ក្រុមស្ត្រីជាភរិយា និងក្រុមសាច់ញាតិរបស់អតីតមន្ត្រីបក្សប្រឆាំងដែលកំពុងជាប់ឃុំខ្លួន បានព្យាយាមប្រមូលផ្ដុំតវ៉ាមុខសាលាដំបូងរាជធានីភ្នំពេញជាថ្មីទៀតនៅថ្ងៃនេះ ដើម្បីទាមទារទៅតុលាការឱ្យដោះលែងស្វាមី និងសាច់ញាតិពួកគេមានសេរីភាពវិញ ប៉ុន្តែ ត្រូវបានអាជ្ញាធរហាមឃាត់។
ក្រុមស្ត្រី និងពលរដ្ឋមួយចំនួនទៀតមានគ្នាប្រហែលជិត ២០នាក់ ដែលអះអាងថា ជាភរិយា និងជាសាច់ញាតិរបស់អតីតសកម្មជនគណបក្សសង្គ្រោះជាតិ បានប្រមូលផ្ដុំគ្នាលើកបដា និងតវ៉ានៅមុខសាលាដំបូងរាជធានីភ្នំពេញជាច្រើនលើកហើយ ដើម្បីទាមទារទៅតុលាការឱ្យដោះលែងអតីតសកម្មជនបក្សប្រឆាំង។
អ្នកស្រី អ៊ុក ចន្ទី ដែលជាភរិយារបស់សកម្មជនបក្សប្រឆាំងនៅខេត្តស្វាយរៀង លោក យឹម សារ៉េត បានប្រាប់វីអូឌីថា រាល់លើកពេលដែលពួកគាត់មកតវ៉ា តែងរងការគំរាមកំហែង និងរុញច្រានមិនឱ្យស្រែក ឬលើកបដាពីសំណាក់សមត្ថិកច្ច និងសន្តិសុខខណ្ឌ៧មករា។
អ្នកស្រី អ៊ុក ចន្ទី បានឱ្យដឹងថា ស្វាមីរបស់គាត់ លោក យឹម សារ៉េត ដែលជាជំទប់ទី១នៃឃុំចន្ត្រី ស្ថិតក្នុងស្រុករមាសហែក ខេត្តស្វាយរៀង ត្រូវសមត្ថកិច្ចចាប់កាលពីថ្ងៃទី៧ ខែមីនា ក្រោមការចោទប្រកាន់ពីបទ«រួមគំនិតក្បត់» ប៉ុន្តែ អ្នកស្រីបដិសេធថា ស្វាមីគាត់មិនបានប្រព្រឹត្តដូចការចោទប្រកាន់ឡើយ។
អ្នកស្រី អ៊ុក ចន្ទី ប្រាប់ថា៖ «ថ្ងៃនេះគ្រាន់តែពួកខ្ញុំលើកបដា គឺសន្តិសុខ និងប៉ូលិសបានមករុញច្រាន ហើយដណ្តើមហែកបដារបស់ពួកខ្ញុំចោល។ ខ្ញុំគិតថា អាជ្ញាធរទាំងអស់ហ្នឹងកំពុងបំពានលើពួកខ្ញុំស្រែៗ ដែលគ្រាន់តែឈរលើកបដាទាមទារដោះលែងប្តីពួកខ្ញុំ។ ប្តីខ្ញុំមិនមានកំហុសដូចចោទប្រកាន់សោះ។ នេះវាពិតជាអយុត្តិធម៌ណាស់សម្រាប់ពួកខ្ញុំ»។
អ្នកស្រី សេង ចាន់ថន ដែលអះអាងថា ជាភរិយារបស់លោក ស៊ុន ធន់ អតីតសមាជិកក្រុមប្រឹក្សាខេត្តកំពង់ធំរបស់អតីតបក្សប្រឆាំង និយាយថា ស្វាមីអ្នកស្រីត្រូវបានគេចាប់ខ្លួន និងឃុំយ៉ាងអយុត្តិធម៌។ អ្នកស្រីបន្ថែមថា ពេលអ្នកស្រីមកតវ៉ាទាមទារសុំឱ្យដោះស្រាយ ត្រូវបានសន្តិសុខខណ្ឌ៧មករា និងសមត្ថកិច្ចរុញច្រាន រួមទាំងគំរាមចាប់ខ្លួនថែមទៀត។
អ្នកស្រី សេង ចាន់ថន លើកឡើងថា ស្វាមីរបស់គាត់គឺលោក ស៊ុន ធន់ ត្រូវបានសមត្ថកិច្ចចាប់ខ្លួនកាលថ្ងៃទី១ ខែមិថុនា ក្រោមការចោទថា រួមគំនិតក្បត់ជាតិ និងញុះញង់ឱ្យយោធិនពិការស្អប់រដ្ឋាភិបាល។
