ពលរដ្ឋនៅសហគមន៍បឹងឈូកអេ ស្ថិតក្នុងខណ្ឌឫស្សីកែវ អះអាងថា ពលរដ្ឋ ២០គ្រួសារ ប្រឈមមុខនឹងការបណ្ដេញចេញ ហើយផ្ទះសម្បែងរបស់ពួកគេប្រឈមមុខនឹងការឈូសឆាយដោយគ្មានសំណង។
អ្នកស្រី ទូច វណ្ណា អាយុ ៤៩ឆ្នាំ បានឱ្យដឹងថា អ្នកស្រីរស់នៅលើដីទំហំក្បាល ៥ម៉ែត្រ និងបណ្ដោយ ១៨ម៉ែត្រ នៅក្នុងសហគមន៍បឹងឈូកអេ ស្ថិតក្នុងសង្កាត់គីឡូម៉ែត្រលេខ៦ តាំងពីឆ្នាំ១៩៩៥មកម៉្លេះ។
អ្នកស្រី វណ្ណ ប្រាប់ថា ក្រុមសន្តិសុខខណ្ឌឫស្សីកែវបានប្រាប់អ្នកស្រីផ្ទាល់មាត់កាលពីថ្ងៃទី១៨ ខែមិថុនាកន្លងមកនេះ ឱ្យរុះរើផ្ទះចេញពីសហគមន៍នោះ ហើយថា របងផ្ទះពលរដ្ឋ ៣គ្រួសារក្នុងចំណោមពលរដ្ឋ ១៦គ្រួសារដែលមានជីវភាពធូរធារ ត្រូវបានឈូសឆាយកម្ទេចដោយគ្រឿងចក្រ ដែលអមការពារដោយកម្លាំងចម្រុះមានប៉េអឹម នគរបាល និងសន្តិសុខផងដែរ ដែលបានចុះទៅនាពេលនោះ មុននឹងពួកគេដកថយទៅវិញ ក្រោយក្រុមអ្នកសារព័ត៌មានចុះទៅរាយការណ៍អំពីសកម្មភាពនេះ។
អ្នកស្រី វណ្ណា បន្តថា នៅថ្ងៃទី១៦ ខែកក្កដានេះ ក្រុមកងសន្តិសុខសង្កាត់ និងខណ្ឌ បានមកប្រាប់ប្រជាសហគមន៍ថា ឱ្យពួកគេរុះរើផ្ទះចេញ ប៉ុន្តែ មិនមានលិខិតលាយលក្ខណ៍អក្សរអ្វីនោះទេ។
អ្នកស្រី ទូច វណ្ណា ប្រាប់ថា៖ «អភិវឌ្ឍន៍ ត្រូវប្រាប់ថា ត្រូវដកដីពីប្រជាពលរដ្ឋអភិវឌ្ឍន៍អ្វីមួយយកទៅសាងសង់អ្វីមួយ ត្រូវសាងសង់ ត្រូវធ្វើផ្លូវ ត្រូវធ្វើថ្នល់ សាងសង់អ្វីក៏ដោយ ត្រូវឱ្យប្រជាពលរដ្ឋបានដឹង ប៉ុន្តែ នេះអត់ដឹងទេ ដឹងតែឱ្យរុះរើ ឱ្យត្រៀមកាយត្រៀមចិត្ត។ អ៊ីចឹង ប្រជាពលរដ្ឋមានការភ័យខ្លាចតែម្តង រស់នៅក្នុងតំបន់ដែលត្រូវគេបណ្តេញចេញ វាពិបាកក្នុងអារម្មណ៍ វាខូចផ្លូវចិត្តច្រើន»។
អ្នកស្រី តូច ឡៃហ៊ាង អាយុ ៣១ឆ្នាំ ដែលប្រកបរបរលក់ដូរភេសជ្ជៈនៅលើដីទំហំ ៧ម៉ែត្រគុណនឹង១៨ម៉ែត្រ នៅក្នុងសហគមន៍ដែរនោះ និយាយថា ជីវភាពគ្រួសារ និងការសិក្សារៀនសូត្ររបស់កូនៗ ៣នាក់របស់អ្នកស្រី នឹងរងផលប៉ះពាល់ ប្រសិនបើអាជ្ញាធរបណ្ដេញក្រុមគ្រួសារអ្នកស្រីចេញពីទីនោះ។
