រដ្ឋាភិបាលអាល្លឺម៉ង់ ប្រកាសផ្តល់ថវិកាចំនួន១លានអឺរ៉ូ (ប្រមាណជាង១លានដុល្លារ) ដល់រដ្ឋាភិបាលកម្ពុជា ដើម្បីជួយដល់កម្មវិធីផ្ទេរប្រាក់សម្រាប់ជនក្រីក្រ។
ក្នុងសេចក្តីប្រកាសព័ត៌មានចុះថ្ងៃទី១៤ ខែកក្កដា ស្ថានទូតអាល្លឺម៉ង់ប្រចាំកម្ពុជា ឱ្យដឹងថា ទឹកប្រាក់ជាង១លានដុល្លារនេះ គឺយកមកគាំទ្រដល់បច្ចេកទេសនៃកម្មវិធីផ្ដល់ប្រាក់ដល់ជនក្រីក្រនៅកម្ពុជា។
ក្នុងសេចក្តីប្រកាសនោះសរសេរថា៖ «ប្រទេសអាល្លឺម៉ង់ និងប្រទេសអូស្រ្តាលី បានធ្វើការជាមួយក្រសួងផែនការតាមរយៈទីភ្នាក់ងារកិច្ចសហប្រតិបត្តិការអាលឺ្លម៉ង់ GIZ ក្នុងរយៈពេលជាង១០ឆ្នាំ ក្នុងការបង្កើត និងថែរក្សាប្រព័ន្ធសំរាប់អត្តសញ្ញាណកម្មប្រជាជនក្រីក្រ និងគ្រួសារងាយរងគ្រោះ។ ប្រព័ន្ធទិន្នន័យអត្ដសញ្ញាណកម្មគ្រួសារក្រីក្រត្រូវបានធ្វើបច្ចុប្បន្នភាពជាទៀងទាត់។ វាមានសារៈសំខាន់ខ្លាំងណាស់សម្រាប់ការគ្រប់គ្រងផ្ទេរសាច់ប្រាក់សម្រាប់ប្រជាជនក្រីក្រ ដែលត្រូវបានបង្កើតឡើងដោយព្រះរាជាណាចក្រកម្ពុជានាពេលថ្មីៗនេះ»។
ឯកអគ្គរដ្ឋទូតអាល្លឺម៉ង់ប្រចាំកម្ពុជា លោក Christian Berger បានលើកឡើងក្នុងសេចក្តីប្រកាសនោះថា ការគាំទ្រដល់ជនក្រីក្រគឺជាចំណាត់ការដ៏ត្រឹមត្រូវដើម្បីគាំពារផលប៉ះពាល់សេដ្ឋកិច្ច ហើយប្រទេសអាល្លឺម៉ង់មានសេចក្តីរីករាយក្នុងការជួយដល់កម្ពុជាក្នុងកិច្ចការនេះ។
គិតមកដល់ពេលនេះ រដ្ឋាភិបាលអាល្លឺម៉ង់ និងអូស្រា្តលី គាំទ្រលើកម្មវិធីអត្តសញ្ញាណកម្មគ្រួសារក្រីក្រ (ID Poor) មកលើកម្ពុជា មានទឹកប្រាក់ចំនួនសរុបប្រមាណ១៨លានដុល្លារអាមេរិក។
បើតាមស្ថានទូតអាល្លឺម៉ង់នៅកម្ពុជា បច្ចុប្បន្នប្រជាជនកម្ពុជាចំនួន៥៦ម៉ឺនគ្រួសារ ដែលស្មើនឹងមនុស្សជាង២,៣លាននាក់ មានសិទ្ធិទទួលបានសាច់ប្រាក់សម្រាប់ជនក្រីក្រនេះ។
កាលពីថ្ងៃទី២៤ ខែមិថុនា ឆ្នាំ២០២០ រាជរដ្ឋាភិបាលបានប្រកាសផ្ដល់ប្រាក់ជូនពលរដ្ឋក្រីក្រចំនួនប្រមាណ៦០ម៉ឺនគ្រួសារ ក្នុងរង្វង់ទឹកប្រាក់ចំនួន២៥លានដុល្លារ៕
