ពេលវេលាជាក់លាក់នៃការបញ្ជូនសេចក្ដីព្រាងច្បាប់ស្ដីពីសិទ្ធិទទួលបានព័ត៌មានទៅទីស្ដីការគណៈរដ្ឋមន្ត្រី នៅតែមិនទាន់ត្រូវបានកំណត់ជាក់លាក់នៅឡើយទេ បើទោះបីជាមន្ត្រីក្រសួងព័ត៌មានអះអាងកាលពីខែមុនថា នឹងបញ្ជូនសេចក្ដីព្រាងច្បាប់នេះទៅទីស្ដីការគណៈរដ្ឋមន្ត្រីនៅខែនេះក្ដី។
អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក មាស សុភ័ណ្ឌ បានថ្លែងប្រាប់វីអូឌីកាលពីចុងខែមិថុនាកន្លងមកថា សេចក្ដីព្រាងច្បាប់ស្ដីពីសិទ្ធិទទួលបានព័ត៌មាន ដែលត្រូវបានផ្ដួចផ្ដើមព្រាងឡើងអស់រយៈពេលជាង ១០ឆ្នាំមកហើយនោះ នឹងត្រូវបញ្ជូនទៅទីស្ដីការគណៈរដ្ឋមន្ត្រីពិនិត្យនៅក្នុងខែកក្កដានេះ។
ប៉ុន្តែ លោក មាស សុភ័ណ្ឌ បានប្រាប់វីអូឌីនៅថ្ងៃនេះថា សេចក្ដីព្រាងច្បាប់នេះនៅមិនទាន់ត្រូវបានបញ្ជូនទៅទីស្ដីការគណៈរដ្ឋមន្ត្រីពិនិត្យនៅឡើយទេរហូតមកដល់ពាក់កណ្ដាលខែនេះ ដោយលោកថា ក្រសួងកំពុងរៀបចំឯកសារពាក់ព័ន្ធឱ្យស្របតាមការណែនាំរបស់ទីស្តីការគណៈរដ្ឋមន្ត្រី។
នៅពេលត្រូវបានសាកសួរថា តើឯកសារពាក់ព័ន្ធទាំងនោះមានអ្វីខ្លះ អ្នកនាំពាក្យរូបនេះពុំបានបកស្រាយលម្អិតនោះឡើយ ហើយប្រាប់ថា ក្រសួងប្ដេជ្ញាជំរុញសេចក្ដីព្រាងច្បាប់នេះឱ្យចេញនៅក្នុងឆ្នាំនេះ។
លោក មាស សុភ័ណ្ឌ ប្រាប់ថា៖ «ជាការប្តេជ្ញាចិត្តរបស់ក្រសួង ក៏ដូចជារាជរដ្ឋាភិបាល គឺយើងចង់ពន្លឿនឱ្យសេចក្តីព្រាងច្បាប់នេះត្រូវបានអនុម័តនៅក្នុងអំឡុងឆ្នាំនេះតែម្តង[ឆ្នាំ២០២០] យើងកំពុងរៀបចំ ហើយយើងនឹងបញ្ជូនទៅក្នុងកំឡុងពេលដ៏ឆាប់ខាងមុខនេះហើយ»។
អ្នកនាំពាក្យទីស្ដីការគណៈរដ្ឋមន្ត្រី លោក ឯក ថា ប្រាប់ថា សេចក្ដីព្រាងច្បាប់នេះនៅមិនទាន់ត្រូវបានបញ្ជូនទៅគណៈរដ្ឋមន្ត្រីនោះឡើយ។ នៅពេលត្រូវបានសាកសួរបន្ថែមអំពីនីតិវិធី និងឯកសារពាក់ព័ន្ធដែលទីស្ដីការគណៈរដ្ឋមន្ត្រីតម្រូវទៅក្រសួងព័ត៌មានឱ្យបំពេញបន្ថែមនោះ លោក ឯក ថា បដិសេធបកស្រាយ ហើយបានប្រាប់ឱ្យសាកសួរទៅខាងក្រសួងព័ត៌មានវិញ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានលើកឡើងថា ក្រសួងព័ត៌មានគួរតែពន្លឿនការបញ្ជូនសេចក្តីព្រាងច្បាប់នេះទៅទីស្តីការគណៈរដ្ឋមន្ត្រីពិនិត្យ និងបញ្ជូនទៅរដ្ឋសភាអនុម័តច្បាប់នេះ ដោយលោកថា ដើម្បីផ្តល់ប្រយោជន៍ដល់អ្នកសារព័ត៌មាន រួមទាំងប្រជាពលរដ្ឋផងដែរ។
លោក ណុប វី និយាយថា៖ «យើងមានសិទ្ធិទទួលបានព័ត៌មាន ក៏ប៉ុន្តែ នៅពេលដែលអត់មានច្បាប់ គឺសិទ្ធិរបស់យើងមិនត្រូវបានគោរព ឬក៏មិនត្រូវបានអនុវត្តឱ្យមានប្រសិទ្ធភាព។ នេះជាបញ្ហាមួយដែលកំពុងកើតមានឡើងមិនត្រឹមតែអ្នកសារព័ត៌មានទេ ក៏ប៉ុន្តែ ទៅលើប្រជាពលរដ្ឋទូទៅដែរ»។
សេចក្តីព្រាងច្បាប់ស្តីពីសិទ្ធិទទួលបានព័ត៌មាននេះ មាន ១០ជំពូក ៣៦មាត្រា ហើយការតាក់តែងសេចក្តីព្រាងច្បាប់នេះបានធ្វើឡើងតាំងពីឆ្នាំ២០០៤ ពោលគឺជាង ១០ឆ្នាំមកហើយ។
ក្នុងជំនួបលើកទី៣ជាមួយអ្នកសារព័ត៌មានកាលពីដើមឆ្នាំ២០១៩កន្លងមក លោកនាយករដ្ឋមន្ត្រី ហ៊ុន សែន បានប្រកាសគាំទ្រ និងធានាឱ្យមានច្បាប់ស្តីពីសិទ្ធិទទួលបានព័ត៌មានក្នុងនីតិកាលទី៦នេះផងដែរ៕