ក្រសួងផែនការបានសម្រេចឱ្យមន្ត្រីរបស់ខ្លួនពិនិត្យឡើងវិញទៅលើការកំណត់អត្តសញ្ញាណពលរដ្ឋក្រីក្រដល់ពលរដ្ឋអំឡុងពេលកូវីដ១៩ បន្ទាប់ពីរកឃើញថា គ្រួសារមួយចំនួនដែលមានបណ្ណសមធម៌នោះ មានជីវភាពធូរធារ។
ក្រសួងមួយនេះបានសម្រេចបែបនេះ បន្ទាប់ពីកម្មវិធីឧបត្ថម្ភសាច់ប្រាក់ជូនដល់គ្រួសារក្រីក្រ ឬងាយរងគ្រោះអំឡុងកូវីដ១៩ ត្រូវបានអនុវត្តបានរយៈពេល ២សប្ដាហ៍កន្លងមកហើយនោះ។
សេចក្ដីប្រកាសចុះថ្ងៃទី១៣ ខែកក្កដា ក្រសួងផែនការនិយាយថា រយៈពេល ២សប្ដាហ៍កន្លងមកនេះ ក្រសួងរកឃើញភាពមិនប្រក្រតីនានា ដូចជា គ្រួសារមួយចំនួនដែលកាន់បណ្ណសមធម៌បានហួសសុពលភាព ហើយគ្រួសារក្រីក្រមួយចំនួននៅពុំទាន់មានបណ្ណសមធម៌នៅឡើយ។
ក្រសួងនិយាយទៀតថា គ្រួសារមួយចំនួនបានចាប់ផ្ដើមបំបែកសមាជិក ឬបង្កើតគ្រួសារថ្មី ដើម្បីទទួលបានបណ្ណសមធម៌ ខណៈគ្រួសារមួយចំនួនទៀតមានជីវភាពធូរធារហើយ ប៉ុន្តែបែរជាមានបណ្ណសមធម៌ទទួលប្រាក់ឧបត្ថម្ភពីរដ្ឋាភិបាលទៀត។
ក្រសួងផែនការប្រាប់ឱ្យមន្ត្រីដែលចុះដល់មូលដ្ឋាន ត្រូវកំណត់អត្តសញ្ញាណកម្មគ្រួសារក្រីក្រ និងប្រាប់ពីរបៀបស្នើសុំបណ្ណសមធម៌ទៅគ្រួសារដែលកាន់បណ្ណអស់សុពលភាព ដើម្បីទទួលបានប្រាក់ឧបត្ថម្ភពីរដ្ឋាភិបាលអំឡុងពេលកូវីដ១៩។
ក្រសួងផែនការក៏ប្រាប់ទៅមន្ត្រីរបស់ខ្លួនឱ្យដកបណ្ណសមធម៌ ឬបណ្ណក្រីក្រពីគ្រួសារដែលមានជីវភាពធូរធារមកវិញ ដោយថា ដើម្បីបង្ហាញពីតម្លាភាព និងបញ្ចៀសការតវ៉ានានាពីប្រជាពលរដ្ឋក្រីក្រ និងរងគ្រោះ។
វីអូឌីបានទូរសព្ទ និងផ្ញើសំណួរតាមប្រព័ន្ធតេឡេក្រាមទៅអ្នកនាំពាក្យទាំង៣រូបរបស់ក្រសួងផែនការ រួមមាន លោក ណុប កនណាវុឌ្ឍ លោក ស្រី ដា និងលោក ជ័យ ណាត ប៉ុន្តែ គ្មានអ្នកទទួលនោះឡើយ។ រដ្ឋមន្ត្រីក្រសួងផែនការ លោក ឆាយ ថន ក៏មិនបានឆ្លើយតបនឹងសំណួរអ្នកសារព័ត៌មាននៅក្នុងបណ្ដាញតេឡេក្រាមនោះឡើយគិតមកដល់ពេលនេះ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គិមអេង ចាត់ទុកករណីនេះថា មានជាប់ពាក់ព័ន្ធនឹងអំពើពុករលួយ។ លោកបន្តថា បើសិនរដ្ឋាភិបាលមិនចាត់វិធានការទេ លោកថា ថវិកាដែលចំណាយទៅមិនបានជួយដល់ពលរដ្ឋក្រីក្រពិតប្រាកដ ហើយ រដ្ឋាភិបាលត្រូវខាតធនធានបន្ថែមទៀត។
លោក យ៉ង់ គិមអេង ប្រាប់ថា៖ «ពង្រីកការតាមដាន និងត្រួតពិនិត្យហ្នឹង គឺទៅមើលដោយផ្ទាល់នៅឃុំសង្កាត់ ហើយឱ្យមានអ្នកឯករាជ្យទៅចូលរួម ហើយឱ្យមានការតាមដានពីសង្គមស៊ីវិល ហើយឱ្យមានប្រព័ន្ធរាយការណ៍ដែលអាចឱ្យប្រជាពលរដ្ឋគាត់រាយការណ៍ជូនបានថា តើអ្នកណាខ្លះដែលគេមើលឃើញអត់ក្រីក្រ ដើម្បីឱ្យមានតម្លាភាពក្នុងការផ្ដល់បណ្ណសមធម៌និងការឧបត្ថម្ភរបស់រដ្ឋាភិបាលក្នុងអំឡុងពេលកូវីដ១៩»។
កាលពីថ្ងៃទី៣០ ខែមិថុនាកន្លងមកនេះ លោកនាយករដ្ឋមន្ត្រី ហ៊ុន សែន ព្រមានចាត់វិធានការលើអាជ្ញាធរមូលដ្ឋាន ប្រសិនបើរកឃើញភាពមិនប្រក្រតីនៅក្នុងដំណើរការផ្ដល់ប្រាក់ឧបត្ថម្ភទៅដល់ពលរដ្ឋក្រីក្រនៅតាមមូលដ្ឋាន។
កាលពីថ្ងៃទី២២ ខែមិថុនាកន្លងមកនេះ លោកនាយករដ្ឋមន្ត្រី ហ៊ុន សែន ប្រកាសថា រដ្ឋាភិបាលចំណាយប្រាក់ ២៥លានដុល្លារក្នុងមួយខែៗសម្រាប់ជួយដល់ពលរដ្ឋក្រីក្រ និងពលរដ្ឋងាយរងគ្រោះប្រមាណ ៦០ម៉ឺនគ្រួសារ បណ្ដាលមកពីការរីករាលដាលនៃវីរុសកូរ៉ូណា ដែលត្រូវបានកំណត់អត្តសញ្ញាណថាជាពលរដ្ឋក្រីក្រ ឬងាយរងគ្រោះ៕