អតីតអ្នកបកប្រែបណ្ដាញព័ត៌មានរុស្ស៊ី លោក រ៉ាត់ រត្នមុនី និយាយថា លោកសង្ឃឹមថា តុលាការថ្នាក់ក្រោមនឹងទម្លាក់ចោលបទចោទប្រកាន់លើរូបលោក ហើយដោះលែងលោកឱ្យមានសេរីភាពវិញ បន្ទាប់ពីតុលាការកំពូលបានសម្រេចបង្គាប់ទៅសាលាឧទ្ធរណ៍ឱ្យជំនុំជម្រះសំណុំរឿងនេះឡើងវិញ។
លោក រ៉ាត់ រត្នមុនី បានបង្ហាញក្ដីសង្ឃឹមបែបនេះ បន្ទាប់ពីប្រធានក្រុមប្រឹក្សាជំនុំជម្រះនៃតុលាការកំពូល អ្នកស្រី គឹម សត្ថាវី នៅព្រឹកថ្ងៃនេះ បានសម្រេចបដិសេធការសម្រេចក្ដីរបស់សាលាឧទ្ធរណ៍ ហើយបានបង្វិលសំណុំរឿងចោទប្រកាន់រូបលោកទៅសាលាឧទ្ធរណ៍ឱ្យជំនុំជម្រះឡើងវិញ ដោយថា ការសម្រេចសេចក្ដីកន្លងមកមិនបានត្រឹមត្រូវនោះទេ។
លោកស្រី គឹម សត្ថាវី ប្រកាសថា៖ «តុលាការកំពូល[ឱ្យ]ទៅសាលាឧទ្ធរណ៍ជំនុំជម្រះសារជាថ្មី»។
សាលាដំបូងរាជធានីភ្នំពេញ និងសាលាឧទ្ធរណ៍ បានសម្រេចផ្ដន្ទាទោសលោក រ៉ាត់ រត្នមុនី ឱ្យជាប់ពន្ធនាគាររយៈពេល ២ឆ្នាំ និងសងជំងឺចិត្តទៅជនរងគ្រោះ ក្រោមការចោទប្រកាន់ពីបទ«ញុះញង់ឱ្យមានការរើសអើង»ពាក់ព័ន្ធនឹងការផលិតខ្សែភាពយន្តឯកសារចំណងជើងថា«ម្ដាយខ្ញុំលក់ខ្ញុំ»។
ប្រាប់អ្នកសារព័ត៌មាននៅកន្លែងរង់ចាំមុនពេលមន្ត្រីនាំទៅពន្ធនាគារវិញ លោក រ៉ាត់ រត្នមុនី បង្ហាញក្ដីសង្ឃឹមថា សាលាឧទ្ធរណ៍នឹងទម្លាក់ចោលការចោទប្រកាន់ និងដោះលែងលោកឱ្យមានសេរីភាពវិញ បន្ទាប់ពីតុលាការកំពូលសម្រេចបែបនេះ។
លោក រ៉ាត់ រត្នមុនី ប្រាប់ថា៖ «បើសិនជាតុលាការកំពូលបង្វិលទៅសាលាឧទ្ធរណ៍វិញ ខ្ញុំយល់ថា រឿងក្ដីខ្ញុំ តុលាការនឹងត្រូវទម្លាក់ចោលបទចោទ មានន័យថា តុលាការកំពូលមើលឃើញថា ការកាត់ក្ដីខ្ញុំនៅមានបញ្ហា អ៊ីចឹងហើយបានគាត់សុំឱ្យកាត់ឡើងវិញ។ អ៊ីចឹងខ្ញុំមានក្ដីសង្ឃឹមថា ខ្ញុំគ្មានទោស មិនបានធ្វើអ្វីខុសទេ»។
មេធាវីការពារក្ដីឱ្យលោក រ៉ាត់ រត្នមុនី គឺលោក ឡោ ជុនធី ប្រាប់ថា លោកចាត់ទុកការបង្វិលសំណុំរឿងនេះជារឿងល្អសម្រាប់កូនក្ដីលោកក្នុងការជជែកដេញដោលជាមួយសាលាឧទ្ធរណ៍ឡើងវិញ ប៉ុន្តែ លោកចង់ឱ្យតុលាការកំពូលសម្រេចដោះលែងកូនក្ដីលោកឱ្យមានសេរីភាព។
