អភិបាលខណ្ឌពោធិ៍សែនជ័យអះអាងថា សមត្ថកិច្ចបានបញ្ជូនស្ត្រីជាជនសង្ស័យដែលប្រើប្រាស់ហិង្សាលើកុមារីវ័យ៥ឆ្នាំម្នាក់ទៅតុលាការនៅព្រឹកមិញនេះ។
អភិបាលខណ្ឌពោធិ៍សែនជ័យ លោក ម៉ន វុទ្ធី ថ្លែងប្រាប់វីអូឌីនៅព្រឹកថ្ងៃទី១៧ ខែកក្កដា ថា សំណុំរឿងនេះត្រូវបានអធិការដ្ឋានខណ្ឌកសាងសំណុំរឿងរួចរាល់តាំងពីយប់ម្សិលមិញម្ល៉េះ។
លោក ម៉ន វុទ្ធី បានបន្តថា បទចោទដែលអធិការដ្ឋានខណ្ឌដាក់បន្ទុកលើស្ត្រីរូបនោះ គឺពាក់ព័ន្ធនឹងបទហិង្សាមានស្ថានទម្ងន់ទោស។
អភិបាលខណ្ឌរូបនេះ បានបញ្ជាក់ថា កាលពីរសៀលថ្ងៃទី១៦ ខែកក្កដាម្សិលមិញ ស្នងការខណ្ឌពោធិ៍សែនជ័យបានបានចុះឃាត់ខ្លួនស្ត្រីជាជនសង្ស័យម្នាក់ឈ្មោះ លីវ ប៊ុនធឿន អាយុ៤៣ឆ្នាំ យកទៅសាកសួរ ក្រោយពីស្រ្តីជាជនសង្ស័យធ្វើសកម្មភាពយកកាំបិតប៉ុនប៉ងអារកសម្លាប់ក្មេងស្រីម្នាក់ ព្រោះតែខឹងក្មេងស្រីរូបនោះយកដុំថ្មគប់កូនប្រុសគាត់ បែកក្បាលកាលពីថ្ងៃទី១៤ ខែកក្កដា។ ក្មេងស្រីរងគ្រោះបានរងរបួសផ្ទៃមុខ ច្រមុះ ក និងដៃ។
កាលពីថ្ងៃទី១៤ ខែកក្កដា កូនប្រុសរបស់ស្រ្តីដែលជាជនសង្ស័យបានរើសដុំថ្មគប់ដាក់ក្មេងស្រីរងគ្រោះ ហើយក៏ត្រូវក្មេងស្រីរងគ្រោះគប់តបតវិញ បណ្ដាលឱ្យត្រូវក្បាលរងរបួសបែករយះដេរ២ថ្នេរ ដោយពេលនោះម្ដាយក្មេងស្រីរូបនោះក៏បានជួយបញ្ជូនទៅកាន់មន្ទីរពេទ្យផងដែរ។
ប្រភពពីអាជ្ញាធរឱ្យដឹងថា ហេតុការណ៍អំពើហិង្សាលើក្មេងស្រីដែលបង្កដោយស្រ្តីជាជនសង្ស័យរូបនេះ បានកើតឡើងនៅម៉ោងប្រមាណ៣ និង១៥នាទីរសៀល ថ្ងៃទី១៦ ខែកក្កដា ឆ្នាំ២០២០ នៅបុរីពិភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន បានប្រាប់ថា លោកមិនទាន់អាចឆ្លើយសំណួរណាមួយពីអ្នកសារព័ត៌មានបានទេនៅពេលនេះ ព្រោះលោកមិនទាន់ទទួលបានសំណុំរឿងនេះនៅឡើយ។
អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ លោកស្រី ញ៉េក សុភាព មានប្រសាសន៍ថា ក្រុមប្រឹក្សាជាតិកម្ពុជាមិនអាចទទួលយកបានទេចំពោះការប្រើប្រាស់ហិង្សាលើកុមារបែបនេះ។
លោកស្រីថ្លែងថា៖ «ក្នុងនាមជាគណៈកម្មាធិការ ខ្ញុំនឹងធ្វើការសាកសួរសុខទុក្ខ និងរៀបចំស្វែងរកមេធាវីដើម្បីការពារក្តី។ ក្នុងនោះយើងខ្ញុំនឹងធ្វើការស្វែងរកជំនួយគាំពារសង្គ្រោះធ្វើយ៉ាងម៉េចឱ្យអស់លទ្ធភាព ក្នុងជំនួយបន្ទាន់ដំបូងគឺយើងខ្ញុំត្រូវគិតគូរលើផ្នែកអារម្មណ៍របស់ក្មេងស្រីរងគ្រោះ និងគ្រួសារសិន»។
របាយការណ៍ប្រចាំឆ្នាំ២០១៩របស់ក្រុមប្រឹក្សាជាតិកម្ពុជាដើម្បីកុមារ ឱ្យដឹងថា ករណីស្រ្តី និងក្មេងស្រីក្រីក្ររងគ្រោះដោយអំពើហិង្សាសរុបមានចំនួន១៦០ករណី (កើតឡើងនៅខេត្តចំនួន១៤) ក្នុងនោះករណីអំពើហិង្សាក្នុងគ្រួសារ៤៨ករណី អំពើរំលោភសេពសន្ថវៈ១១០ករណី និងប្រទូសកេរ្តិ៍ខ្មាស២ករណី៕