រដ្ឋបាលខេត្តកោះកុង ប្រកាសមិនទទួលស្គាល់ការទិញលក់ដីស្ថិតក្នុងតំបន់ការពារធម្មជាតិ ក្រោយអាជ្ញាធររកឃើញថា តំបន់ការពារធម្មជាតិ និងគម្របព្រៃឈើស្ថិតក្នុងស្រុកមួយចំនួននៃខេត្តកោះកុង កំពុងទិញលក់យ៉ាងអនាធិបតេយ្យ។
ក្នុងសេចក្តីជូនដំណឹងមួយកាលពីថ្ងៃទី១៤ ខែកក្កដា រដ្ឋបាលខេត្តកោះកុងបានឱ្យដឹងថា នៅតាមបណ្តាភូមិឃុំជាពិសេសស្រុកបុទុមសាគរ ស្រុកកោះកុង ស្រុកគិរីសាគរ ស្រុកថ្មបាំង និងតំបន់មួយចំនួនទៀត មានការទិញលក់ដីស្ថិតក្នុងតំបន់ការពារធម្មជាតិ ដីសហគមន៍ និងគម្របព្រៃឈើយ៉ាងអនាធិបតេយ្យ។
សេចក្តីជូនដំណឹងដដែលលើកឡើងថា ការទិញលក់ដីធ្លីដោយមិនមានការចូលរួមចុះពិនិត្យ និងវាស់វែងត្រឹមត្រូវពីមន្ត្រីអាជ្ញាធរពាក់ព័ន្ធរបស់ខេត្តកោះកុង ហើយគ្រាន់តែមានការផ្តិតមេដៃរវាងអ្នកលក់ និងអ្នកទិញ គឺជាទង្វើខុសច្បាប់។
រដ្ឋបាលខេត្តកោះកុងបានចាត់ទុកសកម្មភាពទិញលក់ដីទាំងនោះជាមោឃៈ និងបដិសេធចោល ហើយថា អ្នកដែលទិញលក់ដីដែលពុំមានលក្ខណៈត្រឹមត្រូវតាមផ្លូវច្បាប់ នឹងប្រឈមការផ្តន្ទាទោសទៅតុលាការតាមផ្លូវច្បាប់។
រដ្ឋបាលខេត្តកោះកុងបានអំពាវនាវទៅដល់សាធារណជន និងប្រជាពលរដ្ឋ បញ្ឈប់ជាបន្ទាន់រាល់ការទិញលក់ដីធ្លីស្ថិតក្នុងតំបន់ការពារ ដើម្បីចៀសវាងទង្វើខុសច្បាប់ និងខាតបង់ផលប្រយោជន៍។
កាលពីថ្ងៃទី៣ ខែកក្កដា លោកនាយករដ្ឋមន្ត្រី ហ៊ុន សែន បានបញ្ជាទៅមន្ត្រីពាក់ព័ន្ធឱ្យកាត់ឆ្វៀលដីចេញពីតំបន់ការពារស្ថិតនៅខេត្តកោះកុង ខេត្តព្រះវិហារ និងបណ្តាខេត្តផ្សេងៗទៀត ដើម្បីបែងចែកទៅឱ្យប្រជាពលរដ្ឋដែលរស់នៅ និងអាស្រ័យផលយូរឆ្នាំ ដើម្បីធ្វើជាកម្មសិទ្ធិ។ ប៉ុន្តែ លោក ហ៊ុន សែន ក៏ស្នើទៅពលរដ្ឋកុំពង្រីក ឬរំលោភយកដីនៅតំបន់ការពារបន្ថែមទៀតផងដែរ៕
