សកម្មជន​​បរិស្ថាន​​ថា​ សមាជិក​​បណ្ដាញ​​ព្រៃ​​ឡង់​​ម្នាក់​​ស្លាប់​​អំឡុង​​ចុះ​​ស៊ើប​អង្កេត​​បទ​ល្មើស​​ព្រៃ​ឈើ​​ក្នុង​​តំបន់​​

សមាជិក​បណ្ដាញ​សហគមន៍​ព្រៃ​ឡង់ លោក សែន សទ្ធា កាលពីចុះទៅអង្កេតនៅតំបន់ព្រៃឡង់។ (បណ្ដាញសហគមន៍ព្រៃឡង់)

សកម្មជន​ការពារ​បរិស្ថាន អះអាង​ថា សមាជិក​បណ្ដាញ​សហគមន៍​ព្រៃ​ឡង់​ម្នាក់បាន​ស្លាប់​នៅក្នុង​គ្រោះថ្នាក់​ចរាចរណ៍​មួយ​កាលពី​យប់​ថ្ងៃម្សិលមិញ​នេះ បន្ទាប់ពី​ធ្វើដំណើរ​គេច​ចេញពី​ការ​គំរាមកំហែង​របស់​ប្រធាន​សន្តិសុខ​ក្រុមហ៊ុន​មួយ ដែល​ពួក​គេ​ថា មាន​ជាប់ពាក់ព័ន្ធ​នឹង​បទល្មើស​ព្រៃឈើ​ក្នុង​តំបន់​ការពារ។

សកម្មជន​ការពារ​ព្រៃឈើ លោក ហេង ស្រស់ បានឱ្យ​ដឹង​ថា សមាជិក​បណ្ដាញ​សហគមន៍​ព្រៃ​ឡង់ លោក សែន សទ្ធា អាយុ ៤៦ឆ្នាំ និង​រូបលោក បាន​ចុះទៅ​ភូមិ​កាំ​ភ្លុក ឃុំ​បឹងចារ ស្រុក​សំបូរ ដើម្បី​ស៊ើបអង្កេត​សកម្មភាព​ដឹកជញ្ជូន​ឈើ​ចេញពី​តំបន់​ព្រៃ​ឡង់​ស្ថិត​ក្នុង​ខេត្តក្រចេះ។

សកម្មជន​ការពារ​ព្រៃឈើ​រូប​នេះ អះអាង​ថា រូបលោក និង​លោក សែន សទ្ធា បាន​ទទួលរង​ការ​គំរាមកំហែង​ពី​សន្តិសុខ​ក្រុមហ៊ុន ស៊ីង​បាយ អូ​ថេ​ក (Think Biotech​) កាលពី​ល្ងាច​ថ្ងៃទី១៦ ខែកក្កដា ហើយ​ត្រូវ​បាន​បង្ខំ​ឱ្យ​ចាកចេញ​ពីទី​នោះ និង​ធ្វើដំណើរ​ដោយ​ម៉ូតូ​មួយ​គ្រឿង​ចាកចេញ​ពីទី​នោះ មុននឹង​ជួប​គ្រោះថ្នាក់​ចរាចរណ៍​បណ្ដាល​ឱ្យ​លោក សែន សទ្ធា ស្លាប់បាត់បង់ជីវិត។

លោក ហេង ស្រស់ ប្រាប់​ថា លោក សែន សទ្ធា ដែល​ជា​ស្វាមី និង​ជា​ឪពុក​នៃ​កូនស្រី​ម្នាក់ និង​កូនប្រុស​ម្នាក់​កំពុង​រស់នៅ​រៀនសូត្រ​នៅ​ឯខេត្ត​ស្ទឹងត្រែង​នោះ បាន​ស្លាប់​អំឡុង​ពេល​បញ្ជូន​ទៅ​សង្គ្រោះ​នៅ​មន្ទីរពេទ្យ​បង្អែក​ស្រុក​សំបូរ ខេត្តក្រចេះ។

លោក ហេង ស្រស់ និយាយ​ថា៖ «ពួក​យើង​ក៏​ចាប់ផ្ដើម​ថតរូប ប្រហែល​កន្លះម៉ោង​ក្រោយ​ស្រាប់តែ​មាន​ប្រធាន​សន្តិសុខ​ក្រុមហ៊ុនមក ដើម្បី​គំរាមកំហែង​ពួក​យើង​ឱ្យ​ចាកចេញ​ពី​តំបន់​ហ្នឹង​ទៅ​កន្លែងណា​ផ្សេង។ គេ​មិន​ឱ្យ​នៅ​ក្បែរ​ក្រុមហ៊ុន​គេ ហើយ​គេ​មិន​ឱ្យ​នៅ​ចំ​ផ្លូវ​ដែលគេ​កំពុង​ដឹកឈើ​ទេ»។

លោក ហេង ស្រស់ និយាយ​បន្ត​ថា៖ «គេ​គំរាមកំហែង​ដែរ បើ​យើង​មិន​ចេញ​ទេ គឺ​គេ​មាន​សន្តិសុខ​របស់​គេ​ច្រើន គេ​នឹង​ឡោមព័ទ្ធ​ហើយ​គេ​ធ្វើបាប​យើង​គ្រប់រូប​ភាព។ អ៊ីចឹង ខ្ញុំ និង​គាត់​ក៏​សម្រេចចិត្ត​ជិះ​ម៉ូតូ​គេចខ្លួន​ពី​គេ​ទៅ ដើម្បី​ទៅ​រក​កន្លែង​សុ​វត្ថិភាព​ផ្សេងទៀត»។