អ្នកស្រី តូច ឡៃហ៊ាង និយាយថា៖ «ខ្ញុំចង់ឱ្យមានសំណងដោះដូរឱ្យពួកខ្ញុំសិន បើចឹងឱ្យពួកខ្ញុំទៅរស់នៅឯណា។ បើខ្ញុំរស់នៅទីហ្នឹងយូរណាស់មកហើយ[តាំងពីឆ្នាំ១៩៩៥] គ្មានដីធ្លីនៅឯណាទៀតទេ មានតែនៅកន្លែងហ្នឹង ហើយកូនសិក្សា និយាយទៅរឿងកូនប៉ះពាល់ខ្លាំងបំផុត ដោយសារគាត់នៅរៀន។ បើដោះដូរឱ្យខ្ញុំសមរម្យ អភិវឌ្ឍន៍នៅនឹងកន្លែង ខ្ញុំព្រម បើដេញខ្ញុំទៅឆៅៗតែម្តង ខ្ញុំមិនព្រមទេ»។
ប្រធានសហគមន៍បឹងឈូកអេ លោក តូច សំអ៊ន់ និងជាឪពុករបស់អ្នកស្រី ឡៃហ៊ាង ប្រាប់ថា តំណាងសហគមន៍បានដាក់លិខិតមួយទៅអភិបាលខណ្ឌឫស្សីកែវកាលពីចុងខែមិថុនាកន្លងមកនេះ ហើយដាក់លិខិតមួយទៀតទៅសាលារាជធានីភ្នំពេញនៅថ្ងៃទី១ ខែកក្កដានេះ ដើម្បីសុំអន្តរាគមន៍ដែរ ហើយអាជ្ញាធរបានទទួលលិខិតនោះដែរ ប៉ុន្តែ រហូតមកទល់ពេលនេះ មិនទាន់មានដំណោះស្រាយនៅឡើយ។
បន្ថែមពីនេះ លោក សំអ៊ន់ បញ្ជាក់ថា នៅព្រឹកថ្ងៃនេះ អាជ្ញាធរបញ្ជាឱ្យសន្តិសុខនៅសង្កាត់ និងខណ្ឌឫស្សីកែវ ប្រាប់ប្រជាសហគមន៍ថា ឱ្យត្រៀមរុះរើផ្ទះចេញនៅថ្ងៃនេះ បើពុំដូច្នេះទេ សមត្ថកិច្ចនឹងចុះរុះរើនៅថ្ងៃនេះ។
ប្រធានសហគមន៍រូបនោះអះអាងថា ពួកគេមិនប្រឆាំងនឹងគម្រោងអភិវឌ្ឍន៍របស់រដ្ឋាភិបាលនោះទេ ប៉ុន្តែ លោកថា ប្រជាសហគមន៍ស្នើទៅអាជ្ញាធរអភិវឌ្ឍនៅនឹងកន្លែង ឬផ្តល់សំណងសមរម្យ មុនបណ្តេញពួកគេចេញពីតំបន់នោះ។
លោក តូច សំអ៊ន់ ប្រាប់ថា៖ «ទោះបីធ្វើផ្លូវក្តី ធ្វើអ្វីក៏ដោយតាមលក្ខណៈជាក់ស្តែង សល់ប៉ុន្មាន ខ្ញុំរស់នៅប៉ុណ្ណឹង ខ្ញុំមិនប្រកែកនឹងការអភិវឌ្ឍរបស់រដ្ឋាភិបាលទេ ប៉ុន្តែ សុំអភិវឌ្ឍនៅនឹងកន្លែង សល់ប៉ុណ្ណាខ្ញុំនៅប៉ុណ្ណឹងទៅ»។
ទោះជាយ៉ាងណា សកម្មភាពឈូសឆាយមិនបានកើតឡើងដូចការអះអាងរបស់ប្រជាសហគមន៍នោះឡើយចាប់តាំងពីព្រឹករហូតដល់វេលាថ្ងៃត្រង់នៅថ្ងៃនេះ។
បើតាមប្រធានសហគមន៍ សកម្មភាពចុះឈូសឆាយរបងផ្ទះពលរដ្ឋ ត្រូវបានដឹកនាំបញ្ជាដោយអភិបាលរងខណ្ឌឫស្សីកែវ។ នៅពេលស្វែងរកការបកស្រាយជុំវិញគម្រោងឈូសឆាយនេះ លោក ប្រាជ្ញ សីហា សុំមិនធ្វើការបកស្រាយជុំវិញរឿងនេះតាមទូរសព្ទនោះទេ ដោយលោកថា បើអ្នកសារព័ត៌មានចង់សម្ភាស ឱ្យទៅជួបគាត់ផ្ទាល់វិញ។
