រដ្ឋាភិបាលបានសម្រេចកំណត់យកថ្ងៃឈប់សម្រាកចំនួន ៥ថ្ងៃនៅខែក្រោយនេះ ជាការឈប់សងថ្ងៃចូលឆ្នាំថ្មីប្រពៃណីខ្មែរដែលត្រូវបានផ្អាកកាលពីខែមេសាកន្លងមក។
ក្នុងសេចក្តីប្រកាសកាលពីថ្ងៃម្សិលមិញនេះ ក្រសួងការងារបានបញ្ជាក់ថា រដ្ឋាភិបាលសម្រេចអនុញ្ញាតឱ្យកម្មករនិយោជិតទាំងអស់ឈប់សម្រាកដោយទទួលបានប្រាក់ឈ្នួលរយៈពេល ៥ថ្ងៃ ចាប់ពីថ្ងៃទី១៧ ដល់ថ្ងៃទី២១ ខែសីហាខាងមុខនេះ។
ក្រសួងបញ្ជាក់ថា រដ្ឋាភិបាលកំណត់ពេលឈប់សម្រាក ៥ថ្ងៃនៅខែក្រោយនេះ គឺជាការឈប់សម្រាកសងទៅដល់កម្មករនិយោជិតទាំងអស់ ដែលមិនត្រូវបានអនុញ្ញាតឱ្យឈប់សម្រាកអំឡុងពិធីបុណ្យចូលឆ្នាំថ្មីប្រពៃណីជាតិខ្មែរកាលពីថ្ងៃទី១៣ ដល់ថ្ងៃទី១៦ ខែមេសាកន្លងមកនេះ។
រដ្ឋាភិបាលកម្ពុជាបានសម្រេចផ្អាកការរៀបចំប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរកាលពីខែមេសាកន្លងមកនេះ ដោយមិនអនុញ្ញាតឱ្យបុគ្គលិកកម្មករនិយោជិតឈប់សម្រាកនោះឡើយ ដោយសារតែក្ដីបារម្ភអំពីការរីករាលដាលនៃវីរុសកូរ៉ូណា។
រហូតមកដល់ថ្ងៃនេះ កម្ពុជាបានរកឃើញអ្នកឆ្លងវីរុសកូរ៉ូណាដល់ទៅ ១៦៦នាក់ហើយគិតចាប់តាំងពីចុងខែមករាដើមឆ្នាំនេះ ក្នុងនោះមានស្ត្រីឆ្លងវីរុសនេះសរុប ៤០នាក់ ប៉ុន្តែ ក្រសួងសុខាភិបាលបានប្រកាសថា អ្នកឆ្លងវីរុសនេះសរុបដល់ទៅ ១៣៣នាក់ហើយ ត្រូវបានព្យាបាលជាសះស្បើយ ហើយត្រូវបានអនុញ្ញាតឱ្យចាកចេញពីមន្ទីរពេទ្យ៕