អាជ្ញាធរឧតុនិយមកម្ពុជាបានក្រើនរំឭកពលរដ្ឋឱ្យប្រុងប្រយ័ត្នចំពោះគ្រោះថ្នាក់បណ្ដាលមកពីបាតុភូតធម្មជាតិ ខណៈប្រកាសថា ស្ថានភាពអាកាសធាតុនៅកម្ពុជានឹងប្រែប្រួលរហូតដល់ដើមសប្ដាហ៍ក្រោយ។
ក្នុងសេចក្ដីជូនដំណឹងនៅសប្ដាហ៍នេះ ក្រសួងធនធានទឹក និងឧតុនិយម បានប្រកាសថា ខ្យល់មូសុងនិរតីនឹងបក់កាត់កម្ពុជាក្នុងល្បឿនលឿននៅចន្លោះថ្ងៃទី១៥ ដល់ថ្ងៃទី១៧ ខែនេះ មុននឹងចុះខ្សោយមកវិញចាប់ពីចុងសប្ដាហ៍នេះរហូតដល់ដើមសប្ដាហ៍ក្រោយ។
បើតាមការព្យាករនេះ ភ្លៀងធ្លាក់ក្នុងកម្រិតមធ្យមទៅបង្គួរ នឹងធ្លាក់រាយប៉ាយនៅតាមតំបន់ទាំង ៣របស់ប្រទេសកម្ពុជា។
ក្រសួងក៏បានព្រមានទៅពលរដ្ឋឱ្យប្រុងប្រយ័ត្នចំពោះបម្រែបម្រួលអាកាសធាតុបែបនេះ ដែលក្រសួងថា អាចបង្កឱ្យមានផ្គររន្ទះ និងខ្យល់កន្ត្រាក់៕