ក្រសួងសុខាភិបាលរកឃើញករណីថ្មីនៃជំងឺកូវីដ-១៩ចំនួនមួយករណីថ្មីទៀត ដែលបានកើតទៅលើបុរសជនជាតិខ្មែរម្នាក់ដែលបានធ្វើដំណើរពីប្រទេសអារ៉ាប់ប៊ីសាអ៊ូឌីតត្រឡប់មកប្រទេសកម្ពុជា។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានឱ្យដឹងថា បុរសដែលបានធ្វើតេស្តវិជ្ជមានវីរុសកូវីដ-១៩ នេះមានអាយុ ២៥ឆ្នាំ មានទីលំនៅសព្វថ្ងៃនៅសង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ ដែលលោកបានធ្វើដំណើរតាមជើងហោះហើររបស់ប្រទេសអារ៉ាប់ប៊ីសាអ៊ូឌី មកកាន់ប្រទេសម៉ាឡេស៊ី រួចបានបន្តដំណើរមកប្រទេសកម្ពុជា កាលពីថ្ងៃទី១០ ខែកក្កដា ឆ្នាំ២០២០។
ក្រសួងបានបញ្ជាក់ថា បច្ចុប្បន្ន អ្នកជំងឺថ្មីម្នាក់នេះបានកំពុងសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ រីឯមនុស្សចំនួន ៦៩ផ្សេងទៀតដែលបានរួមដំណើរជាមួយបុរសម្នាក់នេះ ត្រូវបានសើ្នសុំឱ្យនៅដាច់ដោយឡែកនៅឯមណ្ឌលចត្តាឡីស័កជម្ពូវ័ន្តរាជធានីភ្នំពេញ។
បើគិតត្រឹមព្រឹកថ្ងៃទី១៦ ខែកក្កដា ឆ្នាំ២០២០នេះ ចំនួនអ្នកជាសះស្បើយពីជំងឺកូវីដ-១៩ នៅកម្ពុជាមានចំនួន ១៣៣នាក់ ក្នុងនោះមានស្រី ៣៩នាក់ ហើយអ្នកជំងឺ ៣៣នាក់ទៀត កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