លោក ឡោ ជុនធី ប្រាប់ថា៖ «ប្រសិនបើមានបញ្ហាអីចំណុចអីដែលសាលាឧទ្ធរណ៍គាត់ថារកមិនឃើញនៅដដែល អ៊ីចឹងគាត់មានសិទ្ធិរក្សានូវសាលដីកាដដែល។ បើរក្សាសាលដីកាដដែល មានន័យថា កូនក្ដីរបស់យើងនឹងរងទោសទណ្ឌដដែល រយៈពេល២ឆ្នាំ។ បើសិនគាត់ដដែល យើងអាចមានសិទ្ធិមួយទៀតប្ដឹងសាទុក្ខលើកទី២ដែរ ដើម្បីជូនទៅតុលាការកំពូលពិនិត្យពិចារណាទាំងអង្គហេតុ និងអង្គច្បាប់»។
មន្ត្រីអង្កេតជាន់ខ្ពស់សមាគមការពារសិទ្ធិមនុស្សអាដហុក លោក យី សុខសាន្ត ដែលតាមដានការប្រកាសសាលដីកានៅថ្ងៃនេះ លោក រ៉ាត់ រត្នមុនី គួរត្រូវបានដោះលែងឱ្យមានសេរីភាព ជាជាងសេចក្ដីសម្រេចបង្វែរសំណុំរឿងបែបនេះ ដែលលោកថា នឹងធ្វើឱ្យប៉ះពាល់អារម្មណ៍ និងសិទ្ធិសេរីភាពរបស់លោក។
លោក យី សុខសាន្ត ប្រាប់ថា៖ «ខ្ញុំយល់ថា តុលាការសព្វថ្ងៃ គាត់អត់យល់សិទ្ធិសេរីភាពរបស់ប្រជាពលរដ្ឋទេ។ បើសិនជាលោក រ៉ាត់ រត្នមុនី គាត់នៅក្រៅឃុំ ទោះបីបង្វិលសំណុំរឿង ក៏អត់បញ្ហាដែរ ប៉ុន្តែ នេះគាត់នៅក្នុងឃុំ ហើយអ្វីដែលគាត់ទទួលទោស បានលើសពី ២ភាគ៣ទៅទៀត។ ដូច្នេះ តុលាការកំពូលគួរតែលើកលែងទោសឱ្យគាត់ ឬមួយកាត់តម្រឹមឱ្យមានសេរីភាព វាត្រឹមត្រូវជាងគាត់បង្វិលឱ្យជម្រះក្ដីសំណុំរឿងនេះឡើងវិញ»។
លោក រ៉ាត់ រត្នមុនី ត្រូវសមត្ថកិច្ចថៃចាប់ឃាត់ខ្លួននៅទីក្រុងបាងកកកាលពីខែធ្នូ ឆ្នាំ២០១៨។ នៅថ្ងៃទី២៦ ខែមិថុនា ឆ្នាំ២០១៩ លោកត្រូវបានសាលាដំបូងរាជធានីភ្នំពេញសម្រេចផ្តន្ទាទោសឱ្យជាប់ពន្ធនាគារ ២ឆ្នាំ ក្រោមការចោទប្រកាន់ពីបទ«ញុះញង់ឱ្យមានការរើសអើង» តាមការចោទប្រកាន់របស់ដើមបណ្តឹងចំនួន ៥នាក់ គឺលោក នាក់ សុទ្ធី នាយកសាលាឥន្ទ្រទេវី កញ្ញា គៀង ស្រីម៉េច កញ្ញា លឹម ស្រីទី អ្នកស្រី ទេព សាលីម និងអ្នកស្រី កែវ ម៉ាឡៃ ដែលសុទ្ធតែជាតួសម្ដែងនៅក្នុងខ្សែភាពយន្តឯកសាររឿង«ម្ដាយខ្ញុំលក់ខ្ញុំ»៕