សមាគមរោងចក្រកាត់ដេរនៅកម្ពុជា (GMAC) ស្នើទៅអង្គការអន្តរជាតិខាងការងារ (ILO) និងអង្គការពាក់ព័ន្ធ ឱ្យជួយគាំទ្រដល់ការអំពាវនាវរបស់ខ្លួនដែលទាមទារទៅគណៈកម្មការអឺរ៉ុបឱ្យពន្យារពេលដកហូតពីកម្ពុជានូវផ្នែកខ្លះនៃប្រព័ន្ធអនុគ្រោះពន្ធ«អ្វីគ្រប់យ៉ាងលើកលែងតែអាវុធ» ឬ EBA។
ក្នុងសេចក្តីថ្លែងការណ៍មួយចុះថ្ងៃទី៨ ខែកក្កដា សមាគមរោងចក្រកាត់ដេរនៅកម្ពុជា (GMAC) បានលើកឡើងថា កាលពីថ្ងៃទី២ ខែកក្កដា អង្គការ ILO បានហៅ GMAC ទៅចូលរួមពិគ្រោះយោបល់អំពីអាទិភាពរបស់ GMAC ក្នុងកម្មវិធីមួយដែល ILO ដាក់ចំណងជើងថា «កម្មវិធី Call to Action ក្នុងឧស្សាហកម្ម» ដើម្បីឆ្លើយតបនឹងផលប៉ះពាល់នៃជំងឺកូវីដ១៩ លើវិស័យកាត់ដេរនៅកម្ពុជា ដែលកម្មវិធីនេះគាំទ្រដោយ ILO អ្នកបញ្ជាទិញអន្តរជាតិ និងអង្គការពាក់ព័ន្ធផ្សេងទៀត។
សេចក្តីថ្លែងការណ៍ដដែល ឱ្យដឹងថា ក្នុងកម្មវិធី Call to Action គឺពិភាក្សាអំពីរបៀបគាំទ្ររោងចក្រឱ្យរស់រានអំឡុងវិបត្តិសេដ្ឋកិច្ចដែលបង្កឡើងដោយជំងឺកូវីដ១៩ និងរបៀបការពារតម្រូវការគាំទ្រប្រាក់ចំណូលរបស់កម្មករក្នុងវិស័យវាយនភណ្ឌកាត់ដេរនៅកម្ពុជា។
GMAC ឱ្យដឹងថា ការពិគ្រោះយោបល់នៅក្នុងកម្មវិធី Call to Action របស់ ILO នោះ គឺ GMAC បានបង្ហាញក្តីបារម្ភ និងលើកឡើងបន្ទាន់អំពីផលប៉ះពាល់ទីពីរនាពេលខាងមុខរបស់វិស័យកាត់ដេរសម្លៀកបំពាក់ ផលិតផលធ្វើដំណើរ និងស្បែកជើងនៅប្រទេសកម្ពុជា ដែលប្រឈមនឹងអឺរ៉ុបដក EBA នៅថ្ងៃទី១២ ខែសីហា។
GMAC បញ្ជាក់ថា ប្រសិនបើអឺរ៉ុបអនុវត្តការដកប្រព័ន្ធអនុគ្រោះពន្ធ EBA ពីកម្ពុជា ដែលគ្រោងចាប់ផ្ដើមនៅថ្ងៃទី១២ ខែសីហាខាងមុខ នឹងនាំឱ្យរោងចក្រជាច្រើនទៀតបិទទ្វារ ហើយកម្មករក្នុងចំនួនដ៏ច្រើននឹងបាត់បង់ការងារ ខណៈបច្ចុប្បន្ន GMAC ថា មានរោងចក្រប្រមាណ ៤០០រោងចក្របានព្យួរការងារ និងកម្មករជាង ១៥ម៉ឺននាក់ បានបាត់បង់ការងាររួចទៅហើយនោះ។
GMAC អះអាងថា ក្រោយពិគ្រោះយោបល់ជាមួយអង្គការ ILO និងអង្គការពាក់ព័ន្ធក្នុងកម្មវិធី Call to Action រួចមក រហូតមកដល់ពេលនេះ វិស័យវាយនភណ្ឌកាត់ដេរនៅកម្ពុជាមិនទទួលបានអត្ថប្រយោជន៍រឹងមាំពាក់ព័ន្ធនឹងតម្រូវការកម្មវិធីគាំទ្រផ្នែកឥណទាន ឬការគាំទ្រចំណូល ឬសំណាញ់សុវត្ថិភាពសង្គមសម្រាប់កម្មករនៅក្នុងវិស័យវាយនភណ្ឌកាត់ដេរនៅឡើយទេ។
GMAC បានស្នើទៅអង្គការ ILO និងស្ថាប័នពាក់ព័ន្ធទាំងអស់ដែលគាំទ្រកម្មវិធី Call to Action ជំរុញ និងគាំទ្របន្ទាន់ដល់ការអំពាវនាវរបស់ GMAC ដែលស្នើទៅគណៈកម្មការអឺរ៉ុប និងសភាអឺរ៉ុបឱ្យពន្យារពេលដកផ្នែកខ្លះនៃប្រព័ន្ធអនុគ្រោះពន្ធ«អ្វីគ្រប់យ៉ាងលើកលែងតែអាវុធ» ឬ EBA ពីកម្ពុជា។
សមាគមរោងចក្រកាត់ដេរនៅកម្ពុជា GMAC បានស្នើចំនួន ៣ដងរួចមកហើយទៅគណៈកម្មការអឺរ៉ុប ដើម្បីសុំសហគមន៍មួយនេះ ពន្យារពេលដកផ្នែកខ្លះនៃប្រព័ន្ធអនុគ្រោះពន្ធ EBA ពីកម្ពុជា៕