បើ​តាម​លោក ហេង ស្រស់ សព​លោក សែន សទ្ធា ត្រូវ​បាន​គ្រួសារ​យក​ទៅ​ធ្វើបុណ្យ​តាម​ប្រពៃណី​នៅ​ស្រុកកំណើត ស្ថិតនៅ​ភូមិ​អូរ​ឡង់ ឃុំ​សៀមបូក ស្រុក​សៀមបូក ខេត្ត​ស្ទឹងត្រែង។

ក្រុម​ស្នូល​បណ្ដាញ​សហគមន៍​ព្រៃ​ឡង់​ខេត្ត​ស្ទឹងត្រែង បាន​និយាយ​នៅក្នុង​សេចក្ដី​ជូនដំណឹង​មួយ​នៅ​ថ្ងៃនេះ​ថា លោក សែន សទ្ធា បាន​ចូល​ជាស​មា​ជិ​ក និង​ជា​ក្រុម​ស្នូល​នៃ​បណ្ដាញ​សហគមន៍​ព្រៃ​ឡង់ ដើម្បី​ការពារ​ព្រៃ​ឡង់ និង​ធនធាន​ធម្មជាតិ​ចាប់តាំងពី​ឆ្នាំ២០០៥។ លោក​តែងតែ​ចុះ​ស៊ើបអង្កេត និង​រាយការណ៍​អំពី​បទល្មើស​ព្រៃឈើ​នៅក្នុង​តំបន់​ព្រៃ​ឡង់ ដូចជា ការទន្ទ្រាន​ដី​ព្រៃ​ខុសច្បាប់ ការ​កាប់​ឈើ​នៅ​តំបន់​ព្រៃ​ឡង់។

អ្នកនាំពាក្យ​សមាគម​ការពារ​សិទ្ធិមនុស្ស​អាហុក លោក ស៊ឹង សែន​ករុណា បាន​ជំរុញ​ទៅ​សមត្ថកិច្ច​កម្ពុជា ឱ្យ​បើក​ការស៊ើបអង្កេត​ជុំវិញ​ករណី​គំរាមកំហែង​នេះ។

លោក ស៊ឹង សែន​ករុណា ប្រាប់​ថា៖ «ការ​គំរាម​ហ្នឹងហើយ​ដែល​ធ្វើ​ឱ្យ​ពួក​គាត់​ចាកចេញ​ពីទី​តាំង​ពួក​គាត់​ចុះ​ធ្វើការ​ស្រាវជ្រាវ​បទល្មើស​ព្រៃឈើ​ក្នុង​តំបន់​ហ្នឹង។ អ៊ីចឹង ខ្ញុំ​ដើម្បី​បំភ្លឺ​ថា ការដែល​ពួក​គាត់​ចាកចេញ​ពី​មិន​មានការ​គំរាមកំហែង ឬអត់​ហ្នឹង សមត្ថកិច្ច​គួរតែ​មានការ​បញ្ជាក់​នៅក្នុង​រឿង​ហ្នឹង ហើយ​បើ​មានការ​គំរាមកំហែង​ទៅលើ​ពួក​គាត់ ​គួរតែ​មាន​វិធានការ​ទៅលើ​ជន​ដែល​គំរាមកំហែង​លើ​ពួក​គាត់»។

នាយក​ក្រុមហ៊ុន ស៊ីង បាយ​អូ​ថេ​ក និង​ក្រុមហ៊ុន Angkor Plywood លោក លូ ជូ​ចាង (Lu Chu Chang​) បាន​ប្រាប់​វី​អូ​ឌីតា​មអ៊ី​ម៉ែ​លថា លោក​ទទួល​បាន​ដំណឹង​អំពី​ករណីនេះ​ហើយ​នៅ​ព្រឹក​ថ្ងៃសុក្រ​នេះ ហើយ​លោក​ក៏បាន​ស្វែងរក​ព័ត៌មាន​បន្ថែម​ពី​អាជ្ញាធរ​មូលដ្ឋាន​ផង​ដែរ ប៉ុន្តែ មិនទាន់​ទទួល​បានការ​ឆ្លើយតប​នៅឡើយ។

នគរបាល​ស្រុក​សំបូរ​ទទួលបន្ទុក​ផែន​សន្តិសុខ លោក ស៊ុម ប៊ុ​នឈឿន ប្រាប់​វី​អូ​ឌី​នៅ​ថ្ងៃនេះ​ថា លោក​បានឱ្យ​អាជ្ញាធរ​មូលដ្ឋាន​ចុះ​ធ្វើ​របាយការណ៍​ចំពោះ​ករណីនេះ​ហើយ។ លោក​បន្ត​ថា ប្រសិនបើ​មាន​ករណី​គំរាមកំហែង​មែន សមត្ថកិច្ច​នគរបាល​ស្រុកនឹង​ធ្វើ​របាយការណ៍​បញ្ជូន​ទៅ​ថ្នាក់លើ។

លោក ស៊ុម ប៊ុ​នឈឿន ប្រាប់​ថា៖ «ចាំ​មើល​ខាង​រដ្ឋបាល​ប៉ុស្តិ៍​គេ​ចុះទៅ​ស្រាវជ្រាវ បើសិនជា​ឃើញ​រឿង​ហ្នឹង​មែនពិត ខ្ញុំ​ឆ្លង​យោបល់​ទៅ​ថ្នាក់លើ​នឹងអាច​មាន​វិធានការ»៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered