ក្រុមអង្គការសង្គមស៊ីវិលចំនួន ៤ បានរក្សាជំហររបស់ខ្លួន និងការពារខ្លឹមសារនៃរបាយការណ៍ស្ទង់មតិមួយអំពីស្ថានភាពបំណុលក្នុងចំណោមកម្មករកាត់ដេរនៅកម្ពុជា ដែលពួកគេចាត់ទុកថា ជំរុញឱ្យមានការរំលោភសិទ្ធិមនុស្សនៅកម្ពុជាអំឡុងវិបត្តិសុខភាពសកល។
អង្គការការពារសិទ្ធិមនុស្សលីកាដូ សមាគមធាងត្នោត មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) និងសម្ព័ន្ធសហជីពកម្ពុជា បានបញ្ជាក់ជំហររបស់ពួកគេបែបនេះនៅក្នុងលិខិតចំហររួមមួយចេញកាលពីថ្ងៃម្សិលមិញនេះ ដែលឆ្លើយតបទៅនឹងសេចក្ដីថ្លែងការណ៍របស់សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា។
ក្នុងលិខិតចំហមួយចេញកាលពីថ្ងៃទី១៥ ខែកក្កដា សមាគមមីក្រូហិរញ្ញវត្ថុ និងសមាគមធនាគារនៅកម្ពុជា បានទាមទារឱ្យកែប្រែខ្លឹមសារនៃរបាយការណ៍ចំនួន៣ ដែលត្រូវបានចេញផ្សាយកន្លងមក ដែលបានលើកឡើងពីបំណុលដែលជំរុញឱ្យមានការរំលោភសិទ្ធិមនុស្សក្នុងវិស័យមីក្រូហិរញ្ញវត្ថុ និងកម្ចីឥណទានខ្នាតតូចនៅកម្ពុជា។
នាយកស្ដីទីនៃអង្គការការពារសិទ្ធិមនុស្សលីកាដូ លោក អំ សំអាត នៅតែអះអាងថា របាយការណ៍ស្ទង់មតិនោះ បង្ហាញថា ក្រុមកម្មករក្នុងវិស័យកាត់ដេរ ពិតជាជាប់បំណុលធនាគារ និងរងការរំលោភសិទ្ធិមនុស្សក្នុងវិស័យមីក្រូហិរញ្ញវត្ថុ និងកម្ចីឥណទានខ្នាតតូចនៅកម្ពុជាប្រាកដមែន។
ប៉ុន្តែ លោកថា របាយការណ៍នេះ គ្រាន់តែជាផ្នែកមួយ ដើម្បីទុកឱ្យសមាគមមីក្រូហិរញ្ញវត្ថុ និងសមាគមធនាគារកម្ពុជា ពិនិត្យ និងពិចារណាជួយសម្រួលដល់កូនបំណុលដែលកំពុងជួបបញ្ហាប្រឈមក្នុងកំឡុងវិបត្តកូវីដ១៩នេះ ដើម្បីកុំឱ្យប៉ះពាល់ដល់មុខមាត់ស្ថាប័នមីក្រូហិរញ្ញវត្ថុទាំងនោះ។
លោក អំ សំអាត ប្រាប់ថា៖ «អ្វីដែលសំខាន់ ចេតនារបស់យើងតែមួយទេ គឺធ្វើយ៉ាងណាកុំឱ្យមានបញ្ហារំលោភសិទ្ធិមនុស្សកើតឡើងនៅក្នុងវិស័យមីក្រូហិរញ្ញវត្ថុ ព្រោះរឿងនេះក៏ដូចជាការជួយក្នុងមីក្រូហិរញ្ញវត្ថុដែរ បើសិនជាគាត់[មីក្រូហិរញ្ញវត្ថុ]ធ្វើទៅល្អ សេវារបស់គាត់ប្រកបដោយគុណភាព ដោយតម្លាភាព ហើយជាការជួយដល់ប្រជាពលរដ្ឋចំទិសដៅ។ យើងស្វាមគមន៍!»។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ ដែលសហជីពរបស់អ្នកស្រីក៏ចូលរួមក្នុងរបាយការណ៍ស្ទង់មតិដែរនោះ បាននិយាយថា ក្រុមអង្គការស៊ីវិល ជំរុញទៅខាងវិស័យមីក្រូហិរញ្ញវត្ថុ និងធនាគារ ឱ្យធ្វើការស្រាវជ្រាវពិនិត្យឱ្យបានគ្រប់ជ្រុងជ្រោយ។
អ្នកស្រី យ៉ាង សុភ័ណ្ឌ ប្រាប់ថា៖ «មើលទៅគាត់[មីក្រូហិរញ្ញវត្ថុ]មិនទាន់បានមើលរបាយការណ៍យើងឱ្យបានគ្រប់ជ្រុងជ្រោយទេ គាត់បែជាឆ្លើយតបត្រឡប់មកយើងវិញ ស្នើសុំឱ្យយើងកែប្រែ…ហើយយើងមិនបានទៅញុះញង់ភាគីណាទេ អ្វីដែលយើងសួរនេះ យើងសួរនាំបងប្អូនកម្មករ ហើយបងប្អូនកម្មករ គាត់និយាយខ្លួនគាត់មកវិញ ប៉ុន្តែគ្រាន់តែរបាយការណ៍នេះវាឆ្លុះបញ្ចាំងថាវាស្តែងចេញពីបងប្អូនកម្មករទូទាំងប្រទេស»។
