកាន់ព្រលានយន្តហោះអន្តរជាតិភ្នំពេញ មានតម្លៃ ១ម៉ឺនរៀលសម្រាប់មួយជើង ដោយប្រើរយៈពេល ៣០នាទីក្នុងការធ្វើដំណើរ។
តាមអ្នកនាំពាក្យក្រសួងសាធារណការ ខ្សែរថភ្លើងពីស្ថានីយភ្នំពេញទៅអាកាសយានដ្ឋានអន្តរជាតិភ្នំពេញ បានបិទជាបណ្ដោះអាសន្នកាលពីខែកុម្ភៈកន្លងទៅ ដោយសារការបារម្ភនៃការរាតត្បាតជំងឺកូវីដ១៩ មិនមានអ្នកជិះ និងបង្កគ្រោះថ្នាក់៕