នាយកប្រតិបត្តិសមាគមធាងត្នោត (STT) លោក សឿង សារ៉ន បានជំរុញទៅអាជ្ញាធរខណ្ឌឫស្សីកែវ ឱ្យជជែកជាមួយប្រជាសហគមន៍ជុំវិញវិវាទដីធ្លីនេះ ដើម្បីធានាដល់សិទ្ធិប្រជាពលរដ្ឋ។
លោក សឿង សារ៉ន ប្រាប់ថា៖ «ការបណ្តេញចេញ ឬក៏ការអភិវឌ្ឍដោយមិនបានចែករំលែកព័ត៌មានឱ្យបានគ្រប់គ្រាន់ដល់អ្នកពាក់ព័ន្ធ វាបង្កឱ្យមានភាពមិនច្បាស់លាស់សម្រាប់ពួកគាត់ ហើយសម្រាប់ខ្ញុំគិតថា ទម្លាប់បែបហ្នឹងគួរតែធ្វើការអភិវឌ្ឍឱ្យមានតម្លាភាព ធ្វើការបណ្តេញចេញប្រកបដោយសមធម៌ ឬការទទួលយកបានទាំងភាគីទាំងអស់ទទួលយកបាន»។
លោក តូច សំអ៊ន់ បានឱ្យដឹងទៀតថា ក្រៅពីលំនៅឋានដែលប្រឈមនឹងការឈូសឆាយផ្ទះចំនួន ២០គ្រួសារ (ក្នុងនោះមានសមាជិកសរុប ៧១នាក់) ក៏មាន ១៦គ្រួសារផ្សេងទៀត ដែលមានជីវភាពធូរធារស្ថិតនៅក្បែរនោះ ក៏ប្រឈមនឹងការឈូសឆាយដូចគ្នាផងដែរ។
ប្រធានសហគមន៍រូបនេះ អះអាងថា ចាប់តាំងពីពួកគាត់រស់នៅឆ្នាំ១៩៩៥ រហូតមកដល់ឆ្នាំ១៩៩៩ នៅតំបន់នោះមិនទាន់មានការអភិវឌ្ឍនៅឡើយ គឺនៅតំបន់នោះជាបឹងតភ្ជាប់មកពីបឹងពោងពាយទល់នឹងបឹងតាមោក បឹងកប់ស្រូវសព្វថ្ងៃ ហើយនៅកន្លែងនោះមានទឹកលិចជាប្រចាំ មិនថារដូវប្រាំង និងរដូវវស្សានោះទេ។ ពលរដ្ឋរស់នៅទាំងគ្មានទឹកស្អាត ភ្លើងអគ្គិសនី គ្មានសេវាសាធារណៈជាដើម។
ប៉ុន្តែ ក្រោយមក ចាប់ពីឆ្នាំ១៩៩៩ ដល់ឆ្នាំ២០០០ ទើបរដ្ឋាភិបាលចាប់ផ្តើមធ្វើការអភិវឌ្ឍនៅតំបន់នោះឱ្យមានទឹកស្អាត ភ្លើងអគ្គិសនី និងសេវាសាធារណៈជាបន្តបន្ទាប់ ហើយបច្ចុប្បន្ននេះ អាជ្ញាធរបែរជាបណ្តេញពួកគេចេញពីតំបន់នោះ ដោយមិនផ្តល់សំណង និងមិនបញ្ជាក់ពីមូលហេតុច្បាស់លាស់នោះទេ។
កាលពីថ្ងៃទី២៩ ខែមិថុនា ឆ្នាំ២០២០ សមាគមធាងត្នោតបានចេញរបាយការណ៍ថា ក្នុងអំឡុងពេលនៃការផ្ទុះរាលដាលមេរោគកូវីដ១៩ នៅក្នុងរាជធានីភ្នំពេញនៅតែមានការបណ្តេញចេញបន្តបន្ទាប់ដូចជាករណីនៅមាត់បឹងសំរោងនៅថ្ងៃទី២៤ ខែមេសា ករណីនៅបឹងតាមោកនៅថ្ងៃទី១១ ខែមិថុនា និងករណីនៅបឹងឈូកអេនៅថ្ងៃទី២០ ខែមិថុនា ផងដែរ៕