អ្នកស្រី សេង ចាន់ថន ប្រាប់ថា៖ «ការចោទប្រកាន់នេះ ខ្ញុំយល់ឃើញថា ព្រះរាជអាជ្ញាហ្នឹងគាត់ចេះតែចោទប្រកាន់ផ្តេសផ្តាស ការចោទប្រកាន់នេះមិនមានភាពត្រឹមត្រូវ ព្រោះប្តីខ្ញុំគាត់អត់បានធ្វើដូចការចោទប្រកាន់របស់តុលាការទេ។ តុលាការចេះតែចោទចេះតែចាប់ ដើម្បីគំរាមកំហែងសកម្មជនបក្សប្រឆាំងភ័យខ្លាចគ្រប់គ្នា»។
អភិបាលខណ្ឌ៧មករា លោក លឹម សុភា បានបដិសេធបកស្រាយចំពោះការចោទប្រកាន់នេះ ដោយប្រាប់ថា កំពុងរវល់ប្រជុំ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ សុំមិនឆ្លើយទេរឿងពលរដ្ឋតវ៉ាមុខតុលាការ ប៉ុន្តែ លោកថា សំណុំរឿងរបស់សកម្មជន គឺចៅក្រមស៊ើបសួរកំពុងតែចំណាត់ការតាមនីតិវិធី។
អ្នកស្រី សេង ចាន់ថន បានឱ្យដឹងថា បន្ទាប់ពីក្រុមសន្តិសុខខណ្ឌ៧មករារារាំងការជួបជុំរបស់ពួកគាត់ ក្រុមស្ត្រី និងសាច់ញាតិរបស់សកម្មជនអតីតបក្សប្រឆាំង បាននាំគ្នាទៅដាក់ញត្តិនៅឯស្ថានទូតអូស្ត្រាលីប្រចាំកម្ពុជា ហើយអ្នកស្រីថា ញត្តិរបស់ក្រុមអ្នកស្រីត្រូវបានទទួលយក។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលឃ្លាំមើលករណីនេះ បានចាត់ទុកសកម្មភាពរបស់ក្រុមសន្តិសុខ និងសមត្ថកិច្ចរបស់ខណ្ឌ៧មករា ថាជាការរំលោភសិទ្ធិមនុស្សក្នុងការតវ៉ាដោយសន្តិវិធីដែលចែងក្នុងច្បាប់ជាតិ និងអន្តរជាតិផងដែរ។
លោក ស៊ឹង សែនករុណា ប្រាប់ថា៖ «អ្វីដែលជាការរារាំងនោះ គឺសន្តិសុខតែងតែចាប់យកនូវបដារបស់ពលរដ្ឋ ធ្វើឱ្យពួកគាត់ពិបាកធ្វើការលើកជាសារហ្នឹង ដើម្បីបង្ហាញអំពីការទាមទាររបស់ពួកគាត់។ អ៊ីចឹងហើយសកម្មភាពទាំងនេះ វាជាការរំលោភទៅលើសិទ្ធិ ទៅលើការសម្តែងមតិរបស់ប្រជាពលរដ្ឋដែលមានសិទ្ធិសម្តែងមតិ ដើម្បីឱ្យសាធារណជនបានដឹងអំពីអ្វីដែលជាការសំណូមពរ និងការទាមទាររបស់ពួកគាត់»។
អ្នកការពារសិទ្ធិមនុស្សរូបនេះ បានជំរុញទៅរដ្ឋាភិបាលឱ្យដោះលែងគ្រួសារអតីតគណបក្សប្រឆាំងឱ្យមានសេរីភាពឡើងវិញ ដើម្បីទទួលបានប្រព័ន្ធអនុគ្រោះពន្ធពីសហគមន៍អន្តរជាតិ ដោយថា ការបន្តឃុំខ្លួនអតីតមន្ត្រីបក្សប្រឆាំងនៅពន្ធនាគារនោះ វាមិនបានចំណេញអ្វីដល់រដ្ឋាភិបាលទេ ប៉ុន្តែ ផ្ទុយទៅវិញ វានឹងធ្វើឱ្យប៉ះពាល់ដល់មុខមាត់ប្រទេសកម្ពុជា ក៏ដូចជារដ្ឋាភិបាល។
មេធាវីការពារក្ដីឱ្យអតីតសកម្មជន និងអ្នកគាំទ្របក្សប្រឆាំង លោក សំ សុគង់ ឱ្យដឹងថា គិតចាប់តាំងពីខែមករាដើមឆ្នាំនេះមក សកម្មជន និងអ្នកគាំទ្របក្សប្រឆាំងចំនួន ១៤រូបហើយ ត្រូវបានសមត្ថកិច្ចចាប់ខ្លួន និងត្រូវបានចោទប្រកាន់ថា បានរួមគំនិតក្បត់ ឬការចោទប្រកាន់ពីបទញុះញង់ជាដើម៕