ក្នុងរបាយការណ៍របស់ពួកគេចេញកាលពីចុងខែមិថុនាកន្លងមក ក្រុមសង្គមស៊ីវិលទាំងបួនស្ថាប័ន បាននិយាយថា ភាគច្រើននៅក្នុងចំណោមកម្មករជាង ១០០នាក់ ដែលទទួលកម្ចីពីគ្រឹះស្ថានមីក្រូហិរញ្ញវត្ថុ បាននិយាយថា ពួកគេបានកាត់បន្ថយការបរិភោគ ឬបានខ្ចីប្រាក់ពីប្រភពផ្សេងទៀត ដើម្បីសងបំណុលចាស់។
របាយការណ៍រកឃើញទៀតថា ក្នុងចំណោមកម្មករកម្មការិនី ១០៦នាក់ ដែលជាប់កម្ចីខ្នាតតូចរបស់គ្រឹះស្ថានមីក្រូហិរញ្ញវត្ថុ កម្មករកម្មការិនី ១៦នាក់ បានលក់ដីដើម្បីសងបំណុលមីក្រូហិរញ្ញវត្ថុរបស់ខ្លួន ខណៈកម្មករ ៣២នាក់ផ្សេងទៀត បាននិយាយថា ពួកគេមានគម្រោងលក់ដីនាពេលអនាគត។
ជិត ៨០ភាគរយនៃកម្ចីមីក្រូហិរញ្ញវត្ថុទាំងអស់ ត្រូវបានដាក់ប្លង់ដីបញ្ចាំ នេះជាការអនុវត្តទូទៅខាងហិរញ្ញវត្ថុ ដែលក្រុមសង្គមស៊ីវិលអះអាងថា បានធ្វើឱ្យកូនបំណុលប្រឈមនឹងហានិភ័យបាត់បង់ដីធ្លី និងជីវភាពរស់នៅរបស់ពួកគេ ព្រមទាំងអាចបង្កើតឱ្យមានការរំលោភសិទ្ធិមនុស្សផ្សេងៗ រួមទាំងការជួញដូរមនុស្ស និងពលកម្មកុមារផងដែរ។
បន្ថែមពីនេះ ក្រុមអង្គការសង្គមស៊ីវិលបានអំពាវនាវឱ្យគ្រឹះស្ថានមីក្រូហិរញ្ញវត្ថុ ឈប់តម្រូវឱ្យពួកគេយកប្លង់ដីដាក់បញ្ចាំ និងបានអំពាវនាវឱ្យរដ្ឋាភិបាលតម្រូវឱ្យគ្រឹះស្ថានមីក្រូហិរញ្ញវត្ថុទាំងនោះប្រគល់ប័ណ្ណកម្មសិទ្ធិដីរាប់លាន ដែលស្ថិតក្នុងដៃរបស់ម្ចាស់បំណុលប្រគល់ទៅម្ចាស់ដើមវិញ។
អ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី បានច្រានចោលរបាយការណ៍របស់អង្គការ និងសហជីពទាំងនោះ ដោយថា អាចធ្វើឱ្យប៉ះពាល់ដល់កេរ្តិ៍ឈ្មោះគ្រឹស្ថានមីក្រូហិរញ្ញវត្ថុកម្ពុជា។ លោកបន្តថា បច្ចុប្បន្ន កម្ពុជាជួបវិបត្តិកូវីដ១៩ គឺសមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា បានយកចិត្តទុកដាក់ជួយសម្រួលឱ្យកូនបំណុលប្រមាណ ២២ម៉ឺននាក់ រៀបចំកម្ចីឡើងវិញ ដោយអ្នកខ្លះស្នើសុំផ្អាកការសងបំណុលពីបីខែទៅប្រាំមួយខែ។
ទោះជាយ៉ាងណា លោក កាំង តុងងី បញ្ជាក់ថា សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា និងយកបញ្ហានេះជជែកជាមួយភាគីពាក់ព័ន្ធ ដើម្បីរកដំណោះស្រាយជុំវិញរឿងនោះផងដែរ។
លោក កាំង តុងងី និយាយថា៖ «យើងកំពុងតែជជែកពិភាក្សាផ្ទៃក្នុងជាមួយសមាជិករបស់យើង ព្រោះយើងអត់ចង់ធ្វើអ្វីស្រេចតែចិត្តទេ ថាតើជម្រើសអ្វីខ្លះដែលយើងគួរធ្វើបន្តទៅទៀត នៅពេលដែលគាត់នៅតែចេញរបាយការណ៍ដែលធ្វើឱ្យប៉ះពាល់ដល់កិត្យានុភាពរបស់វិស័យ Microfinance [មីក្រូហិរញ្ញវត្ថុ]នៅស្រុកខ្មែរ ដោយឡែកជម្រើសផ្លូវច្បាប់ គឺជាជម្រើសចុងក្រោយដែលយើងត្រូវយក»។
របាយការណ៍របស់ក្រុមសង្គមស៊ីវិល បានបញ្ជាក់ថា ប្រជាជនកម្ពុជាជាង ២.៦លាននាក់ជាប់កម្ចីដែលផ្ដល់ដោយគ្រឹះស្ថានមីក្រូហិរញ្ញវត្ថុ និងធនាគារនានា ដែលមានទំហំជាង ១០ពាន់លានដុល្លារត្រឹមដំណាច់ឆ្នាំមុន ដោយកម្ចីខ្នាតតូចនៅកម្ពុជាគិតជាមធ្យមមានចំនួនទឹកប្រាក់ ៣,៨០៤ដុល្លារ ជាចំនួនច្រើនជាងគេបំផុតនៅក្នុងពិភពលោក។
កម្មករកាត់ដេរជាប់ប្រាក់កម្ចី ២០ភាគរយក្នុងចំណោមកម្ចីមីក្រូហិរញ្ញវត្ថុនៅទូទាំងប្រទេសគិតមកដល់ដំណាច់ឆ្នាំមុន នេះបើតាមតំណាងរបស់សមាគមមីក្រូហិរញ្ញវត្ថុកម្ពុជា៕
