ក្រសួងសុខាភិបាលឱ្យដឹងថា ក្នុងរយៈពេល៦ខែនៃឆ្នាំ២០២០ ចំនួនអ្នកផ្ទុកជំងឺគ្រុនឈាមមានការថយចុះជិត៩០ភាគរយបើធៀបនឹងឆ្នាំមុន។
ក្នុងសេចក្តីប្រកាសព័ត៌មានចុះថ្ងៃទី១៥ ខែកក្កដា ឆ្នាំ២០២០ ក្រសួងសុខាភិបាលឱ្យដឹងថា ចំនួនអ្នកឆ្លងជម្ងឺគ្រុនឈាមសរុបនៅក្នុងប្រទេសកម្ពុជាមានចំនួន ៣ ៣៣៩ករណីក្នុងរយៈពេល ប្រាំមួយខែ ក្នុងនោះមានករណីស្លាប់ចំនួន ៤ករណី ដោយបានថយចុះប្រមាណ៨៨ភាគរយបើធៀបទៅនឹងរយៈពេលដូចគ្នាកាលពីឆ្នាំ២០១៩ (២៨ ២៨៥ករណី ក្នុងនោះស្លាប់ ៣២នាក់)។
ក្រសួងសុខាភិបាលបានឱ្យដឹងថា៖ «ស្ថានភាពជម្ងឺគ្រុនឈាមក្នុងប្រទេសកម្ពុជាកំពុងស្ថិតនៅក្នុងស្ថានភាពធម្មតា ក្រោមការគ្រប់គ្រងយ៉ាងល្អរបស់កម្មវិធីប្រយុទ្ធនឹងជម្ងឺគ្រុនឈាមទូទាំងប្រទេស ដែលមានការចូលរួមអន្តរាគមន៍ និងសហការពេញលេញរបស់គ្រប់ដៃគូពាក់ព័ន្ធ និងប្រជាជនក្នុងសហគមន៍»។
ជាមួយគ្នានេះដែរ ក្រសួងក៏បានធ្វើការក្រើនរំឮកដល់ប្រជាជនផងដែរថា ការប្រយុទ្ធប្រឆាំងនឹងជម្ងឺមួយនេះគឺជាកាតព្វកិច្ចរបស់បុគ្គលម្នាក់ៗ ពោលគឺប្រជាជនទាំងអស់គួរតែមានទំនួលខុសត្រូវចំពោះការរស់នៅប្រចាំថ្ងៃរបស់ខ្លួន ដោយចូលរួមលុបបំបាត់ភ្នាក់ងារចម្លងមូលខ្លា និងដង្កូវទឹក រួសរាន់ទៅទទួលយកការធ្វើតេស្តវិនិច្ឆ័យ និងព្យាបាល។
ជំងឺគ្រុនឈាមនៅកម្ពុជា កាលពីឆ្នាំ២០១៩ ត្រូវបានក្រសួងសុខាភិបាលប្រកាសថាជាឆ្នាំដែលគ្រោះថ្នាក់នៃជំងឺ ដោយថា អាចកើតមានរហូតដល់៥ម៉ឺនករណី លើស៥ដងនៃឆ្នាំ២០១៨ ដោយសារឆ្នាំ២០១៩ជាឆ្នាំនៃវដ្ដជំងឺនេះ៕